創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
43:1 約瑟ê眾兄弟Chhōa便雅憫來到埃及
Hit所在ê飢荒真嚴重。
43:2 In tùi埃及帶tńg來ê五穀已經食了，in老父kā in講：「Lín koh去kā咱糴淡薄á米糧tńg來。」
43:3 偤大應伊講：「Hitê人迫切吩咐阮講：『Lín小弟若無kah lín做伙來，lín to̍hbe7 tàng見我ê面。』
43:4 你若差阮小弟kah阮做伙去，阮to̍h落去，kā你糴米糧。
43:5 你若m̄差伊去，阮to̍h m̄落去，因為hitê人kā阮講：『Lín小弟若無kah lín做伙來，lín to̍hbe7 tàng見我ê面。』」
43:6 以色列講：「Lín án怎beh ánne害我，ná ē kā hitê人講lín iáu有小弟？」
43:7 In應講：「Hitê人致意問阮kah阮親族ê tāichì，講：『Lín老父iáu tī ·leh無？Lín iáu有兄弟無？』阮照伊所問ê kā伊講，阮ná ē知伊ē講：Tio̍h chhōa lín小弟落來？」
43:8 偤大koh kā伊ê老父以色列講：「你差gín-á kah我去，阮to̍h出發去，thang hō͘阮kah你，以及阮ê gín-á得tio̍h活，免死。
43:9 我kā伊擔保，你thang對我討；我若無chhōa伊tńg來khiā tī你ê面前，我願一生擔當chitê罪。
43:10 咱若m̄是有延chhiân，已經第二pái tńg來à。」
43:11 In老父以色列對in講：「若是ánne，lín to̍htioh8 ánne做：Tio̍h取chit所在siōng好ê農產物—乳香淡薄，蜂蜜淡薄，以及芳料、沒藥、榧子、杏仁，lóng收tī器具內，帶去送hitê人。
43:12 Lín koh tio̍h帶銀重倍，mā tio̍h kā lín布袋口伊還lín ê銀，帶倒tńg去hō͘伊；hitê kiámchhái是失錯。
43:13 Lín mā chhōa lín小弟出發，koh去見hitê人。
43:14 總是，願全能上帝hō͘ lín tī hitê人ê面前得tio̍h憐憫，kā lín hitê兄弟kah便雅憫交還lín。我若一定tio̍h失落我ê kiáⁿ，mā tio̍h hō͘伊失落to̍h是。」
43:15 然後in to̍h帶hiahê禮物，mā帶銀重倍，koh chhōa便雅憫，出發落去埃及，來到約瑟ê面前。
43:16 約瑟看tio̍h便雅憫kah in做伙來，to̍h對管家ê講：「Chhōa chiahê人去厝內，thâi chengseⁿ，準備宴席，因為中晝我beh kah chiahê人做伙食飯。」
43:17 Hitê人to̍h照約瑟ê話去行，chhōa in hiahê人入去約瑟ê厝。
43:18 Hiahê人因為hō͘伊chhōa到約瑟ê厝，就驚惶，講：「Chhōa咱到chia，一定是因為頭一pái還咱ê銀tī布袋á內，chitmá beh chhōe咱ê孔縫，下手害咱，強強掠咱做奴僕，搶咱ê驢á。」
43:19 Into̍h óa近約瑟ê管家，tī厝門口kah伊講話，
43:20 講：「我ê主ah，阮頭一pái落來，實在是beh糴米糧。
43:21 後來，到歇暝ê所在，開阮ê布袋，想bē到阮ta̍k人ê銀足數猶原tī ta̍k人ê布袋口，taⁿ阮有koh帶來。
43:22 阮另外有koh帶銀beh來糴米糧。阮m̄知啥人kā阮ê銀hē tī阮ê布袋內。」
43:23 管家講：「做lín安心，m̄免驚，是lín ê上帝kah lín老父ê上帝，賞賜hō͘ lín財寶tī lín ê布袋內，lín ê銀我已經收了。」伊to̍hchhoa7西緬出來hō͘ in。
43:24 Hitê人to̍h chhōa hiahê人入去約瑟ê厝，phâng水hō͘ in，in to̍h洗腳，koh the̍h草料飼in ê驢á。
43:25 In就準備hiahê禮物，thèng候約瑟中晝tńg來，因為in聽tio̍h beh tī hia食。
43:26 約瑟tńg來到厝，in to̍hka7所帶來ê禮物the̍h入去厝內送hō͘伊，koh仆tī地裡kā伊拜。
43:27 約瑟kā in請安，koh講：「Lín ê老父，to̍h是lín所講hitê老人，有平安無？伊kám iáu tī ·leh？」
43:28 In應講：「你ê奴僕，阮ê老父有平安，伊iáu tī ·leh。」In就àⁿ頭kā伊拜。
43:29 約瑟gia̍h頭看tio̍h伊同母ê小弟便雅憫，to̍h講：「你kā我講ê soah尾小弟，kám是chitê？」Koh講：「細kiáⁿ，願上帝施恩hō͘你！」
43:30 約瑟疼小弟ê情大激動，想beh趕緊chhōe所在thang啼哭，to̍h入去伊ê房間啼哭。
43:31 後來，洗面了出來，勉強忍teh，to̍h吩咐開桌。
43:32 Into̍h為約瑟另外排一塊桌，為hiahê人koh排一桌，mā為kah約瑟做伙食ê埃及人另外排一桌，因為埃及人bē tàng kah希伯來人做伙食，這是埃及人所討厭ê。
43:33 Hiahê人坐tī伊ê面前，大細照in年歲ê次序；hiahê人大家lóng tio̍h驚kah gāng去。
43:34 約瑟kā伊面前ê食物分hō͘ in；獨獨便雅憫所得tio̍h ê比別人五倍chē。In就lim酒，kah約瑟做伙宴樂。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。