尼希米記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
5:1 Nî-hí-miah Chhù-lí Lân-tê
Jîn-bîn kah in ê bó͘ tōa-siaⁿ háu, hiâm in ê hiaⁿ-tī Iô-tah lâng.
5:2 Ū lâng kóng, " Goán kah kiáⁿ-jî lâng-gia̍h chē, tio̍h khì siat-hoat ngó͘-kok lâi chia̍h, thang oa̍h lo̍h-.khì. "
5:3 Ū ê lâng kóng, " Ūi tio̍h ki-hng, goán kā goán ê chhân-hn̂g, phû-tô hn̂g kah chhù-the̍h the̍h-khì tián-tǹg hō͘ lâng, lâi tit tio̍h ngó͘-kok. "
5:4 Ū ê lâng kóng, " Goán í-keng kā chhân kah phû-tô hn̂g the̍h-khì chioh gîn lâi la̍p ông ê sòe.
5:5 Goán ê jio̍k-thé kah goán ê hiaⁿ-tī ê jio̍k-thé sio-siâng, goán ê kiáⁿ-jî kah in ê kiáⁿ-jî sio-siâng. Taⁿ goán kā goán ê kiáⁿ-jî hō͘ lâng chò lô͘-po̍k, lú-pī, goán ê chabó͘ kiáⁿ ū ê í-keng chò lú-pī, goán mā bô hoat-tit, in-ūi goán ê chhân-hn̂g kah phû-tô hn̂g í-keng kui tī pa̍t lâng. "
5:6 Góa thiaⁿ tio̍h in ê tōa-siaⁿ hoah kah in ê ōe, chiū chin siū-khì.
5:7 Góa sim-lāi siūⁿ, chiū tōa chek-pī hiahê kùi-cho̍k kah koaⁿ-tiúⁿ, kā in kóng, " Lín ta̍k lâng tùi hiaⁿ-tī the̍h lī-sek. " Chiū ánne, góa chio-chi̍p tāi-hōe lâi kā in chek-pī.
5:8 Góa kā in kóng, " Goán chīn-liōng ló͘-le̍k lâi sio̍k lán ê hiaⁿ-tī Iô-tah lâng, to̍h-sī í-keng bē hō͘ ī-pang lâng ê Iô-tah lâng, lín kèng-jiân beh bē lín ê hiaⁿ-tī? Á-sī in ē siū bē hō͘ lán? " In tiām-tiām bô ōe thang ìn.
5:9 Góa koh kóng, " Lín só͘ chò ê tāichì m̄-hó, in-ūi lán ê tùi-te̍k, to̍h-sī ī-pang lâng ê húi-pòng, lín kám m̄ kèng-ùi lán ê Siōng-tè lâi kiâⁿ?
5:10 Góa kah góa ê hiaⁿ-tī, góa ê lô͘-po̍k, mā kā chîⁿ-gîn, ngó͘-kok chioh hō͘ jîn-bîn; taⁿ góa khǹg lín, lán tāi-ke tio̍h bián lī-sek.
5:11 Taⁿ góa khǹg lín kin-á-ji̍t kā in ê chhân, phû-tô hn̂g, kaⁿ-ná hn̂g, chhù-the̍h kah lín só͘ tùi in thiu ê chîⁿ-gîn, ngó͘-kok, chiú kah iû, múi pah hūn ê chi̍t hūn lóng tio̍h hêng i. "
5:12 In kóng, " Goán ē hêng, bô koh tùi in thó, beh chiàu lí ê ōe kiâⁿ. " Góa chiū kiò chè-si lâi kah in chiùchōa, tio̍h chiàu chit-ê ōe khì kiâⁿ.
5:13 Góa mā pōaⁿ khui góa ê saⁿ-á phè, kóng, " Kiàn-nā bô chiâⁿ chit-ê ōe ê, goān Siōng-tè chiàu ánne kā i pōaⁿ khui lâi lī-khui i ê ke kah i ê chit-gia̍p, to̍h-sī goān I chiàu ánne pōaⁿ kàu khang-khang. " Hōe-chiòng lóng kóng, " A-men! " Koh oló Siōng-chú. Jîn-bîn chiū chiàu chit-ê ōe lâi kiâⁿ.
5:14 Nî-hí-miah Kong-chèng Bû-su
Tùi góa siū siat-li̍p tī Iô-tah tē chò in ê chóng-tok, to̍h-sī tùi Al-ta-siá-su-ta ông jī-cha̍p nî kàu saⁿ-cha̍p jī nî, kiōng cha̍p-jī nî ê tiong-kan, góa kah góa ê hiaⁿ-tī lóng bô chia̍h chóng-tok ê sin-hōng.
5:15 Chóng-.sī, góa chêng-jīm ê chóng-tok hō͘ jîn-bîn hū-tām chin tāng, the̍h jîn-bîn ê ngó͘-kok, chiú kah gîn sì-cha̍p si-khel, liân in ê lô͘-po̍k mā teh koán-hat jîn-bîn; to̍k-to̍k góa in-ūi kèng-ùi Siōng-tè, bô ánne kiâⁿ.
5:16 Jî-chhiáⁿ góa choan-sim khí siâⁿ chhiûⁿ, pēng bô bé chhân-tē; góa ê lô͘-po̍k mā lóng chū-chi̍p tī hia chò-kang.
5:17 Tû-khì hiahê tùi sì-kho͘-ûi ê gōa-pang tiong lâi chhōe goán ê lâng í-gōa, ū Iô-tah lâng kah koaⁿ-tiúⁿ chi̍t-pah gō͘-cha̍p lâng, tī góa ê toh chò-hóe chia̍h.
5:18 Ta̍k ji̍t chún-pī chi̍t chiah gû-káng, la̍k chiah pûi ê mî-iûⁿ, koh chún-pī kúi-nā chiah ke. Múi cha̍p kang chi̍t pái, chún-pī chin chē ta̍k chióng ê chiú. Sûi-jiân ánne, góa mā bô the̍h chóng-tok ê sin-hōng, in-ūi jîn-bîn ho̍k-ia̍h chin sin-khó͘.
5:19 Góa ê Siōng-tè ah, kiû Lí kì-liām góa ūi tio̍h chiahê jîn-bîn só͘ chò it-chhè ê tāichì, lâi kā góa sù-hok.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。