創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
39:1 約瑟kah波提乏ê Bó͘
約瑟hō͘人chhōa落去埃及。有一个埃及人，伊是法老ê人臣侍衛長Pho-thê-hoal，tùi hiahê chhōa伊來ê以實瑪利人ê手kā伊買來。
39:2 上主kah伊同在，hō͘伊ta̍k項興通；伊tòa tī伊ê主人埃及人ê家。
39:3 伊ê主人看tio̍h上主kah伊同在，而且上主hō͘伊ê手所做ê lóng興通，
39:4 約瑟to̍h tī主人ê面前得tio̍h恩典，來kā伊服事；主人設立伊管理伊ê家，kā一切所有ê lóng交伊ê手。
39:5 自從主人設立伊管理家事kah伊一切所有ê，上主為tio̍h約瑟ê緣故，賜福tī hitê埃及人ê家；見若厝內kah田裡一切所有ê lóng得tio̍h上主賜福。
39:6 伊kā一切所有ê lóng交約瑟ê手，除去伊kakī 所食ê物以外，別項所有ê伊lóng m̄知。約瑟英俊koh飄撇。
39:7 Chiahê tāichì以後，約瑟ê主母注神看伊，講：「來kah我睏。」
39:8 約瑟m̄肯。伊對伊ê主母講：「你看，厝內有啥物tī我ê手，我ê主人lóng m̄知，伊已經kā所有ê lóng交tī我ê手中。
39:9 Τī chit厝內無一个比我khah大。你以外，伊無一項無交hō͘我，因為你是伊ê bó͘。我ná thang行chitê大pháiⁿ，來得罪上帝？」
39:10 後來，她ta̍k日kah約瑟講話，約瑟無聽她ê話，無kah她睏，mā無kah她做堆。
39:11 有一日，約瑟入去厝內辦伊ê tāichì，hit時無一个人tī ·leh。
39:12 chabó͘人to̍hkhiu2伊ê衫，講：「你來kah我睏。」約瑟kā衫放tī她ê手，走出去外面。
39:13 chabó͘人看tio̍h約瑟kā衫放tī她ê手裡，koh走出去外面，
39:14 to̍h叫厝內ê人來，對in講：「Lín看，我ê丈夫chhōa一个希伯來人入來咱ê家beh kā咱戲弄。伊來我chia，beh kah我睏，我to̍h大聲hoah。
39:15 伊聽tio̍h我出聲hoah，to̍h kā伊ê衫放tī我chia，走出去外面。」
39:16 Cha-bó͘人kā約瑟ê衫收tī她hia，thèng候她ê主人tńg來，
39:17 to̍h對伊講起chiahê tāichì，講：「你所chhōa來咱tau ê hitê希伯來奴僕來到我chia，beh kā我戲弄，
39:18 我出聲hoah，伊to̍hka7伊ê衫放tī我chia，走出去外面。」
39:19 主人聽tio̍h伊ê bó͘對伊所講ê話：「你ê奴僕親像ánne款待我。」伊to̍h受氣。
39:20 約瑟ê主人kā伊關落監，to̍h是王ê罪犯受關ê所在。就ánne，約瑟hông關tī hitê監內。
39:21 總是，上主kah約瑟同在，施恩hō͘伊，hō͘伊tī管監ê人面前得tio̍h恩典。
39:22 管監e5to̍h kā監內所有ê犯人lóng交約瑟ê手；tī hia所做ê tāichì，lóng是約瑟teh做。
39:23 見若約瑟手中ê tāichì，管監ê一概無chhap，因為上主kah約瑟同在，而且伊所做ê，上主lóng hō͘伊興通。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。