尼希米記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
9:1 民眾認罪
Chit月二四，以色列人聚集禁食，穿麻衫，sám火灰。
9:2 以色列ê kiáⁿ孫to̍h kah所有ê外邦人隔開，khiā-teh承認kakī ê罪惡kah in祖先ê罪過。
9:3 In khiā tī kakī ê所在，用hit日四分之一ê時間讀上主—in ê上帝律法ê冊，koh用四分之一ê時間認罪，敬拜上主—in ê上帝。
9:4 耶書亞、巴尼、甲篾、示巴尼、Bun-nî、示利比、巴尼kah Ke-ná-nî，lóng khiā tī利未人ê台頂，大聲求叫上主—in ê上帝。
9:5 利未人耶書亞、甲篾、巴尼、Ha-siap-niah、示利比、Ho͘-te-iah、示巴尼、Pe-tha-hiah，講：「Lín tio̍h khiā起來oló上主—lín ê上帝，tùi永遠到永遠。上主ah，祢榮光ê名是應該oló ê，贏過一切ê稱呼kah oló。」
9:6 認罪ê祈禱
續落來，以色列人ánne祈禱：上主ah，獨獨祢是上主！祢創造天kah chiahê天ê天，kah天頂ê萬軍，地kah地chiūⁿê萬物，海kah海中ê萬物，這一切lóng是祢所保存ê。天軍mā敬拜祢。
9:7 上主ah，祢是上帝，bat揀選亞伯蘭，chhōa伊出迦勒底ê吾珥，賞賜伊ê名叫做亞伯拉罕。
9:8 祢看伊ê心tī祢ê面前盡忠，to̍h kah伊立約，應允kā迦南人、赫人、亞摩利人、比利洗人、耶布斯人、革迦撒人ê地hō͘伊ê kiáⁿ孫，koh有應驗祢ê話，因為祢是公義ê。
9:9 祢有看tio̍h阮ê祖先tī埃及所受ê困苦，聽in tī紅海邊ê哀求，
9:10 to̍h行神跡奇事，責罰法老kah伊ê人臣，以及伊國內ê眾人。因為祢知in驕傲款待阮ê祖先，祢to̍h為kakī 得tio̍h名聲，kah今á日相siâng。
9:11 祢tī in ê面前kā海分開，hō͘ in tùi海中ná親像行乾地過去，祢kā jiok in ê人hiat tī深海，ná親像hiat石頭tī大水中；
9:12 祢又koh tī日時用雲柱引chhōa in，暗時祢用火柱kā in所行ê路照光。
9:13 祢mā降臨tī西奈山，tùi天裡kah in講話，賞賜hō͘ in正直ê法度、真實ê法度、好ê律例kah誡命，
9:14 koh hō͘ in知祢安息ê聖日，mā託祢ê奴僕摩西用誡命、律例、法度kā in命令。
9:15 為tio̍h in腹肚iau，to̍h tùi天賞賜米糧；為tio̍h in嘴乾，to̍h tùi石磐出水，koh命令in去承接祢所chiùchōa beh hō͘ in ê地。
9:16 總是，in kah阮ê祖先做tāichì驕傲，硬in ê頷頸，無遵thàn祢ê誡命；
9:17 m̄肯順服，mā bē記得祢tī in中間所行ê奇事，竟然硬in ê頷頸，tī悖逆中kakī 設立首領，beh oa̍t tńg去in做奴隸ê地。總是，祢是歡喜赦免人，有恩典、憐憫，無快快受氣，有滿滿慈愛ê上帝，祢無kā in放sak。
9:18 In雖然鑄（tù）一隻牛á，koh講：「這是bat chhōa你出埃及ê上帝」，ánne大大激祢受氣；
9:19 祢iáu koh大施憐憫，無kā in放sak tī曠野。日時，雲柱無離開in，chhōa in行路；暗時，火柱mā無離開in，kā in照光tī in所tio̍h行ê路。
9:20 祢mā賞賜祢美好ê聖神來教示in，祢ê嗎哪猶原hō͘ in食無soah，為tio̍h in嘴乾，祢賞賜hō͘ in水。
9:21 Tī曠野四十年，祢養飼in，in to̍h無欠缺半項，in ê衫無破，in ê腳無phòng-phā。
