以斯拉記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 以斯拉來到耶路撒冷
Chiahê tāichì以後，tī波斯王亞達設西坐位ê時，有一个以斯拉，伊是西萊雅ê kiáⁿ，西萊雅是亞撒利雅ê kiáⁿ，亞撒利雅是希勒家ê kiáⁿ，
7:2 希勒家是沙龍ê kiáⁿ，沙龍是撒督ê kiáⁿ，撒督是亞希突ê kiáⁿ，
7:3 亞希突是亞瑪利雅ê kiáⁿ，亞瑪利雅是亞撒利雅ê kiáⁿ，亞撒利雅是米拉約ê kiáⁿ，
7:4 米拉約是西拉希雅ê kiáⁿ，西拉希雅是烏西ê kiáⁿ，烏西是布基ê kiáⁿ，
7:5 布基是亞比篩ê kiáⁿ，亞比篩是非尼哈ê kiáⁿ，非尼哈是以利亞撒ê kiáⁿ，以利亞撒是大祭司亞倫ê kiáⁿ。
7:6 Chitê以斯拉是tùi巴比倫來ê，通達上主—以色列ê上帝賞賜摩西ê律法，伊是敏捷ê經學教師。王准伊一切所求ê，是照上主—伊ê上帝ê手kā伊幫贊ê。
7:7 亞達設西王第七年，以色列人ê祭司kah利未人，唱歌ê、顧門ê kah尼提寧，各有幾nā个人來到耶路撒冷。
7:8 王第七年五月，以斯拉來到耶路撒冷。
7:9 正月初一，伊tùi巴比倫出發，五月初一to̍h到耶路撒冷，因為伊有上帝施恩ê手kā伊幫贊。
7:10 因為以斯拉已經決意beh講究上主ê律法來行，koh kā律例kah法度教示以色列人。
7:11 亞達設西皇帝hō͘以斯拉ê文件
以斯拉祭司是經學教師，是通達上主誡命ê話kah祂所賞賜以色列ê律例ê經學教師。亞達設西王賜伊諭旨，hitê文記tī下底：
7:12 列王ê王—亞達設西寄hō͘以斯拉祭司，伊是通達天頂上帝ê律法ê經學教師，koh是完全ê人，伊ánne講：
7:13 「Tòa tī我ê國內ê以色列人、祭司kah利未人，見若甘願上去耶路撒冷ê，我降旨hō͘ in kah你去。
7:14 你既然是王kah伊七个謀士所差ê，照你手內ê上帝ê律法去調查考察偤大kah耶路撒冷；
7:15 koh帶王kah伊ê謀士所歡喜獻ê金銀，beh hō͘以色列ê上帝，to̍h是tòa tī耶路撒冷ê，
7:16 mā帶你tī巴比倫全省所得tio̍h ê金銀，kah人民、祭司所歡喜獻ê禮物，to̍h是in為tio̍h耶路撒冷in ê上帝ê殿所歡喜獻ê。
7:17 「所以，你tio̍h致意用chiahê金銀去買牛káng-á、綿羊káng、綿羊á kah in ê素祭，以及in ê灌奠，獻tī耶路撒冷lín ê上帝殿ê壇。
7:18 所chhun落來ê金銀，你kah你ê兄弟看做好ê，就ánne the̍h去用，lóng tio̍h照lín ê上帝ê旨意。
7:19 所交帶你做你ê上帝殿內ê路用ê器具，你tio̍h交tī耶路撒冷ê上帝ê面前。
7:20 Lín ê上帝ê殿若iáu有需要啥物，你所應該tio̍h用ê，你thang tùi王ê金庫the̍h去用。
7:21 「我—亞達設西王本身koh降詔hō͘河外所有管金庫ê官，講：『通達天頂上帝ê律法ê經學教師—以斯拉祭司，無論對lín討啥物，lín tio̍h致意照ánne行；
7:22 供給伊銀到一百他連得，麥到一百歌珥，酒到一百罷特，油到一百罷特，鹽無限額。
7:23 見若天頂ê上帝所命令ê，tio̍h為tio̍h天頂ê上帝ê殿斟酌來做。Ná ē-sái hō͘受氣臨到王kah王ê kiáⁿ ê國？
7:24 我koh命令lín，見若祭司、利未人、唱歌ê、顧門ê、尼提寧kah tī上帝ê殿做差用ê人，m̄ thang收in ê進貢、捐稅、錢糧。』
7:25 「以斯拉，照你ê上帝賞賜hō͘你ê智慧，設立士師kah審判官，來治理河外ê人民，to̍h是所有bat你ê上帝ê律法ê，若是hiahê m̄ bat ê，你tio̍h kā in教示。
7:26 見若無beh遵thàn你ê上帝ê律法kah王ê律法，to̍h tio̍h小心定伊ê罪，á是hō͘伊死，á是充軍，á是抄家，á是關監。」
7:27 以斯拉O-ló上主
「O-ló咱祖先ê上帝—上主，因為祂hē chitê意思tī王ê心，加添榮光tī耶路撒冷ê上帝ê殿，
7:28 koh hō͘我tī王kah伊ê參謀，以及王一切有權勢ê首領ê面前，得tio̍h恩典。上主—我ê上帝ê手幫贊我，我to̍h勇敢，聚集以色列hiahê頭人kah我做伙起來。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。