創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
42:1 約瑟ê兄弟到埃及買糧食
雅各看tio̍h埃及有五穀，to̍h kā伊hiahê kiáⁿ講：「Lín án怎teh相看？」
42:2 Koh講：「我聽tio̍h埃及有五穀，lín thang落去hia，為咱糴淡薄，hō͘咱thang度生活，免死。」
42:3 就ánne，約瑟十個阿兄lóng落去埃及，去糴米糧。
42:4 總是，約瑟ê小弟便雅憫，雅各無差伊kah in阿兄做伙去，因為伊講：「恐驚伊ētú tio̍h傷害。」
42:5 來糴米糧ê人中間，以色列hiahê kiáⁿ mā有來，因為迦南地mā有飢荒。
42:6 當時治理埃及地ê是約瑟，糶米糧hō͘ hit所在ê眾人ê mā是伊。約瑟hiahê阿兄來，仆落地kā伊拜。
42:7 約瑟看tio̍h伊hiahê阿兄，會認得；伊假做生份人，對in講嚴厲ê話，問in講：「Lín tùi tó位來？」In講：「Tùi迦南地來糴米糧。」
42:8 約瑟會認得in阿兄，m̄ koh，in bē認得伊。
42:9 約瑟ē記得以前所夢見關係in ê hiahê夢，to̍h對in講：「Lín是偵探，beh來探聽chit所在ê虛實。」
42:10 In對伊講：「阮ê主，m̄是，你ê奴僕來beh糴米糧。
42:11 阮lóng是一个人ê kiáⁿ，阮是老實人，你ê奴僕m̄是偵探。」
42:12 約瑟kā in講：「M̄是ánne。Lín來是beh探聽chit所在ê虛實。」
42:13 In講：「你ê奴僕十二個兄弟，是迦南地一个人ê kiáⁿ；siōng細漢ê，現今tī阮老父hia，有一个已經死去à。」
42:14 約瑟kā in講：「我tú-á講lín是偵探，chitê話實在無m̄ tio̍h。
42:15 我kí法老ê性命來chiùchōa，若lín soah尾ê小弟無來到chia，lín bē tàng出chit所在；我beh用ánne來試驗lín ê虛實。
42:16 Lín Tio̍h差lín中間一个人去chhōa lín ê小弟來。Lín chiahê lóng tio̍h關tī chia，thang證明lín ê話，看lín有誠實á無；若無，我kí法老ê性命來chiùchōa，lín一定是偵探。」
42:17 就ánne，約瑟kā in lóng關tī監裡三工。
42:18 到第三日，約瑟對in講：「我敬畏上帝，lín tio̍h照我ê話去行，to̍h ē活。
42:19 Lín若果然是老實人，lín兄弟中tio̍h留一个縛tī監內，總是，lín thang帶米糧tńg去，thang救lín厝內ê飢荒。
42:20 Kā lín soah尾小弟chhōa來我chia，ánne lín ê話to̍h有憑據，lín mā m̄免死。」In就照ánne去行。
42:21 In做伙講：「咱對咱ê小弟實在有罪。伊哀求咱ê時，咱有看tio̍h伊心內ê艱苦，mā m̄肯聽伊ê話；所以，chit場苦難chiah ē臨到咱。」
42:22 流便應in講：「我kám m̄是有對lín講，m̄ thang害hitê gín-á來取罪？M̄ koh，lín m̄聽。所以，流伊ê血ê罪，chitmá teh對咱chiahê討。」
42:23 In m̄知約瑟聽有in teh講啥，因為tī in中間有用翻譯官。
42:24 約瑟oa̍t-tńg身流目屎，koh oa̍t tńg來kah in講話。to̍h tī in中間取西緬出來，tī in ê面前kā伊縛teh。
42:25 約瑟ê眾兄哥倒Τńg去迦南
約瑟吩咐人kā五穀入tī in ê器具到滿滿，mā kā in ta̍k人ê銀hē tī in ê布袋內，來還in，koh準備路裡ê食物hō͘ in，人to̍h照ánne來kā in準備。
42:26 Into̍h kā五穀hō͘ in ê驢á載，to̍h離開hia去。
42:27 到歇暝ê所在，in中間有一个人tháu開伊ê布袋，beh the̍h hō͘驢食，chiah看tio̍h伊ê銀猶原tī ·leh，hē tī布袋口。
42:28 伊to̍hka7伊ê兄弟講：「我ê銀還倒tńg來à！你看，猶原tī我ê布袋內。」In就驚kah心臟強beh定去，phi̍h-phi̍h chhoah，做伙講：「上帝ánne款待咱，是啥物意思？」
42:29 In tńg到迦南地，到in老父雅各hia，kā所tú ·tio̍h ê tāichì lóng kā伊講：
42:30 「Hitê人，to̍h是hit所在ê主，對阮講真嚴厲ê話，kā阮掠做是hit所在ê偵探。
42:31 阮kā伊講：『阮是老實人，阮m̄是偵探。
42:32 阮是十二個兄弟，是阮老父ê kiáⁿ；有一个死去，siōng細漢ê現今kah阮老父tī迦南地。』
42:33 Hitê人，to̍h是hit所在ê主，kā阮講：『若ài hō͘我知lín是老實人，lín兄弟中tio̍h留一个tī我chia，lín chiahê thang帶五穀tńg去，救lín厝內ê飢荒。
42:34 Chhōa lín soah尾ê小弟來我chia，我to̍h知lín m̄是偵探，是老實人；ánne我to̍hē kā lín ê兄弟交hō͘ lín，lín mā thang tī chit所在買賣。』」
42:35 後來，in piàⁿ in ê布袋，想bē到in ta̍k人ê銀包lóng tī in ê布袋內；in kah in老父看tio̍h銀包to̍h lóng起驚惶。
42:36 In ê老父雅各kā in講：「Lín hō͘我失落我ê kiáⁿ。約瑟死去，西緬mā死去，taⁿ lín koh beh chhōa便雅憫去。Chiahê tāichì lóng是害tio̍h我。」
42:37 流便kā伊ê老父講：「我若無chhōa伊tńg來交你，你thangthâi我兩 个kiáⁿ；做你thang kā伊交帶我，我一定chhōa伊tńg來交你。」
42:38 雅各講：「我ê kiáⁿ我無beh hō͘伊kah lín去，伊ê阿兄已經死去，只有chhun伊；伊若tī lín所行ê路裡tú tio̍h陷害，he就是lín hō͘我白頭毛悽慘落陰府。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。