創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
47:1 約瑟入去kā法老講：「我ê老父kah我ê兄弟帶in ê羊群、牛群kah一切所有ê，tùi迦南地來，taⁿ tī歌珊ê地khiā起。」
47:2 約瑟tùi伊ê兄弟ê中間揀五人，chhōa in去見法老。
47:3 法老問約瑟ê兄弟講：「Lín做啥物頭路？」In kā法老講：「你ê奴僕本身kah阮ê祖先，lóng是顧羊ê人。」
47:4 In koh kā法老講：「迦南地飢荒真傷重，奴僕ê羊群無草thang食，所以，阮來是beh寄腳tī chia，taⁿ求你容允你ê奴僕tòa tī 歌珊地。」
47:5 法老kā約瑟講：「你ê老父kah你ê兄弟來到你chia，
47:6 埃及地lóng tī你ê面前；hō͘你ê老父kah你ê兄弟tòa tī國內siōng好ê所在。In thang tòa tī歌珊ê地。你若知in中間khah有本事ê人，to̍h派in管顧我ê chengseⁿ。」
47:7 約瑟chhōa伊ê老父雅各入去khiā tī法老ê面前，雅各to̍h kā法老祝福。
47:8 法老問雅各講：「你一生ê年日是gōa chē？」
47:9 雅各kā法老講：「我寄腳tī世間ê年日是一百三十歲。我一生ê年日koh少，koh艱苦，不如我ê祖先寄腳tī世間ê年日。」
47:10 雅各koh kā法老祝福，to̍h tùi法老ê面前出去。
47:11 約瑟照法老ê命令，kā埃及國siōng好ê地，to̍h是蘭塞ê地，hō͘伊ê老父kah伊ê兄弟tòa，做in ê產業。
47:12 約瑟用米糧奉養伊ê老父kah伊ê兄弟，以及伊ê老父全家，lóng照in ê人額來kā in供給。
47:13 大飢荒
飢荒真傷重，全地lóng無米糧，甚至埃及地kah迦南地ê人，in因為飢荒ê緣故，餓到暈去。
47:14 約瑟聚集埃及地kah迦南地所有ê銀，to̍h是in來糴米糧ê銀，kā hiahê銀帶到法老ê宮內。
47:15 埃及地kah迦南地ê銀lóng用了，埃及群眾lóng來見約瑟講：「阮ê銀lóng用了à，求你hō͘阮米糧，阮án怎tio̍h死tī你ê面前？」
47:16 約瑟講：「若是銀用了，lín thang牽lín ê chengseⁿ來，我為tio̍h lín ê chengseⁿ beh hō͘ lín米糧。」
47:17 Into̍h kā chengseⁿ趕到約瑟hia，約瑟to̍h用米糧換in ê馬、羊群、牛群kah驢。Hit年，為tio̍h beh換in一切ê chengseⁿ，to̍h用米糧養飼in。
47:18 Hit年已經過去，第二年，in koh來見約瑟，kā伊講：「阮bē瞞得我ê主，阮ê銀lóng用了，chengseⁿ mā lóng歸tī我ê主，阮tī我ê主ê面前，除阮ê身軀kah阮ê田地以外，無chhun kah半項。
47:19 阮án怎tio̍h tī你ê目chiu 前，人死，地拋荒？求你用米糧買阮kah阮ê地，阮kah阮ê地thang做法老ê路用。Koh請kā種籽hō͘阮，hō͘阮得tio̍h活，免死，土地mā免拋荒。」
47:20 就ánne，約瑟為法老買埃及所有ê地，埃及人因為hō͘飢荒所迫，ta̍k人lóng賣伊ê田地，hiahê地to̍h lóng歸tī法老。
47:21 約瑟照chiahê城邑遷徙埃及ê人民，tùi埃及chit pêng到tī hit-pêng。
47:22 獨獨祭司ê地，法老無kā伊買，因為祭司有tùi法老得tio̍h定tio̍h ê量，in食法老所hō͘ in ê量，所以，in無賣in ê地。
47:23 約瑟kā人民講：「我今á日為法老買lín kah lín ê地。你看，tī chia有種籽hō͘ lín，lín thang the̍h去種作。
47:24 到收成ê時，lín tio̍h kā五分之一納hō͘法老，四份歸lín，做田裡ê種籽，mā做lín kah lín厝內ê人，以及lín ê gín-á ê食物。
47:25 In講：「你有救阮ê性命，願阮tī我ê主ê面前得tio̍h恩典，阮beh做法老ê奴僕。」
47:26 Án-ne，約瑟為埃及ê地設立定tio̍h ê例，到tī今á日；法老得tio̍h五分之一，獨獨祭司ê地無歸法老。
47:27 雅各最後ê要求
以色列人tòa tī埃及國歌珊ê地，in tī hia建置產業，koh生湠極chē。
47:28 雅各tòa tī埃及地十七年，雅各一生ê年日是一百四十七歲。
47:29 以色列死ê日teh beh到，伊to̍h叫伊ê kiáⁿ約瑟來，kā伊講：「我若tī你ê面前得tio̍h恩典，請你下手tī我ê大腿下對我咒chōa，用慈愛kah誠實款待我，m̄ thang kā我埋葬tī埃及。
47:30 我死ê時，你tio̍h kā我帶出埃及，埋葬tī我ê老父kah阿公埋葬ê所在。」約瑟講：「我ē照你ê話去做。」
47:31 雅各講：「你tio̍h對我chiùchōa。」約瑟to̍h對伊chiùchōa。就ánne，以色列tī床頭敬拜上帝。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。