9:22 祢kā列邦kah hiahê人民hō͘ in，分派in tī ta̍k角頭，in to̍h得tio̍h西宏ê地、希實本王ê地kah巴珊王噩ê地。
9:23 祢加添in ê kiáⁿ孫，親像天星ê chē；chhōa in到hitê地，to̍h是祢kā in ê祖先講in beh入去承接ê地。
9:24 Án-ne，in ê kiáⁿ孫入去承接hitê地，祢tī in ê面前制壓tòa tī hit所在ê人民，to̍h是迦南人，kā in kah in ê君王以及hit所在ê人民，lóng交tī in ê手，hō͘ in chhut-chāi kakī 意思來款待in。
9:25 In征服堅固ê城，肥ê土地，得tio̍h充滿ta̍k種好物ê厝宅，開便便ê水井，葡萄園kah橄欖園ê果子樹真chē。In得tio̍h食飽，身軀肥，因為祢ê大恩，in to̍h心內快樂。
9:26 總是，in m̄順服，竟然悖逆祢，kā祢ê律法hiat tī尻脊後，祢ê先知勸解in，beh hō͘ in歸向祢，in to̍hka7先知thâi死，大大激祢受氣。
9:27 所以，祢kā in交hō͘對敵ê手，受in ê苦毒。In tú tio̍h苦難ê時就哀求祢，祢to̍h tùi天àⁿ落聽，照祢ê大憐憫hō͘ in有拯救ê人，救in脫離對敵ê手。
9:28 總是，in得tio̍h平安了後，koh tī祢ê面前行pháiⁿ，所以，祢放sak in tī對敵ê手，hō͘對敵kā in管轄。In oa̍t倒tńg來哀求祢ê時，祢猶原tùi天àⁿ落聽，tiāⁿ-tiāⁿ 照祢ê憐憫kā in拯救。
9:29 koh勸解in，ài beh引chhōa in歸向祢ê律法。總是，in做tāichì驕傲，m̄遵thàn祢ê誡命，違犯祢hiahê法度，(人照ánne行，想beh得tio̍h活ê，) oa̍t-tńg肩胛頭，硬in ê頷頸m̄肯遵thàn。
9:30 總是，祢寬容in真chē年，koh用祢ê聖神託祢hiahê先知，來對in做見證，in猶原m̄遵thàn，所以，祢kā in交tī列國ê人民ê手。
9:31 總是，祢有大憐憫，無kā in全部消滅，mā無放sak in；因為祢是有恩典koh有憐憫ê上帝。
9:32 Taⁿ阮ê上帝ah，祢是至大、有權能ê、thang驚畏、守約、施慈愛ê上帝。阮ê君王、首領、祭司、先知、祖先kah祢ê子民，tùi亞述列王ê時到今á日所tú tio̍h一切ê苦難，求祢m̄ thang掠做是小khóa tāichì。
9:33 總是，阮所tú ·tio̍h ê lóng是祢ê公義，因為祢所做ê是真實，阮所行ê是pháiⁿ。
9:34 阮ê君王、首領、祭司kah祖先，lóng無遵守祢ê律法，m̄遵thàn祢ê誡命kah祢ê見證，to̍h是祢對in所見證ê話。
9:35 In tī in ê本國，tī祢賞賜hō͘ in大福氣kah祢tī in面前所賞賜闊大koh肥koh súi ê地，in無服事祢，mā無oa̍t-tńg身來離開in ê pháiⁿ行為。
9:36 阮今á日做奴僕，祢所賞賜hō͘阮祖先ê地，thang食它出產ê果子kah好ê物，你看，阮tī chitê地做人ê奴僕！
9:37 Chitê地出真chē物歸tī列王，to̍h是祢因為阮ê罪，祢所設立來kā阮管轄ê王，in chhut-chāi kakī 意思管轄阮ê身軀kah阮ê chengseⁿ，阮tú tio̍h大患難。
9:38 民眾簽約
因為這一切ê tāichì，阮立確實ê約，kā它寫明。阮ê首領、利未人kah祭司lóng蓋印。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。