創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
46:1 雅各Chhōa家眷到埃及
以色列帶一切所有ê，出發來到別是巴，to̍h獻祭hō͘伊ê老父以撒ê上帝。
46:2 暗時，上帝tī異象ê中間kā以色列講：「雅各，雅各！」伊講：「我tī chia。」
46:3 上帝講：「我是上帝，to̍h是你ê老父ê上帝；你落去埃及m̄免驚，因為我beh hō͘你tī hia成做大國。
46:4 我beh kah你做伙落去埃及，我mā一定ēkoh chhōa你tńg來；約瑟beh手hōaⁿ你ê目chiu ，hō͘你thang安然kheh目。」
46:5 雅各to̍h tùi別是巴出發；以色列hiahê kiáⁿ hō͘ in ê老父雅各，kah in ê bó͘-kiáⁿ lóng坐tī法老所差來beh載伊ê車。
46:6 雅各kah伊所有ê kiáⁿ孫帶in ê chengseⁿ kah tī迦南地所得tio̍h ê財物，lóng來到埃及。
46:7 雅各chhōa伊ê kiáⁿ、孫、chabó͘ kiáⁿ、chabó͘孫，kah伊所有ê kiáⁿ孫，lóng來到埃及。
46:8 以色列人來到埃及ê，to̍h是雅各kah伊ê kiáⁿ，in ê名記tī下底：雅各ê大kiáⁿ流便。
46:9 流便ê kiáⁿ：哈諾、法路、希斯崙、迦米。
46:10 西緬ê kiáⁿ：E-mu-el、雅憫、O-hat、雅斤、瑣轄，iáu有迦南地ê chabó͘人ê kiáⁿ掃羅。
46:11 利未ê kiáⁿ：革順、哥轄、米拉利。
46:12 偤大ê kiáⁿ：珥、俄南、示拉、法勒斯、謝拉；獨獨珥 kah俄南死tī迦南地。法勒斯ê kiáⁿ：希斯崙、Ha-múl。
46:13 以薩迦ê kiáⁿ：陀拉、Phu-oah、約伯、伸崙。
46:14 西布倫ê kiáⁿ：Se-lia̍t、以倫、Ia-li-el。
46:15 Chiahê是利亞tī巴旦亞南kā雅各所生ê kiáⁿ，koh有伊ê chabó͘ kiáⁿ底拿，伊ê kiáⁿ孫男女總共三十三人。
46:16 迦得ê kiáⁿ：Che-hui-óng、Hak-gī、Siu-nî、E-chu-bóng、E-lī、Ia-no-ah-tí、A-li-el-lī。
46:17 亞設ê kiáⁿ：音拿、I-si-bah、亦施韋、庇哩亞，koh有in ê小妹西拉。庇哩亞ê kiáⁿ：希別、Mal-ki-el。
46:18 這是拉班hō͘伊ê chabó͘ kiáⁿ利亞ê女婢悉帕所生ê kiáⁿ孫，to̍h是她kā雅各生ê，總共十六人。
46:19 雅各ê bó͘拉結ê kiáⁿ：約瑟kah便雅憫。
46:20 約瑟tī埃及地生瑪拿西kah以法連，to̍h是Ong城ê祭司，Pho-ti-hoe-la̍h ê chabó͘ kiáⁿ，A-se-nat，kā約瑟生ê。
46:21 便雅憫ê kiáⁿ：比拉、Be-kel、A-si-bel、基拉，乃縵、E-hi、Lo-sih、Mup-pîm、Hup-pîm、亞勒。
46:22 這是拉結kā雅各所生ê kiáⁿ孫，總共十四人。
46:23 但ê kiáⁿ：Ho͘-sim。
46:24 拿弗他利ê kiáⁿ：雅薛、Gu-nî、E-chel、Si-lém。
46:25 這是拉班hō͘伊ê chabó͘ kiáⁿ拉結ê女婢辟拉所生ê kiáⁿ孫，to̍h是她kā雅各所生ê，總共七人。
46:26 Hiahê kah雅各做伙到埃及ê，除伊ê新婦以外，見若tùi伊身軀所出ê，總共六十六人。
46:27 Koh有約瑟tī埃及所生ê kiáⁿ有兩 个。雅各ê家來到埃及ê，總共七十人。
46:28 雅各kah伊ê家族來到埃及
雅各差偤大做頭去見約瑟，thang chhōa in去歌珊，in to̍h來到歌珊ê地。
46:29 約瑟準備伊ê車去歌珊，伊ê老父以色列來kā伊迎接，到見tio̍h面，to̍h仆tī老父ê頷頸，tī頷頸裡哭真久。
46:30 以色列kā約瑟講：「我見tio̍h你ê面，知你iáu活leh，我taⁿ死mā甘願。」
46:31 約瑟kā伊ê兄弟kah老父ê家講：「我beh來去通知法老，kā伊講：『我ê兄弟kah我ê老父ê家，以前tòa tī迦南地ê，taⁿ lóng來到我chia。
46:32 In是牧者，因為in是飼chengseⁿ ê人，in kā羊群、牛群kah一切所有ê lóng帶來。』
46:33 法老召lín ê時，若問lín講：『Lín做啥物頭路？』
46:34 lín tio̍h講：『你ê奴僕，tùi少年到taⁿ，阮連阮ê祖先lóng是teh飼chengseⁿ。』Án-ne lín thang來khiā tī歌珊ê地，因為見若飼chengseⁿ-ê lóng是埃及人所討厭ê。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。