創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
40:1 Iô-sé-huh Ūi Kaⁿ-iú Kái-bāng
Chiahê tāichì í-āu, Ai-gi̍p ông ê chiú-chèng kah tû-pâng-tiúⁿ tek-chōe in ê chú — Ai-gi̍p ông.
40:2 Hôa-láu siū-khì i hit nn̄g-ê jîn-sîn, to̍h-sī chiú-chèng-tiúⁿ kah tû-pâng-tiúⁿ.
40:3 I kā in koaiⁿ tī sī-ōe-tiúⁿ hú-lāi ê kaⁿ, to̍h-sī Iô-sé-huh siū koaiⁿ ê só͘-chāi.
40:4 Sī-ōe-tiúⁿ kā in kau-tài Iô-sé-huh, i chiū sū-hāu in; in chiū tī kaⁿ lāi ū chò-hóe chi̍t tōaⁿ sî-kan.
40:5 Siū koaiⁿ tī kaⁿ lāi ê Ai-gi̍p ông ê chiú-chèng-tiúⁿ kah tû-pâng-tiúⁿ, nn̄g lâng kâng chi̍t mê kok bāng-kìⁿ chi̍t-ê bāng, lóng chiàu in kok chū bāng-.tio̍h ê ì-gī lâi kái-bāng.
40:6 Kàu thiⁿ-kng, Iô-sé-huh ji̍p-khì in hia, khòaⁿ tio̍h in ū iu-būn ê khoán-sit.
40:7 Iô-sé-huh chiū mn̄g Hôa-láu nn̄g-ê jîn-sîn, to̍h-sī kah i pêⁿ-pêⁿ koaiⁿ tī chú-lâng hú-lāi ê, kóng, " Kin-á-ji̍t lín án-chóaⁿ bīn tài iu-iông? "
40:8 In kā Iô-sé-huh kóng, " Goán ta̍k lâng bāng-kìⁿ chi̍t-ê bāng, bô lâng thang kái-bāng. " Iô-sé-huh kā in kóng, " Kái-bāng kám m̄-sī chāi tī Siōng-tè? Chhiáⁿ lín kā góa kóng. "
40:9 Chiú-chèng chiū tùi Iô-sé-huh soat-bêng i ê bāng, kóng, " Góa tī bāng tiong khòaⁿ tio̍h ū chi̍t châng phû-tô chhiū tī góa ê bīn-chêng,
40:10 chhiū téng ū saⁿ ki chhiū-ki teh puh íⁿ, khui hoe, jiân-āu kiat chi̍t pha chi̍t pha sêng-se̍k ê phû-tô.
40:11 Hôa-láu ê poe tī góa ê chhiú lāi, góa chiū the̍h phû-tô, tī Hôa-láu ê poe lāi ni̍h, jiân-āu kā poe phâng kau Hôa-láu ê chhiú. "
40:12 Iô-sé-huh kā i kóng, " Lí ê bāng sī ánne kái, saⁿ ki to̍h-sī saⁿ ji̍t,
40:13 koh saⁿ ji̍t, Hôa-láu ē kí-khí lí ê thâu, hôe-ho̍k lí ê koaⁿ-chit. Hôa-láu ê chiú-poe ē iû-goân hē tī lí ê chhiú lāi, chhin-chhiūⁿ chá-chêng lí chò i ê chiú-chèng.
40:14 Lí nā tek-chì ê sî, tio̍h ē kì-tit góa, si un hō͘ góa, tī Hôa-láu ê bīn-chêng thè góa kóng chi̍t-siaⁿ, kiù góa chhut chit-ê kaⁿ.
40:15 Góa si̍t-chāi sī tùi Hi-bú-lâi lâng ê tē hông bē lâi chia ê, góa tī chia mā bô chò-chhut siáⁿ-mi̍h m̄ tio̍h ê tāichì, thang hō͘ in kā góa koaiⁿ lo̍h kaⁿ. "
40:16 Tû-pâng-tiúⁿ khòaⁿ tio̍h bāng kái liáu hó, chiū kā Iô-sé-huh kóng, " Góa mā tī góa ê bāng tiong khòaⁿ-kìⁿ, tī góa ê thâu-khak téng ū saⁿ-kheng piak ê piáⁿ,
40:17 téng-bīn hit kheng ū té Hôa-láu só͘ chia̍h ta̍k chióng piak ê mi̍h, ū chiáu lâi tok góa thâu-khak téng kheng lāi ê mi̍h. "
40:18 Iô-sé-huh ìn i kóng, " Lí ê bāng sī ánne kái, saⁿ-kheng sī saⁿ ji̍t,
40:19 koh saⁿ ji̍t, Hôa-láu ē hō͘ lí ê thâu-khak lī-khui lí, kā lí tiàu tī chhâ téng, ē ū poe-chiáu lâi tok lí seng-khu ê bah. "
40:20 Kàu tē-saⁿ ji̍t, sī Hôa-láu ê seⁿ-ji̍t, i ūi chèng jîn-sîn pâi-siat iàn-se̍k, tī chiahê jîn-sîn ê bīn-chêng, thâi-kí chiú-chèng-tiúⁿ kah tû-pâng-tiúⁿ.
40:21 I hō͘ chiú-chèng-tiúⁿ hôe-ho̍k koaⁿ-chit, i iû-goân ē-tàng phâng poe-lâi tī Hôa-láu ê chhiú;
40:22 chóng-.sī, i kā tû-pâng-tiúⁿ tiàu khí-.lâi, tútú chiàu Iô-sé-huh só͘ kā in kái-bāng ê.
40:23 M̄ koh, chiú-chèng-tiúⁿ bô tài-liām tio̍h Iô-sé-huh, kèng-jiân kā i bē kì-.tit.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。