詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
68:1 順利之歌
（大衛ê詩歌，交hō͘樂官。）願上帝起來，hō͘祂ê對敵四散；hō͘怨恨祂ê人tùi祂ê面前逃走。
68:2 祢kā in趕散，親像煙hō͘風吹散；pháiⁿ人見tio̍h上帝ê面to̍h消滅，親像臘見tio̍h火就熔去。
68:3 總是，義人ē歡喜，in tī上帝ê面前會快樂，in mā ē時常歡歡喜喜。
68:4 Lín tio̍h對上帝吟詩，唱歌oló祂ê名；為tio̍h hit位坐車經過曠野ê修造大路。祂ê名叫做耶和華，tio̍h tī祂ê面前快樂！
68:5 上帝tī祂聖ê所在，做孤兒ê父，替寡婦申冤。
68:6 上帝hō͘孤單ê人有厝，hō͘受關監ê人出來享福自由；只有悖逆ê人tòa tī乾燥ê地。
68:7 上帝ah，早前祢行tī人民ê頭前，經過曠野。 [Sè-la̍h]
68:8 Hit時，地見tio̍h上帝ê面就振動，天mā落雨；hitê西奈mā振動，是因為見tio̍h上帝—以色列ê上帝ê面。
68:9 上帝ah，祢落大雨；祢ê產業—以色列厭倦ê時，祢hō͘她堅固。
68:10 祢ê子民tòa tī hit中間；上帝ah，祢為tio̍h sànchhiah人準備恩惠。
68:11 主出命令，傳好消息ê chabó͘人chiâⁿ大陣。
68:12 君王逃走à！逃走à！Tiàm tī厝內ê chabó͘人分tio̍h所搶ê物。
68:13 Lín倒tī羊椆內ê時，親像粉鳥ê翼鑲白銀，牠ê毛鑲黃金。
68:14 全能上帝tī hit內面趕散列王ê時，勢面親像撒門山teh落雪。
68:15 巴珊山是上帝ê山；巴珊山是有真chē山嶺ê山。
68:16 有真chē山嶺ê山，lín ná ē怨妒上帝所愛tòa ê山？上主ētòa tī hia到永遠！
68:17 上帝ê車千千萬萬；主tī hit中間，親像tī西奈，tī聖ê所在。
68:18 祢已經上到koân ê所在，kā hiahê俘虜掠來；祢tùi人ê中間接受in所獻ê，連悖逆ê人mā獻，hō͘上主—上帝thang tòa in中間。
68:19 主是應該受oló ê！祂日日揹阮ê枷擔，祂是救阮ê上帝。 [Sè-la̍h]
68:20 上帝是對咱行ta̍k種拯救ê上主；至koân上主救咱脫離死亡。
68:21 總是，beh phah破對敵ê頭殼，to̍h是tiāⁿ-tiāⁿ 犯罪ê人ê頭殼。
68:22 主講：我beh kā in tùi巴珊chhōa倒tńg來，tùi深淵chhōa in倒tńg來，
68:23 Hō͘你kā in phah碎，你ê腳踏tī對敵ê血中，你ê狗舐in ê血。
68:24 上帝ah，祢是我ê上帝，我ê王；人已經看tio̍h祢teh行，行入去聖ê所在。
68:25 唱歌ê行tī頭前，奏樂ê tòe tī後面，搖lin-long鼓ê chabó͘ gín-á tī中間。
68:26 Tùi以色列ê源頭來ê，tio̍h tī ta̍k个會中oló上帝，to̍h是咱ê主！
68:27 Tī hia有kā in管轄ê小便雅憫，有偤大ê族長kah in kui陣ê群眾；有西布倫ê族長，有拿弗他利ê族長。
68:28 上帝ah，求祢顯出祢ê氣力；求祢堅固祢kā阮所成ê tāichì。
68:29 為tio̍h祢tī耶路撒冷ê殿，列王會帶禮物來獻hō͘祢。
68:30 求祢責備蘆葦中ê野獸kah kui群ê牛káng，以及親像牛á kā銀踏tī腳前ê列邦；求祢趕散hiahê ài交戰ê人民。
68:31 大官ē tùi埃及來；古實會趕緊ǹg上主來gia̍h起手。
68:32 世上ê列國，lín tio̍h對上帝唱歌；願lín吟詩oló主。 [Sè-la̍h]
68:33 to̍h是oló hit位坐tī tùi古早to̍h有，tī極koân ê天ê主！祂發出極大koh有力ê聲。
68:34 Lín tio̍h kā權能歸hō͘上主。祂ê威嚴tī以色列ê頂面，祂ê權能tī穹蒼。
68:35 上帝ah，祢tī祢聖ê所在真正thang驚畏；以色列ê上帝kā氣力kah權能賞賜hō͘祂ê子民。上帝應該受oló。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。