歷代志上 線上收聽:中文和合本 現代中文譯本修訂版 現代台語 台語聖經 客語 希伯來文讀經 下載檔案 關於語音聖經
29:1 為tio̍h起聖殿來獻ê禮物
大衛王對會眾講：「我ê kiáⁿ所羅門是上主特別揀選ê，iáu koh少年幼chíⁿ；chitê工程真大，因為chitê殿m̄是為tio̍h人，to̍h是為tio̍h上主—上帝起ê。
29:2 我為tio̍h我ê上帝ê殿，已經盡氣力，準備金做金器，準備銀做銀器，銅做銅器，鐵做鐵器，柴做柴器，koh有紅瑪瑙，kah thang鑲ê寶石、光石，彩色ê石，以及ta̍k種ê寶石kah大理石極chē。
29:3 因為我欣慕我ê上帝ê殿，to̍h tī準備起聖殿ê材料以外，koh用我本身所積聚ê金銀，獻tī我ê上帝ê厝，
29:4 to̍h是俄斐ê金三千他連得，鍛鍊ê銀七千他連得，來安裝 chiahê厝ê牆。
29:5 金做金器，銀做銀器，kah師傅ê手所做chiahê工。今á日有啥人歡喜kā本身獻hō͘上主？」
29:6 就ánne，眾族長kah以色列ta̍k支族ê首領、營長、連長，以及監督hiahê kā王做工ê，lóng歡喜來獻。
29:7 In為tio̍h上主殿ê路用，獻金五千他連得kah一萬達利克，銀一萬他連得，銅一萬八千他連得，鐵十萬他連得。
29:8 見若有寶石ê lóng交帶革順人耶悅ê手，送入去上主殿ê金庫。
29:9 因為in甘心獻，人民lóng歡喜，因為in盡心獻hō͘上主，大衛王mā大歡喜到極。
29:10 大衛O-ló上主
所以，大衛tī會眾ê面前oló上主，大衛講：「上主—阮ê祖先以色列ê上帝，是應該oló ê，tùi永遠到永遠！
29:11 上主ah，尊大、能力、榮光、得勝kah威嚴lóng是祢ê；所有tī天頂地下ê lóng是祢ê。上主ah，國mā是祢ê，祢是至koân，做萬有ê頭。
29:12 好額kah尊貴lóng是tùi祢來，祢mā掌管萬有。Tī祢ê手有大權能kah大氣力，hō͘人尊大，hō͘群眾大氣力，lóng出tī祢ê手。
29:13 阮ê上帝ah，taⁿ阮感謝祢，oló祢榮光ê名！
29:14 「我是啥物，我ê人民是啥物，阮竟然ē ánne歡喜奉獻？因為萬物lóng是tùi祢來，阮用祢ê物獻hō͘祢。
29:15 阮tī祢ê面前是出外人，kah阮ê祖先仝款是寄腳ê。阮tī世間ê日子親像影，無thang ǹg望久長tī ·leh。
29:16 上主—阮ê上帝ah，阮準備chiahê真chē材料，beh為tio̍h祢ê聖名起祢ê殿，lóng是tùi祢來ê，mā lóng是祢ê。
29:17 我ê上帝ah，我知祢鑒察人ê心，歡喜正直；講tio̍h我，我用正直ê心歡喜獻這一切ê物。Taⁿ我看tio̍h祢ê子民tī chia，lóng歡喜獻hō͘祢，我to̍h歡喜。
29:18 上主—阮祖先亞伯拉罕、以撒、以色列ê上帝ah，求祢hō͘祢ê子民tiāⁿ-tiāⁿ 存chit款ê心思念頭，準備in ê心來歸向祢，
29:19 koh求祢賞賜我ê kiáⁿ所羅門有誠實ê心，來守祢ê命令、法度kah律例，做成chiahê所有ê tāichì，用我所準備ê來起殿。」
29:20 大衛對chiahê ē眾講：「Lín tio̍h oló上主—lín ê上帝。」就ánne，會眾oló上主—in祖先ê上帝，àⁿ頭拜上主kah王。
29:21 隔tńg工，in獻祭hō͘上主，koh獻燒祭hō͘上主，to̍h是獻公ê牛一千隻，公ê綿羊一千隻，羊á一千隻kah它ê灌奠，koh為以色列ê群眾獻真chē祭物。Hit日，in tī上主ê面前lim食大大歡喜。
29:22 In第二pái設立大衛ê kiáⁿ所羅門做王，為上主用油kā伊抹，hō͘伊做君王，mā用油抹撒督做祭司。
29:23 就ánne，所羅門坐tī上主所賞賜ê位，續接伊ê老父大衛做王，ta̍k項tāichì lóng興通，以色列人民mā lóng遵thàn伊。
29:24 眾首領、勇士kah大衛王ê眾kiáⁿ，lóng順服所羅門王。
29:25 上主hō͘所羅門tī以色列人民ê面前，非常尊大，hō͘伊做國王ê威風，贏過以色列以前ê王。
29:26 大衛統治ê記載
耶西ê kiáⁿ大衛做以色列人民ê王，
29:27 伊做以色列王，經過四十年，to̍h是tī希伯崙做王七年，tī耶路撒冷做王三十三年。
29:28 伊食長歲壽，年歲、好額kah榮光lóng滿足就過身。伊ê kiáⁿ所羅門續接伊做王。
29:29 大衛王tùi頭到尾ê tāichì，lóng記tī先見撒母耳kah拿單先知ê冊，以及先見迦得ê冊。
29:30 Hiahê冊mā記載伊治理國政ê tāichì，kah伊ê大權能，以及伊kah以色列，kah四箍圍ê列國，所經過ê時事。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。