以斯拉記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
8:1 Tùi流亡Tńg來ê人
亞達設西王坐位ê時，kah我tùi巴比倫tńg來ê人，in ê族長kah in ê世系，記tī下面：
8:2 屬非尼哈ê kiáⁿ孫有革順，屬以他瑪ê kiáⁿ孫有但以理，屬大衛ê kiáⁿ孫有哈突，
8:3 屬巴錄ê kiáⁿ孫，to̍h是示迦尼ê kiáⁿ孫，有撒迦利亞，kah伊做伙來ê，照世系來算，有chapo͘丁一百五十人。
8:4 屬巴哈摩押ê kiáⁿ孫有西拉希雅ê kiáⁿ以利約乃，kah伊做伙來ê，有chapo͘丁兩百人。
8:5 屬示迦尼ê kiáⁿ孫有雅哈悉ê kiáⁿ，kah伊做伙來ê，有chapo͘丁三百人。
8:6 屬A-tin ê kiáⁿ孫，有約拿單ê kiáⁿ以別，kah伊做伙來ê，有chapo͘丁五十人。
8:7 屬以攔ê kiáⁿ孫，有亞她利雅ê kiáⁿ耶書亞，kah伊做伙來ê，有chapo͘丁七十人。
8:8 屬示法提雅ê kiáⁿ孫，有米迦勒ê kiáⁿ西巴第雅，kah伊做伙來ê，有chapo͘丁八十人。
8:9 屬約押ê kiáⁿ孫，有耶悅ê kiáⁿ俄巴底亞，kah伊做伙來ê，有chapo͘丁兩百十八人。
8:10 屬示羅密ê kiáⁿ孫，有Io-si-phiah ê kiáⁿ，kah伊做伙來ê，有chapo͘丁一百六十人。
8:11 屬Be-bái ê kiáⁿ孫，有Be-bái ê kiáⁿ撒迦利亞，kah伊做伙來ê，有chapo͘丁二十八人。
8:12 屬A-chu-gat ê kiáⁿ孫，有Hak-ka-than ê kiáⁿ約哈難，kah伊做伙來ê，有chapo͘丁一百十人。
8:13 屬A-to-ni-kam ê kiáⁿ孫，to̍h是路尾ê，in ê名是以利法列、耶利、示瑪雅，kah in做伙來ê，有chapo͘丁六十人。
8:14 屬比革瓦伊ê kiáⁿ孫，有U-thài kah Chap-put，kah in做伙來ê，有chapo͘丁七十人。
8:15 以斯拉為聖殿呼召利未人
我招集chiahê人tī流入A-ha-oah ê河邊，阮tī hia tòa tī布棚三日。我查看人民kah祭司，看無利未人tī hia。
8:16 我差人召hiahê頭人，to̍h是以利以謝、A-li-el、示瑪雅、以利拿單、Ia-lip、以利拿單、拿單、撒迦利亞、米書蘭，koh召教員約雅立kah以利拿單。
8:17 我差in去Ka-se-húi-ngá ê所在，見hitê頭人易多，koh kā in講，in tī Ka-si-phi-ah ê所在tio̍h對易多kah伊ê兄弟尼提寧講啥物話，kah in為咱上帝ê殿chhōa差用ê人來。
8:18 得tio̍h咱ê上帝施恩ê手幫贊阮，in tī以色列ê干á孫，利未ê孫，抹利ê kiáⁿ孫中間，chhōa一个通達ê人來，koh有示利比kah伊hiahê kiáⁿ，kah伊ê兄弟，共十八人。
8:19 Koh有哈沙比雅kah伊做伙來ê，有米拉利ê kiáⁿ孫，耶書亞kah伊ê兄弟，kah in ê kiáⁿ，共二十人。
8:20 Koh chhōa尼提寧人來，to̍h是前大衛kah chiahê首領所派做利未人ê差用ê，共兩百二十個尼提寧，in ê名lóng有登記。
8:21 以斯拉Chhōa人民禁食祈禱
Hit時，阮tī A-ha-oah ê河邊宣布禁食，thang hō͘阮tī咱ê上帝ê面前kakī 謙卑，求祂hō͘阮kah阮ê gín-á，kah一切所有ê，lóng得tio̍h平坦ê路。
8:22 因為求王撥一隊步兵kah馬兵，幫贊阮tī路裡抵擋對敵，我掠做見笑；因為阮bat對王講：「阮ê上帝ê手會保護所有對祂祈求ê人；獨獨祂ê能力kah受氣攻擊所有棄sak祂ê人。」
8:23 所以，阮為tio̍h ánne禁食，求阮ê上帝，祂to̍h聽阮ê祈求。
8:24 為聖殿獻ê禮物
就ánne，我分派祭司ê頭人十二個，to̍h是示利比、哈沙比雅kah in ê兄弟十人。
8:25 我to̍h kā咱上帝殿ê禮物，to̍h是金銀kah hiahê器具，是王kah伊ê謀士，伊ê首領，kah tī hia ê以色列人民所獻ê，lóng秤（chhìn）來交in。
8:26 我to̍h秤來交tī in ê手，有銀六百他連得，銀器重一百他連得kah金一百他連得；
8:27 金碗二十塊，重一千達利克（註：重量kah價值(金á、 錢)ê單位, 等於4.32 公克），koh有金nà-nà ê好銅器兩塊，寶貴kah ná親像金。
8:28 我對in講：「Lín做聖歸上主，chiahê器具mā是聖，hiahê金銀是甘心獻hō͘上主—lín祖先ê上帝ê。
8:29 Lín tio̍h謹慎顧守，一直到lín tī耶路撒冷上主殿ê房內，tī祭司ê頭人kah利未人，以及以色列hiahê族長ê面前kā它秤。」
8:30 就ánne，祭司利未人收金銀kah器具，照in ê輕重，beh帶到耶路撒冷咱上帝ê殿。
8:31 Tńg來耶路撒冷
正月十二，阮離開A-ha-oah ê河邊，beh去耶路撒冷。咱ê上帝ê手保護阮，救阮脫離對敵kah埋伏tī路裡ê人ê手。
8:32 阮來到耶路撒冷，tī hia tòa三日。
8:33 到第四日，tī咱上帝ê殿，秤hiahê金銀kah器具，交tī祭司烏利亞ê kiáⁿ米利末ê手。Kah伊做伙來ê有非尼哈 ê kiáⁿ以利亞撒，koh kah in做伙來ê，有利未人耶書亞 ê kiáⁿ約薩拔，kah賓內ê kiáⁿ No-a-tiah。
8:34 一切照in ê數額，照in ê輕重交hō͘伊，當時mā記in ê輕重。
8:35 受掠ê人tùi受掠ê中間tńg來ê，獻燒祭hō͘以色列ê上帝，to̍h是為以色列人民獻牛káng十二隻，綿羊káng九十六隻，綿羊á七十七隻，koh獻山羊káng十二隻做贖罪ê祭。Chiahê lóng是做燒祭獻hō͘上主ê。
8:36 In kā王ê諭旨交hō͘王ê人臣kah tī河外hiahê總督，in to̍h幫贊人民kah上帝ê殿。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。