歷代志上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
12:1 Khí-chho͘ Kin-tòe Ta-bi̍t ê Biān-iá-mín Lâng
Ta-bi̍t in-ūi kiaⁿ Ki-si ê kiáⁿ Sàu-lô, siú-.leh m̄-káⁿ chhut-khì ê sî, ū chiahê ióng-sū lâi-kàu Chik-lak chhōe i, kā i pang-chān khì kau-chiàn.
12:2 In gâu khui kiong, ē ēng tò chhiú, chiàⁿ chhiú hiat chio̍h-thâu kah siā chìⁿ, lóng sī Biān-iá-mín lâng Sàu-lô ê kâng cho̍k.
12:3 Thâu chi̍t-ê sī A-hí-e-chel, koh ū Io-a-si, lóng sī Gi-be-at lâng Sī-má ê kiáⁿ, koh ū E-sil kah Pe-liat sī A-chu-ma-bet ê kiáⁿ, koh ū Be-la-ka kah A-ná-thot lâng E-hú;
12:4 Gi-bóng lâng I-si-ma-iah, tī saⁿ-cha̍p lâng tiong-kan sī ióng-sū, mā teh koán hit saⁿ-cha̍p lâng. Koh ū I-é-lí-miah, Ia-ha-chi-el, Io-ha-nân kah Ge-te-lah lâng Io-cha-bat,
12:5 El-u-chài, E-le-mo͘t, Be-a-liah, Si-ma-liah, Ha-lot-hut lâng Si-hoa-ti-ah,
12:6 Khó-la̍h lâng El-ká-nah, I-si-siah, A-sa-lel, Io-e-chel, Ia-sio-be-am,
12:7 Gi-tol lâng E-lo-ham ê kiáⁿ Io-e-lah kah Che-ba-tiah.
12:8 Kin-tòe Ta-bi̍t ê Ga̍t chi-cho̍k ê Lâng
Ga̍t chi-cho̍k ū kúi-nā-ê lâng kàu khòng-iá ê siâⁿ-pó, kui-óa Ta-bi̍t, in lóng sī ióng-sū kah chiàn-sū, ē chhut-tīn, giâ pîn-pâi, gia̍h chhiuⁿ, in ê bīn chhin-chhiūⁿ sai ê bīn, gâu cháu chhin-chhiūⁿ soaⁿ-.ni̍h ê lo̍k.
12:9 Thâu chi̍t-ê E-sek, tē-jī-ê O-ba-ti-iah, tē-saⁿ-ê E-lí-ap,
12:10 Tē-sì-ê Mi-si-man-nah, tē-gō͘-ê I-é-lí-miah,
12:11 Tē-la̍k-ê At-thài, tē-chhit-ê E-li-el,
12:12 Tē-peh-ê Io-ha-nân, tē káu-ê El-cha-bat,
12:13 Tē-cha̍p-ê I-é-lí-miah, tē-cha̍p-it-ê Mak-ba-nāi.
12:14 Chiahê lóng sī Ga̍t lâng, mā lóng sī kun-tiúⁿ, siōng jio̍k ê ē-tàng tí-tòng chi̍t pah lâng, siōng ē ê ē-tàng tí-tòng chi̍t chheng lâng.
12:15 Chiaⁿ-.goe̍h Iol-tàn hô chúi tiòng móa siang pêng hōaⁿ ê sî, in kòe hô, hō͘ só͘-ū tòa tī soaⁿ-kok ê lâng cháu tang cháu sai.
12:16 Kin-tòe Ta-bi̍t ê Biān-iá-mín kah Iô-tah Chi-cho̍k ê Lâng
Koh ū Biān-iá-mín Iô-tah lâng lâi-kàu siâⁿ-pó, chhōe Ta-bi̍t.
12:17 Ta-bi̍t chhut-khì kā in gêng-chiap, tùi in kóng, " Lín nā-sī ūi tio̍h pêng-an lâi pang-chān góa, góa kah lín ê sim chiū sio khè-ha̍p; chóng-.sī, lín nā beh kā góa bô chōe ê lâng bē hō͘ tùi-te̍k ê chhiú, goān lán chó͘-sian ê Siōng-tè kàm-chhat, kā i chek-hoa̍t. "
12:18 Hit sî, Siōng-chú ê Sèng Sîn lîm-kàu chiahê chiòng ê thâu-lâng A-ma-sa, i chiū kóng, " Ta-bi̍t, goán sī kui tī lí ê, I-é-sái ê kiáⁿ, goán sī lâi pang-chān lí ê! Goān lí pêng-pêng an-an, goān pang-chān lí ê mā tit tio̍h pêng-an, in-ūi lí ê Siōng-chú pang-chān lí. " Ta-bi̍t chiū siu-liû in, siat-li̍p in chò kun-tiúⁿ.
12:19 Kin-tòe Ta-bi̍t ê Má-ná-se Chi-cho̍k ê Lâng
Ta-bi̍t chá-chêng kah Hui-lī-sū chhut-tīn beh kong-kek Sàu-lô ê sî, ū Má-ná-se chi-cho̍k kúi-nā-ê lâng lâi kui óa i, chóng-.sī, kàu bóe in bô kā in pang-chān, in-ūi Hui-lī-sū ê thâu-lâng ū gī-lūn tio̍h hō͘ i tò tńg-.khì, kóng, " I it-tēng tio̍h kui i ê chú-lâng Sàu-lô, tì-sú lán ê thâu-khak gûi-hiám. "
12:20 Hit sî, Ta-bi̍t khì Chik-lak, ū Má-ná-se lâng ê iâⁿ-tiúⁿ, At-nah, Io-cha-bat, E-ti-a-el, Mî-khá-el, Io-cha-bat, E-li-hu kah Chil-thái, lóng lâi kui óa i.
