創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
45:1 約瑟Ǹg伊ê兄弟表明kakī ê身分
約瑟tī hiahê khiā tī伊身邊ê人ê面前忍bē tiâu，就hoah：「眾人tio̍h離開我出去。」約瑟kā伊本身表明hō͘兄弟ê時，在場無其他ê人。
45:2 約瑟to̍h出聲大哭，埃及人聽tio̍h，法老ê家mā有聽tio̍h。
45:3 約瑟kā伊ê兄弟講：「我是約瑟，我ê老父iáu tī ·leh無？」伊ê兄弟bē tàng應，因為tī伊ê面前lóng真驚惶。
45:4 約瑟koh kā伊ê兄弟講：「請行óa來。」Into̍h óa來，伊講：「我是lín ê小弟約瑟，to̍h是lín所賣到埃及ê。
45:5 Taⁿ m̄免因為賣我到chia來憂悶，來kakī 怨恨。這是上帝差我tāi先lín來，因為beh保全lín ê性命。
45:6 Taⁿ tī chit所在ê飢荒已經兩年，iáu有五年，無thang種作，無thang收成。
45:7 上帝差我tāi先lín來，是為tio̍h beh kā lín留種tī世上，koh beh行祂大ê拯救，保全lín ê活命。
45:8 Án-ne看起來，差我到chia ê，m̄是lín，是上帝。祂koh hō͘我親像法老ê父，做伊全家ê主，kah管理埃及全地。
45:9 Lín tio̍h趕緊tńg去我ê老父hia，kā伊講：「你ê kiáⁿ約瑟ánne講：『上帝hō͘我做全埃及ê主，請落來我chia，m̄ thang延chhiân。
45:10 你kah你ê kiáⁿ、你ê孫，以及牛群、羊群，koh一切所有ê，lóng thang來tòa tī歌珊ê地，kah我相隔壁。
45:11 我beh tī hia奉養你，因為iáu有五年ê飢荒，免得你kah你ê家眷，kah一切所有ê lóng落難。』
45:12 何況lín ê目chiu kah我ê小弟便雅憫ê目chiu ，lóng有看tio̍h我對lín親嘴所講ê話。
45:13 Lín mā tio̍h kā我tī埃及一切ê榮光kah lín所看tio̍h ê tāichì，lóng kā我ê老父講，koh tio̍h趕緊kā我ê老父搬來我chia tòa。」
45:14 就ánne，約瑟仆tī伊ê小弟便雅憫ê頷頸啼哭，便雅憫mā tī伊ê頷頸啼哭。
45:15 約瑟koh kah眾兄弟chim嘴，kā in攬teh啼哭，後來，伊ê兄弟to̍h kah伊講話。
45:16 Chitê風聲傳到法老ê宮內，講：「約瑟ê兄弟來à。」法老kah伊ê人臣lóng真歡喜。
45:17 法老kā約瑟講：「你tio̍h kā你ê兄弟講：『Lín tio̍h ánne行：Kā物件hō͘ chengseⁿ載，出發去迦南地。
45:18 Kā lín ê老父kah lín ê家眷lóng搬來我chia，我beh kā埃及地ê好物hō͘ lín，lín mā thang食chit所在ê山珍海味。
45:19 Taⁿ我命令你，lín tio̍h ánne做：Tùi埃及地帶車去，kā lín ê bó͘-kiáⁿ kah lín ê老父lóng搬來chia。
45:20 M̄-thang看重lín厝內ê物，因為埃及全地ê好物，lóng是lín ê。』」
45:21 以色列ê眾kiáⁿ就ánne出發。約瑟照法老ê命令hō͘ in車kah路中需要ê食物，
45:22 koh hō͘ in一个人一套衫褲，獨獨hō͘便雅憫銀三百，衫褲五套。
45:23 伊送in老父ê物，記tī下底：驢káng十隻，載埃及ê好物；驢母十隻，載五穀、餅kah菜，hō͘ in老父beh來埃及ê路裡thang用。
45:24 約瑟to̍h差伊ê兄弟tńg去，in to̍h出發。約瑟koh kā in講：「Lín m̄ thang tī路裡冤家。」
45:25 In tùi埃及出發，來到迦南地，to̍h是in老父雅各hia。
45:26 In kā老父講：「約瑟iáu tī ·leh，koh teh管理埃及全地。」雅各心暈去，因為m̄信in ê話。
45:27 Into̍h kā約瑟對in所講ê話，lóng kā伊講；伊koh看tio̍h約瑟所差來beh載伊ê車，in老父雅各ê心就活起來。
45:28 以色列講：「好à；我ê kiáⁿ約瑟iáu tī ·leh，趁我iáu未死，我beh來去看伊。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。