創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
38:1 偤大kah她瑪
Hit時，偤大離開伊ê兄弟，落去到一个亞杜蘭人，名叫做Hi-la̍h ê家。
38:2 偤大tī hia看tio̍h一个迦南人，名叫做書亞ê chabó͘ kiáⁿ，就娶她，kah她同房。
38:3 她就懷孕生kiáⁿ，偤大to̍h kā伊號名叫做珥。
38:4 她koh再懷孕生kiáⁿ，老母kā伊號名叫做俄南。
38:5 她又koh生kiáⁿ，kā伊號名叫做示拉；她生示拉ê時，偤大tú-á tī Ku-chip。
38:6 偤大kā伊ê大kiáⁿ珥娶bó͘，名叫做她瑪。
38:7 偤大ê大kiáⁿ珥tī上主ê面前行pháiⁿ，上主to̍h hō͘伊死。
38:8 偤大kā俄南講：「你tio̍h kah你ê兄嫂同房，對她盡你做小弟ê本份，kā你ê阿兄立後嗣。」
38:9 俄南知所生ê kiáⁿ無歸tī伊kakī ，所以，同房ê時，thiau故意遺泄tī地裡，免得hō͘伊ê阿兄有後嗣。
38:10 伊ê所做，上主看做是pháiⁿ ·ê，to̍h hō͘伊mā死。
38:11 偤大心內想講：「恐驚示拉mā ē死，kah伊兩 个阿兄相siâng。」to̍h對伊ê新婦她瑪講：「你去tiàm lín老父hia守寡，thèng候我ê kiáⁿ示拉長成。」她瑪to̍h tńg去，tòa tī in老父ê厝。
38:12 過真久，偤大ê bó͘書亞ê chabó͘ kiáⁿ死。偤大受安慰了後，to̍h kah伊ê朋友亞杜蘭人希拉上去亭拿，到kā伊剪羊毛ê人hia。
38:13 有人kā她瑪講：「Lín ta-koaⁿ上去亭拿，去剪伊ê羊ê毛。」
38:14 她瑪看tio̍h示拉已經長成，iáu無beh娶她做bó͘，就thǹg她守寡ê衫，用帕罩面，koh moa身軀，坐tī去亭拿ê路上ê E-ná-ìm城門口。
38:15 偤大看tio̍h她，掠做是娼妓，因為她有罩面。
38:16 to̍h oat去路邊來見她，講：「來，hō͘我kah你做伙睏。」因為伊m̄知她是伊ê新婦。她應講：「你beh kah我睏，beh用啥物hō͘我？」
38:17 偤大講：「我tùi羊群內掠一隻山羊á，寄來hō͘你。」她講：「你kám beh用啥物hō͘我做準當，thèng候你kā牠寄來？」
38:18 偤大講：「我tio̍h用啥物hō͘你做準當？」她to̍h講：「你ê印，你ê帶，kah你手裡ê柺á。」偤大to̍h hō͘她，然後kah她睏，她to̍h tùi偤大懷孕。
38:19 她瑪起來離開去，thǹg她ê帕，猶原穿她守寡ê衫。
38:20 偤大託伊ê朋友亞杜蘭人送一隻山羊á，beh tùi hitê chabó͘人ê手the̍h準當，m̄ koh，chhōe bē tio̍h她。
38:21 伊to̍h問hit所在ê人講：「Hitê E-ná-ìm路邊ê娼妓tī tó位？」In講：「Chia無娼妓。」
38:22 伊tńg去見偤大講：「我chhōe無她，hit所在ê人mā講：『Chia無娼妓。』」
38:23 偤大講：「Chhut-chāi她the̍h去，免得咱見笑。你看，我beh kā chit隻山羊á送hō͘她，你竟然chhōe無她。」
38:24 差不多過三月日，有人kā偤大講：「你ê新婦她瑪做娼妓，koh因為她行姦淫，續有娠孕。」偤大講：「Kā她拖出來燒。」
38:25 她瑪hō͘人拖出來ê時，to̍h差人去見她ê ta-koaⁿ，講：「Chiahê物是啥人ê，我to̍h是tùi伊來懷孕。」
38:26 Koh講：「請你認，看chitê印、帶kah 柺á是啥人ê。」偤大認出來，to̍h講：「她比我khah有理，因為我無kā她嫁hō͘我ê kiáⁿ示拉。」Τùi hit時起，偤大無koh親近她。
38:27 她瑪teh beh生ê時，知她腹肚內是雙生á ê。
38:28 Teh生ê時，一个gín-á伸一支手出來，產婆the̍h紅線縛tī伊ê手，講：「Chitê是tāi先出世ê。」
38:29 後來，伊ê手kiu入去，第二个出世；產婆講：「你ná ē chông出來？」所以，kā伊號名叫做法勒斯。
38:30 後來，hitê手縛紅線ê mā生出來，to̍h kā伊號名叫做謝拉。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。