歷代志上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
11:1 大衛做以色列kah偤大ê王
(撒下5：1-10)
以色列人民to̍h聚集來到希伯崙見大衛，講：「你看，阮是你ê骨肉。
11:2 以前掃羅做王ê時，chhōa以色列人出入ê mā是你；而且上主—你ê上帝bat對你講：『祢ē照顧我ê子民—以色列人，mā ē做我ê子民—以色列人ê君王。』」
11:3 就ánne，以色列眾長老來到希伯崙見王，大衛to̍h tī希伯崙，tī上主ê面前kah in立約，in to̍h用油抹大衛，kā伊設立做以色列王，照上主交託撒母耳所講ê。
11:4 大衛kah以色列人去到耶路撒冷，to̍h是耶布斯。Hit時，本地ê耶布斯人tòa tī hia。
11:5 Tòa tī耶布斯ê人kā大衛講：「你bē tàng入來chia。」總是，大衛征服錫安ê城堡，做大衛ê城。
11:6 大衛講：「做頭攻擊耶布斯人ê會做首領，做元帥。」洗魯雅ê kiáⁿ約押tāi先去攻擊，to̍h做首領。
11:7 大衛tòa tī城堡，所以，in kā它叫做大衛ê城。
11:8 伊起城ê四箍圍，to̍h是tùi米羅起到它ê四箍圍，其餘ê由約押修理。
11:9 大衛直直khah強大起來，因為萬軍ê上主kah伊同在。
11:10 大衛ê名將
(撒下23：8-39)
下底所記ê是大衛勇士ê頭人，in kah以色列人民奮勇，kā伊幫贊得tio̍h國，設立伊做王，照上主所論以色列ê話。
11:11 大衛勇士ê數額記tī下底：Hak-mo-nih人Ia-sio-be-am，伊是chiahê將ê首領，伊bat做一下gia̍h鎗thâi死三百人。
11:12 第二是亞合人To-to ê kiáⁿ以利亞撒，伊是三个勇士中間ê一个。
11:13 伊bat kah大衛tī Pa-su-ta̍t-bím，腓利士人聚集tī hia beh交戰，tī hia有一坵園大麥滿滿，眾人to̍h tī腓利士人ê面前逃走。
11:14 In khiā tī hit坵園中來kā伊保護，續phah死腓利士人。上主kā in拯救，hō͘ in khah贏。
11:15 三十個頭人中間有三人落去石磐hia，入去A-tu-lâm ê洞見大衛；腓利士ê軍隊紮營tī利乏音ê山谷。
11:16 Hit時，大衛tī城堡，腓利士人ê兵營tī伯利恆。
11:17 大衛欣羨講：「啥人ē kā伯利恆ê城門邊ê井水，chhiūⁿ來hō͘我lim？」
11:18 Chit三人to̍h對腓利士ê軍營衝過去，tùi伯利恆ê城門邊ê井chhiūⁿ水，帶來hō͘大衛。伊m̄-lim，piàⁿ tī上主ê面前，講：
11:19 「我ê上主ah，我絕對m̄ thang ánne做，chiahê人無顧性命，我kám敢lim in ê血？」因為in無顧性命去chhiūⁿ水來，所以，伊m̄-lim。Chiahê tāichì是chit三个勇士做ê。
11:20 約押ê兄弟亞比篩是hit三个勇士中間ê頭，因為伊gia̍h鎗攻擊三百人來kā inthâi死，to̍h tī chit三人中間得tio̍h名。
11:21 三人中間，伊比hit兩 个khah傑出，to̍h做in ê頭，總是，bē比得起頭ê三人。
11:22 有Kap-chi-el人耶何耶大ê kiáⁿ比拿亞，bat做出真chē大事ê，thâi死摩押人亞利伊勒 ê兩 个kiáⁿ，koh tī落雪ê時，落去坑內thâi死一隻獅。
11:23 Kohthâi死一个埃及ê大漢人，有五肘ê高，埃及人手裡有鎗，大親像布機ê樑；比拿亞gia̍h柺落去kah伊chih接，搶埃及人手內ê鎗，chiah用伊ê鎗kā伊thâi死。
11:24 Chiahê是耶何耶大ê kiáⁿ比拿亞所行ê tāichì，to̍h tī三个勇士中間得tio̍h名聲。
11:25 伊比三十個勇士khah傑出，總是，bē比得前三个勇士。大衛設立伊做侍衛長。
11:26 軍隊中ê勇士，有約押ê兄弟亞撒黑，伯利恆人，To-to ê kiáⁿ El-ha-nan，
11:27 Ha-lot人沙瑪，Pe-lóng人He-le-chuh，
11:28 提哥亞人Ik-ke-sih ê kiáⁿ以拉，亞拿突人亞比以謝，
11:29 Ho-siah人Si-bé-kai，亞合人Í-lâi，
11:30 Ne-to-hoat人Ma-ha-lâi，Ne-to-hoat人巴拿ê kiáⁿ He-lep，
11:31 便雅憫族基比亞人Li-bái ê kiáⁿ以太，比拉頓人比拿亞，
11:32 屬Ga-sih chiahê溪ê人Ho͘-lai，亞拉巴人A-mí-el，
11:33 Ba-ha-lum人A-chu-ma-bet，Sial-bóng人E-li-ia-bah，
11:34 Ki-sun人Ha-sém ê眾kiáⁿ，Ha-la̍h人Sia-gē ê kiáⁿ約拿單，
11:35 Ha-la̍h人Sa-kal ê kiáⁿ A-hi-àm，Ul ê kiáⁿ E-li-hoal，
11:36 Me-ke-lat人希弗，Pe-lóng人亞希雅，
11:37 迦密人He-chu-lô，E-chu-bái ê kiáⁿ Na-a-lái，
11:38 拿單ê兄弟約珥，Ha-gu-lī ê kiáⁿ Mip-hal，
11:39 亞捫人Che-le̍k，比錄人Na-ha-lâi（Na-ha-lâi是kā洗魯雅ê kiáⁿ約押gia̍h戰器ê），
11:40 以帖人以拉，以帖人Ga-lep，
11:41 赫人烏利亞，Ah-lâi ê kiáⁿ撒拔，
11:42 流便人示撒ê kiáⁿ A-tē-ná（伊是流便支族中ê一个族長，chhōa三十人），
11:43 瑪迦ê kiáⁿ哈蘭，Mit-ni人約沙法，
11:44 A-sit-lat人烏西亞，亞羅珥人Ho-thàm ê kiáⁿ沙瑪、耶利，
11:45 The-jih人Sim-lī ê kiáⁿ耶疊，kah伊ê兄弟Io-hah，
11:46 Ma-hap人E-li-el，El-na-àm ê kiáⁿ E-li-bài、Io-sia-bi-iah，摩押人It-mah、
11:47 E-li-el、俄備得kah Me-chó-bah人Ia-si-el。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。