歷代志下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
30:1 準備過Pôaⁿ過節
希西家差人到以色列kah偤大全地，koh寫phoe hō͘以法連kah瑪拿西，ài in來耶路撒冷上主ê殿，守Pôaⁿ過節服事上主—以色列ê上帝。
30:2 因為王kah伊ê首領，以及tī耶路撒冷ê會眾，已經做伙議論決定，beh tī二月守Pôaⁿ過節。
30:3 Hit時，in bē tàng守節，因為kakī 清氣ê祭司iáu無夠額，人民mā無聚集來tī耶路撒冷。
30:4 王kah會眾lóng看chitê tāichì做好。
30:5 to̍h定tio̍h命令，宣布tī以色列全地，tùi別是巴到但，hō͘ in lóng來tī耶路撒冷守Pôaⁿ過節，服事上主—以色列ê上帝，因為人民平時無真chē人照所寫ê規例來遵守。
30:6 走文書ê帶王kah伊hiahê首領ê phoe，遍行以色列kah偤大地，照王ê命令，講：「以色列人，lín tio̍h koh歸向亞伯拉罕、以撒、以色列ê上帝—上主，祂to̍h ē歸向lín chiahê脫離亞述hiahê王ê手所chhun落來ê人民。
30:7 Lín m̄ thang親像lín ê祖先kah lín ê兄弟，in悖逆上主—in祖先ê上帝，致使祂hō͘ in tú tio̍h滅亡，親像lín所看tio̍h ê。
30:8 Taⁿ m̄ thang親像lín ê祖先ánne硬頷頸，tio̍h獻kakī hō͘上主，入去祂ê聖所，to̍h是祂永遠分別做聖ê，koh tio̍h服事上主—lín ê上帝，thang hō͘祂ê大受氣oa̍t-tńg離開lín。
30:9 因為lín若歸向上主，lín ê兄弟kah lín ê kiáⁿ兒to̍h ētī掠in ê人ê面前得tio̍h憐憫，thang koh tńg來chit所在，因為上主—lín ê上帝是慈悲koh憐憫ê。Lín若歸向祂，祂一定bē oa̍t祂ê面m̄看lín。」
30:10 走文書ê一城過一城，遍行以法連、瑪拿西到西布倫，m̄ koh，hiahê人kā in恥笑，kā in khau洗。
30:11 總是，亞設、瑪拿西、西布倫ê中間，mā有人kakī 謙卑，來到耶路撒冷。
30:12 上主mā感動偤大人，hō͘ in一心遵thàn王kah hiahê首領，照上主ê話所出ê命令。
30:13 過Pôaⁿ過節
二月，有真chē人聚集tī耶路撒冷，成做真大ê會，beh守除酵節。
30:14 In起來，全部除去耶路撒冷所有ê壇kah燒香ê壇，hiat tī汲淪溪。
30:15 二月十四，thâi Pôaⁿ過節ê羊á，祭司kah利未人kakī 感覺見笑，就清氣kakī ，帶燒祭來到上主ê殿。
30:16 照上帝ê奴僕摩西ê律法，照例ta̍k人khiā伊ê位，祭司kā in tùi利未人ê手接血來hiù。
30:17 會中有真chē人無清氣kakī ，所以，託利未人替所有無清氣ê人thâi Pôaⁿ過節ê羊á，hō͘ in tī上主ê面前成做清氣。
30:18 因為以法連、瑪拿西、以薩迦kah西布倫，有真chē人無清氣kakī ，總是，in mā食Pôaⁿ過節，無合所記載ê例。
30:19 因為希西家替in祈禱，講：「見若有絕對ê心來走chhōe上主，to̍h是上主in祖先ê上帝，雖然無照聖所清氣ê禮儀kakī 清氣，求至好ê上主mā kā in赦免。」
30:20 上主聽希西家ê祈禱，to̍h醫好人民。
30:21 Tòa tī耶路撒冷ê以色列人大大歡喜，守除酵節七工。利未人kah祭司日日oló上主，用響亮ê樂器oló上主。
30:22 Koh再過節
希西家安慰所有gâu服事上主ê利未人。就ánne，群眾食節筵七工，獻謝恩祭，koh tī上主—in祖先ê上帝ê面前認罪。
30:23 全會眾議論beh koh守節七工。就ánne，歡喜koh守節七工。
30:24 因為偤大王希西家送會眾牛káng一千隻，羊七千隻做祭物。眾首領mā送會眾牛káng一千隻，羊一萬隻，koh有真chē祭司kakī 清氣。
30:25 偤大會眾kah祭司利未人，以及hiahê tùi以色列來ê會眾，koh有hiahê tùi以色列地來ê出外人，kah tòa tī偤大ê出外人，lóng歡喜快樂。
30:26 就ánne，tī耶路撒冷大歡喜，因為tùi以色列王大衛ê kiáⁿ所羅門ê時，tī耶路撒冷m̄ bat有過ánne。
30:27 Hit時，祭司利未人起來，kā人民祝福。In ê聲有hō͘上主聽tio̍h，in ê祈禱透到祂tòa ê聖所，到tī天裡。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。