創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
44:1 約瑟ê銀酒杯失蹤
約瑟吩咐管家講：「Kā米糧入滿chiahê人ê布袋，盡in所有法度帶ê，koh kā ta̍k人ê銀lok tī伊ê布袋口。
44:2 Mā kā我ê杯，to̍h是hit塊銀杯，hē tī少年ê布袋口，伊糴五穀ê銀mā續hē落去。」管家ê就照約瑟所講ê話去做。
44:3 天一下光，to̍h差hiahê人kah in ê驢離開去。
44:4 In出城行無gōa遠，約瑟kā管家講：「起來，去jiok hiahê人，jiok tio̍hto̍h kā in講：『Lín ná ē用pháiⁿ報好？
44:5 這kám m̄是我ê主人lim酒ê杯？Kám m̄是伊占卜teh用ê？Lín ánne做是m̄ tio̍h。』」
44:6 管家ê jiok tio̍h in，kā chiahê話對in講。
44:7 In應講：「我ê主án怎ē講chit款話？你ê奴僕絕對無做chit款tāichì。
44:8 你看，阮前tī布袋口所看tio̍h ê銀，尚且tùi迦南地帶來還你，阮ná ē tùi你主人ê家偷the̍h金銀？
44:9 你ê奴僕ê中間，無論tī啥人hia chhiau tio̍h，to̍h hō͘伊死，阮mā beh做我ê主人ê奴僕。」
44:10 管家講：「Taⁿ就照lín ê話來做，tī啥人hia chhiau tio̍h，hitê人to̍h做我ê奴僕，其他ê lóng無罪。」
44:11 Tùi hit時起，in ta̍k人趕緊kā布袋卸tī土腳，ta̍k人tháu開in ê布袋。
44:12 管家to̍h開始chhiau，tùi大ê到細ê為止，hitê杯竟然tī便雅憫ê布袋內chhiau tio̍h。
44:13 Into̍h拆裂in ê衫，ta̍k人kā in ê物hō͘驢á載，tńg去城內。
44:14 偤大kah伊ê兄弟到約瑟ê厝，約瑟iáu tī hia，in to̍hti7伊ê面前仆落地。
44:15 約瑟kā in講：「Lín所做ê是啥物事？Lín kám m̄知，親像我chit款ê人ē占卜？」
44:16 偤大講：「阮對我ê主beh講啥物？阮iáu有啥thang講？阮ná有法度thang為kakī 辯解？上帝已經查出你ê奴僕ê罪過，阮kah hitê tī伊ê手chhiau tio̍h杯ê，lóng是我ê主ê奴僕。」
44:17 約瑟講：「我絕對無beh ánne做，tī啥人ê手chhiau tio̍h杯，hitê人to̍h tio̍h做我ê奴僕，lín chiahê thang平安tńg去lín老父hia。」
44:18 偤大替便雅憫哀求
偤大óa近約瑟講：「我ê主，求你容允你ê奴僕講一句話hō͘我ê主聽。M̄-thang對你ê奴僕受氣，因為你kah法老相siâng。
44:19 我ê主bat問你chiahê奴僕講：『Lín有老父，有兄弟無？』
44:20 阮kā我ê主講：『阮有老父，已經年老，iáu有伊年老所生ê一个soah尾kiáⁿ。伊ê阿兄已經死，伊ê老母kantaⁿ放伊一个，伊ê老父koh真疼伊。』
44:21 你kā你ê奴僕講：『Chhōa伊落來我chia，hō͘我親目看tio̍h伊。』
44:22 阮kā我ê主講：『Gín-á bē tàng離開伊ê老父，若離開伊ê老父，老父一定ē死。』
44:23 你kā你ê奴僕講：『Lín ê soah尾小弟若無kah lín做伙落來，lín to̍hbe7 tàng koh見我ê面。』
44:24 「阮tńg去到你ê奴僕—阮老父hia，to̍h kā我ê主ê話對伊講。
44:25 阮ê老父講：『Lín koh去kā咱糴淡薄á米糧來。』
44:26 阮to̍h講：『阮bē tàng落去。阮ê soah尾小弟若kah阮做伙去，阮to̍h beh落去，因為soah尾小弟若無kah阮做伙去，阮一定bē tàng見hitê人ê面。』
44:27 你ê奴僕—我ê老父，kā阮講：『Lín知我ê bó͘ kā我生兩 个kiáⁿ。
44:28 一个離開我出去，我講伊一定是hō͘野獸拆碎，到taⁿ我iáu無koh看tio̍h伊。
44:29 Τaⁿ lín koh kā chitê chhōa去，離開我。伊若tú tio̍h陷害，to̍h是lín hō͘我白頭毛悽慘落陰府。』
44:30 「阮老父ê性命kah chitê gín-á ê性命相連，taⁿ我tńg去你ê奴僕我ê老父hia，若gín-á無kah阮同在，
44:31 阮ê老父看無gín-á，伊to̍h一定ē死。這to̍h是阮hō͘你ê奴僕—阮ê老父，白頭毛悽慘落陰府。
44:32 因為你ê奴僕bat對我ê老父擔保chitê gín-á，講：『我若無chhōa伊tńg來交你，我願tī老父ê面前一生擔當罪。』
44:33 Taⁿ求你容允你ê奴僕留落來，替chitê gín-á做我ê主ê奴僕，hō͘ gín-á kah伊hiahê阿兄做伙tńg去。
44:34 若gín-á無kah我做伙去，阮ná ē tàng tńg去見阮ê老父？恐驚阮會看tio̍h阮老父所beh tú ·tio̍h ê災禍。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。