歷代志下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
26:1 偤大王烏西雅
(王下14：21-22；15：1-7)
偤大眾人設立烏西雅續接伊ê老父亞瑪謝做王，hit時伊十六歲。
26:2 亞瑪謝王kah伊ê祖先同睏了後，烏西雅起以諾城，hō͘它猶原歸偤大管轄。
26:3 伊坐位ê時十六歲，tī耶路撒冷做王共五十二年。伊ê老母ê名叫做E-kho-li-ah，是耶路撒冷人。
26:4 烏西雅行上主所看做好ê tāichì，照伊ê老父亞瑪謝所行ê一切。
26:5 當通達上主啟示ê撒迦利亞tī ·leh ê日，烏西雅定tio̍h意思beh 走chhōe上帝；伊走chhōe上主ê時，上帝to̍h hō͘伊興通。
26:6 烏西雅出去攻擊腓利士人，拆毀迦特ê城牆，Iap-neh ê城牆kah亞實突ê城牆；tī腓利士人ê中間，tī亞實突境內，起幾nā个城。
26:7 上帝幫贊伊攻擊腓利士人kah tòa tī Gul-ba-al ê阿拉伯人，以及Mi-u-nî人。
26:8 亞捫人進貢烏西雅，伊ê名聲傳到埃及ê交界，因為伊非常強盛。
26:9 烏西雅tī耶路撒冷ê角門kah山谷門，kah城牆轉彎ê所在起城樓，koh是真堅固ê。
26:10 Koh tī曠野起守更樓，koh tī低ê地kah平原開真chē古井，因為伊有真chē chengseⁿ；tī山地kah好ê田，伊koh有作穡人kah料理葡萄園ê，因為伊歡喜種作ê tāichì。
26:11 烏西雅koh有戰士一隊，照書記耶利kah首領瑪西雅所點算ê，tī王ê一个軍長哈拿尼雅ê手下，分隊出去交戰。
26:12 族長to̍h是大能力ê勇士，伊ê總額共二千六百人。
26:13 Tī in ê手下有過練ê軍隊，共三十萬七千五百人，lóng是大能力koh gâu爭戰，ē tàng幫贊王攻擊對敵ê。
26:14 烏西雅為tio̍h in，to̍h是伊ê軍隊，準備藤牌、鎗、頭盔、戰甲kah弓，以及thang hìⁿ ê石頭。
26:15 Koh tī耶路撒冷做機器，是奇巧ê師傅所發明ê，安置tī城樓kah城角頭，thang來射箭發出大塊石。烏西雅ê名聲傳到遠遠，因為伊有得tio̍h特別ê幫贊，致使真強盛。
26:16 烏西雅因為驕傲受懲罰
烏西雅強盛了後，心就驕傲，致使腐敗，悖逆上主—伊ê上帝，因為伊入上主ê殿，beh tī香壇燒香。
26:17 祭司亞撒利雅chhōa上主ê勇敢祭司八十人tòe伊入去。
26:18 In就阻擋烏西雅王，kā伊講：「烏西雅，燒香hō͘上主m̄是你ê tāichì，he是祭司亞倫ê kiáⁿ孫ê tāichì，in受設立來燒香ê。你tio̍h離開聖殿，因為你已經犯罪。你行chitê tāichì，上主—上帝無beh hō͘你得tio̍h榮光。
26:19 烏西雅就受氣，手the̍h香爐beh燒香。伊對祭司teh受氣ê時，tī上主殿內香壇邊hiahê祭司ê面前，伊ê頭額忽然起癩ko。
26:20 大祭司亞撒利雅kah所有ê祭司看tio̍h伊頭額起癩ko，to̍h kā伊趕出殿；伊kakī mā趕緊出去，因為上主kā伊phah。
26:21 烏西雅王起癩ko到伊死ê日，因為伊癩ko tòa tī另外ê厝，kah上主ê殿隔離。伊ê kiáⁿ約坦管理王家，治理人民。
26:22 烏西雅其他ê tāichì，tùi頭到尾，阿摩司ê kiáⁿ以賽亞先知lóng有記錄落來。
26:23 烏西雅kah伊ê祖先同睏，因為講伊是癩ko ê，人kā伊埋葬tī屬列王ê墓地，kah伊ê祖先做堆。伊ê kiáⁿ約坦續接伊做王。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。