12:21 Chiahê lâng pang-chān Ta-bi̍t kong-kek thó͘-húi, in lóng sī tōa khùi-la̍t ê ióng-sū, koh chò kun-tiúⁿ.
12:22 Hit sî, ji̍t-ji̍t ū lâng kui-óa Ta-bi̍t, beh kā i pang-chān, chiū chiâⁿ-chò tōa kun-tūi, chhin-chhiūⁿ Siōng-chú ê kun-tūi ánne.
12:23 Ta-bi̍t ê Kun-tūi
Chún-pī kau-chiàn ê kun-tūi lâi-kàu He-bú-lông kìⁿ Ta-bi̍t, beh chiàu Siōng-chú ê ōe î-sóa Sàu-lô ê kok-ūi hō͘ Ta-bi̍t, in ê sò͘-gia̍h kì tī ē-bīn.
12:24 Iô-tah chi-cho̍k giâ pîn-pâi kah gia̍h chhiuⁿ chún-pī kau-chiàn ê, ū la̍k-chheng peh-pah lâng.
12:25 Si-miān ê chi-cho̍k, ē chhut-tīn ê ióng-sū ū chhit-chheng chi̍t-pah lâng.
12:26 Lē-bī chi-cho̍k sì-chheng la̍k-pah lâng.
12:27 Io-ho-iá-tah sī A-lông ê ke ê siú-léng, tòe i ê ū saⁿ-chheng chhit-pah lâng.
12:28 Koh ū siàu-liân lâng Cha-tok sī tōa ióng-sū, kah i pún-ke ê cho̍k-tiúⁿ jī-cha̍p jī lâng.
12:29 Biān-iá-mín ê chi-cho̍k, to̍h-sī Sàu-lô ê kâng cho̍k saⁿ chheng lâng, in-ūi kàu hit sî, chit cho̍k tōa pō͘-hūn iáu koh teh ióng-hō͘ Sàu-lô ê ke.
12:30 E-hu-laim chi-cho̍k ê tōa ióng-sū tī pún cho̍k chhut-miâ ê, ū nn̄g-bān khòng peh-pah lâng.
12:31 Má-ná-se pòaⁿ chi-cho̍k kì miâ ê kiōng chi̍t-bān peh-chheng, lóng lâi siat-li̍p Ta-bi̍t chò ông.
12:32 It-sa-kal chi-cho̍k ū tì-sek koh bat sî-sè, chai I-su-la-el só͘ tio̍h kiâⁿ ê, in ê thâu-lâng ū nn̄g-pah-ê, in ê hiaⁿ-tī lóng chun-thàn hiahê thâu-lâng ê bēng-lēng.
12:33 Che-bú-lông ū ē-tàng chhut-tīn ê lóng gâu kau-chiàn, ē ēng ta̍k chióng ê kun-khì ê, ū gō͘ bān lâng, in ē pâi tūi-ngó͘, bô nn̄g-iūⁿ sim.
12:34 Sio̍k Ná-hu-tha-lím ê ū chi̍t-chheng-ê kun-tiúⁿ, giâ pîn-pâi kah gia̍h chhiuⁿ lâi tòe in ê, ū saⁿ-bān chhit-chheng lâng.
12:35 Tàn ê chi-cho̍k, ē pâi tīn ê, nn̄g-bān peh-chheng la̍k-pah lâng.
12:36 Sio̍k A-sel ê, ē chhut-kun pâi-tīn ê, ū sì bān lâng.
12:37 Iol-tàn hô ê tang pêng, Lū-biān lâng, Ga̍t lâng, Má-ná-se pòaⁿ chi-cho̍k ê lâng, gia̍h ta̍k chióng ê kun-khì lâi kau-chiàn ê, ū cha̍p-jī bān lâng.
12:38 Chiahê chiàn-sū lóng ē pâi tūi-ngó͘, ēng sêng-si̍t ê sim lâi-kàu He-bú-lông, beh siat-li̍p Ta-bi̍t chò I-su-la-el choân kok ê ông. I-su-la-el kî-tha ê lâng, mā kâng sio-siâng ê sim, beh siat-li̍p Ta-bi̍t chò ông.
12:39 In tiàm hia saⁿ kang kah Ta-bi̍t chò-hóe tòa, mā lim mā chia̍h, in-ūi in ê hiaⁿ-tī kā in chún-pī piān-piān.
12:40 Óa-kīn in ê lâng, it-ti̍t lâi-kàu It-sa-kal, Che-bú-lông, Ná-hu-tha-lím ê lâng, ēng lî, lo̍k-tô, lô, gû chài mī-hún chia̍h-mi̍h kah bû-hoa-kó piáⁿ, phû-tô koaⁿ, chiú, iû lâi hia, mā ū tòa gû kah iûⁿ, lóng chin chē, in-ūi tī I-su-la-el tiong-kan ū tōa hoaⁿ-hí.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。