以斯拉記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
10 Kah外邦離婚ê辦法
以斯拉祈禱、認罪、啼哭，仆tī上帝殿前ê時，有tùi以色列中間來ê男女gín-á聚集tī伊hia，成做大會，人民哭kah真悽慘。
2 屬以攔ê kiáⁿ孫，耶悅 ê kiáⁿ示迦尼，應以斯拉講：「阮tī chitê所在ê人民中間娶外邦人ê chabó͘ kiáⁿ做bó͘，悖逆tio̍h咱ê上帝，總是，以色列人tī chitê tāichì頂面iáu koh有thang ǹg望。
3 Taⁿ tio̍h kah咱ê上帝立約，kā chiahê bó͘ kah in所生ê lóng hō͘ in出去，照我ê主kah hiahê因為上帝ê誡命phi̍h-phi̍h chhoah ê人所議定ê，照律法來行。
4 你起來，因為chitê tāichì是你所應該辦ê，阮會幫贊你，你tio̍h好膽來做。」
5 以斯拉to̍h起來，hō͘祭司hiahê頭人kah利未人，以及以色列人民chiùchōa，tio̍h照chitê話去行；in to̍hchiùchōa。
6 以斯拉to̍h tùi上帝ê殿前起來，入去以利亞實ê kiáⁿ約哈難ê厝，到hia無食餅，mā無lim水，因為伊為tio̍h受掠tńg來ê人所犯ê罪來悲傷。
7 In對偤大kah耶路撒冷受掠tńg來ê人宣布，叫in lóng來耶路撒冷聚集。
8 見若無遵thàn hiahê首領kah長老所議定，三日內無來ê，to̍h beh抄伊所有ê產業，beh kā伊tùi受掠tńg來ê人ê會革出去。
9 就ánne，偤大kah便雅憫群眾，三日內lóng聚集tī耶路撒冷。Hit日是九月二十，群眾lóng坐tī上帝殿ê頭前開闊ê所在；因為chitê tāichì，koh因為落大雨，就phi̍h-phi̍h chhoah。
10 以斯拉祭司起來，kā in講：「Lín有罪，lín娶外邦ê chabó͘ kiáⁿ做bó͘，加添以色列人ê罪。
11 Taⁿ tio̍h ǹg上主—lín祖先ê上帝認罪，行祂所歡喜ê，kakī 分別離開chiahê國ê人民kah外邦ê chabó͘ kiáⁿ。」
12 會眾lóng大聲應講：「照你所講關係阮ê，阮beh照ánne行，
13 總是，人民真chē，koh tú tio̍h大雨，阮bē tàng khiā tī外面，這mā m̄是一日、兩日ê tāichì，因為阮tī chitê tāichì頂面有大大犯罪；
14 taⁿ tio̍h為全會眾設立咱ê首領。見若咱ê城中娶外邦ê chabó͘ kiáⁿ ê，tio̍h照定tio̍h ê日期來，hitê城ê長老、士師tio̍h kah in做伙來，直到咱ê上帝為tio̍h chitê tāichì ê受氣收倒tńg去。」
15 獨獨亞撒黑ê kiáⁿ約拿單，Tek-bah ê kiáⁿ Ia-ha-che-iah反對chitê tāichì，koh有米書蘭kah利未人Sia-be-thài贊成in。
16 受掠tńg來ê人ánne行。以斯拉祭司kah族長幾nā个人，照in ê宗族，lóng照in ê名受派；tī十月初一，in做伙坐，來調查chitê tāichì。
17 到正月初一，見若娶外邦ê chabó͘ kiáⁿ ê chiah完成hitê tāichì。
18 娶外邦Cha-bó͘ kiáⁿ ê人
Tī祭司ê kiáⁿ孫中，查出娶外邦ê chabó͘ kiáⁿ ê，to̍h是約薩答ê kiáⁿ耶書亞ê家，kah伊ê兄弟瑪西雅、以利以謝、Ia-lip、基大利。
19 In就牽手結盟beh離in ê bó͘。因為in犯罪，to̍h獻羊群中一隻綿羊káng，來贖罪。
20 音麥ê kiáⁿ孫中，有哈拿尼kah西巴第雅。
21 哈琳ê kiáⁿ孫中，有瑪西雅、E-li-iah、示瑪雅、耶悅kah烏西雅。
22 巴施戶珥ê kiáⁿ孫中，有以利約乃、瑪西雅、以實瑪利、拿坦業、約薩拔kah以利亞撒。
23 利未人中，有約薩拔、示每、Ke-la-iah，Ke-la-iah to̍h是Ke-li-thah，koh有Pe-tha-hiah、偤大kah以利以謝。
24 唱歌ê人ê中間，有以利亞實。顧門ê人ê中間有沙龍、The-lêm kah烏利。
25 以色列人巴錄ê kiáⁿ孫中間，有La-miah、I-si-iah、瑪基雅、Mi-iá-mín、以利亞撒、瑪基雅kah比拿亞。
26 以攔ê kiáⁿ孫中，有瑪他尼、撒迦利亞、耶悅、Ap-tí、耶利末kah E-li-iah。
27 Chat-thó͘ ê kiáⁿ孫中間，有以利約乃、以利亞實、瑪他尼、耶利末、撒拔kah A-chi-chah。
28 Be-bái ê kiáⁿ孫中間，有約哈難、哈拿尼雅、Cha-bái kah亞勒。
29 巴尼ê kiáⁿ孫中間，有米書蘭、瑪鹿、亞大雅、Ia-siup、Sia-al kah耶利末。
30 巴哈摩押ê kiáⁿ孫中間，有At-ná、基拉、比拿亞、瑪西雅、瑪他尼、比撒列、賓內kah瑪拿西。
31 哈琳ê kiáⁿ孫中，有以利以謝、伊示雅、瑪基雅、示瑪雅、西緬、
32 便雅憫、瑪鹿kah Si-ma-liah。
33 哈順ê kiáⁿ孫中間，有Mat-te-nái、Mat-thah、撒拔、以利法列、E-le-mái、瑪拿西kah示每。
34 巴尼ê kiáⁿ孫中間，有瑪代、暗南、U-el、
35 比拿亞、Be-te-iah、Ke-lu-hi、
36 Oa-ni-ah、米利末、以利亞實、
37 瑪他尼、Mat-te-nái、Ia-a-su、
38 巴尼、賓內、示每、
39 示利米雅、拿單、亞大雅、
40 Mak-nat-bāi、Sia-sài、Sia-lái、
41 A-cha-liah、示利米雅、Si-ma-liah、
42 沙龍、亞瑪利雅kah約瑟。
43 尼波ê kiáⁿ孫中間，有耶利、瑪他提雅、撒拔、Che-bí-nah、Ia-tah、約珥kah比拿亞。
44 Chiahê人lóng娶外邦人ê chabó͘ kiáⁿ做bó͘，其中mā有人tùi chiahê chabó͘ kiáⁿ生kiáⁿ兒。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。