歷代志上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
15:1 準備去迎接約櫃
大衛to̍h為kakī tī大衛ê城起幾nā間厝，koh為tio̍h上帝ê約櫃準備一个所在kā它搭布棚。
15:2 Hit時，大衛講：「除去利未人以外，無人thang扛上帝ê約櫃，因為上主揀in來扛上主ê約櫃，koh服事祂直到永遠。」
15:3 大衛聚集以色列人民來到耶路撒冷，ài kā上主ê約櫃扛到伊所kā祂準備ê所在。
15:4 大衛koh聚集亞倫ê kiáⁿ孫kah利未人。
15:5 哥轄ê kiáⁿ孫中間有頭人U-li-el，kah伊ê兄弟一百二十人。
15:6 米拉利ê kiáⁿ孫中間有頭人亞帥雅，kah伊ê兄弟兩百二十人。
15:7 革順ê kiáⁿ孫中間有頭人約珥，kah伊ê兄弟一百三十人。
15:8 以利撒反ê kiáⁿ孫中間有頭人示瑪雅，kah伊ê兄弟兩百人。
15:9 希伯崙kiáⁿ孫中間有頭人以列，kah伊ê兄弟八十人。
15:10 烏薛ê kiáⁿ孫中間有頭人亞米拿達，kah伊ê兄弟一百十二人。
15:11 大衛召祭司撒督kah亞比亞他，以及利未人U-li-el、亞帥雅、約珥、示瑪雅、以列 kah亞米拿達chiahê人來。
15:12 對in講：「Lín是利未人ê族長，lín kah lín ê兄弟tio̍h kakī 清氣，chiah thang kā上主—以色列上帝ê約櫃，扛到我所kā祂準備ê所在。
15:13 因為lín早前無ánne做，咱ê上帝—上主已經kā咱責罰，因為咱無照定tio̍h ê例走chhōe祂。」
15:14 就ánne，祭司kah利未人清氣kakī ，beh kā以色列ê上帝—上主ê約櫃扛來。
15:15 利未ê kiáⁿ孫to̍h用槓扛上帝ê約櫃tī肩胛頭，照摩西遵thàn上主ê話所命令ê。
15:16 大衛kah利未ê族長，分派in唱歌ê兄弟奏樂，用瑟kah琴，kah鐃鈸，歡喜出聲來唱。
15:17 就ánne，利未人分派約珥ê kiáⁿ希幔，kah伊兄弟中比利家 ê kiáⁿ亞撒，kah in仝族ê兄弟米拉利ê kiáⁿ孫中間ê Ku-sia-iah ê kiáⁿ以探。
15:18 Koh有第二班ê兄弟撒迦利雅、雅薛、Se-mi-la-mo͘t 、耶悅、烏尼、以利押、比拿亞、瑪西雅、瑪他提雅、E-li-phe-le-hō、Mik-ne-iah，以及顧門ê 俄別以東 kah耶利。
15:19 Án-ne，派唱歌ê希幔、亞撒、以探，phah鐃鈸出大聲。
15:20 派撒迦利雅、雅薛、Se-mi-la-mo͘t 、耶悅、烏尼，以利押、瑪西雅 kah比拿亞彈瑟，它ê聲音清亮。
15:21 Koh派瑪他提雅、E-li-phe-le-hō、Mik-ne-iah、俄別以東、耶利kah A-cha-chiah做頭彈琴，調用第八調。
15:22 利未人ê頭人Ke-na-niah是管理唱歌ê，koh教人唱歌，因為伊精通chitê。
15:23 比利家 kah以利加拿是約櫃前顧門ê。
15:24 祭司示巴尼、約沙法，拿但業、亞瑪賽、撒迦利雅、Be-no-a、I-lī-í-siā，tī上主ê約櫃前pûn鼓吹。俄別以東 kah Iâ-hi-a mā是約櫃前顧門ê。
15:25 迎接約櫃來到耶路撒冷
(撒下6：12-22)
就ánne，大衛kah以色列ê長老以及營長，lóng去俄別以東 ê家，歡喜扛上主ê約櫃tùi hia起來。
15:26 上帝幫贊扛上主約櫃ê利未人，in to̍h獻公ê牛七隻kah公ê羊七隻。
15:27 大衛穿幼苧布ê長衫，扛約櫃ê利未人kah唱歌ê，以及管理唱歌ê Ke-na-niah，連唱歌ê人lóng是ánne；大衛koh穿幼苧布ê祭司服。
15:28 Án-ne，以色列人民出大聲，pûn哨角，pûn鼓吹，phah鐃鈸，彈琴kah瑟，扛上主ê約櫃過來。
15:29 上主ê約櫃來到大衛城ê時，掃羅ê chabó͘ kiáⁿ米甲 tùi窗á內teh看，看tio̍h大衛王tiô跳teh跳舞，心內to̍h kā伊看輕。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。