創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
35:1 上帝tī伯特利賜福雅各
上帝kā雅各講：「起來！去伯特利，tòa tī hia，koh tio̍h tī hia kā上帝起一座壇；to̍h是你閃避你ê阿兄以掃ê面ê時，對你出現ê hit位。」
35:2 雅各to̍h kā全家以及所有kah伊tī ·leh ê人講：「Lín tio̍h除去lín中間ê外邦神明，mā tio̍h kakī 清氣，換lín ê衫褲。
35:3 咱tio̍h起來，來去伯特利，我beh tī hia kā上帝起一座壇，to̍h是tī我tú tio̍h患難ê日，應允我ê祈禱，tī我所行ê路kah我同在ê hit位。」
35:4 Into̍h kā in手內所有異邦ê神明kah in ê耳鉤，lóng hō͘雅各，雅各kā hiahê物件埋tī示劍hia ê橡樹腳。
35:5 Into̍h出發，上帝hō͘四箍圍ê城ê人lóng真tio̍h驚，in to̍h無去jiok雅各ê眾kiáⁿ。
35:6 雅各以及所有kah伊做陣ê人，來到迦南地ê路斯，to̍h是伯特利。
35:7 伊tī hia起一座壇，to̍h kā hit所在號名，叫做El-be-thel，因為伊閃避伊ê阿兄ê時，上帝tī hia對伊出現。
35:8 利百加ê奶母底波拉死去，就埋葬tī伯特利下面ê橡樹腳，所以kā它叫做A-lûn-pa-kó͘（註：希伯來文ê音讀，意思是「哀傷ê橡樹」）。
35:9 雅各tùi巴旦亞南tńg來，上帝koh對伊出現，賜福hō͘伊。
35:10 上帝koh kā伊講：「你ê名是雅各，taⁿ以後你ê名無koh叫雅各，beh叫做以色列。」祂to̍h叫伊ê名以色列。
35:11 上帝koh kā伊講：「我是全能上帝，你tio̍h生湠真chē，將來有一國，koh有真chē國tùi你來生，koh有君王tùi你來出世。
35:12 我所hō͘亞伯拉罕kah以撒ê地，我beh hō͘你，mā beh kā chitê地hō͘你ê kiáⁿ孫。
35:13 上帝to̍h tùi kah伊講話ê所在上天。
35:14 雅各to̍h tī上帝kah伊講話ê所在khiā一支石柱，tī hit頂面灌奠倒油。
35:15 雅各就稱上帝kah伊講話ê所在叫做伯特利。
35:16 拉結難產死去
In tùi伯特利出發，離開以法他 iáu有一站á路ê時，拉結臨產，tú tio̍h有艱難。
35:17 當她艱苦生ê時，產婆對她講：「M̄免驚，你taⁿ beh koh得tio̍h一个kiáⁿ。」
35:18 她ê氣kiōng-beh斷; 臨終ê時，to̍h kā她ê kiáⁿ ê名號做Biān-o͘-nî。M̄ koh，伊ê老父kā伊號名叫做便雅憫。
35:19 拉結死，埋葬tī去以法他ê路；以法他to̍h是伯利恆。
35:20 雅各khiā柱tī她ê墓頂。Chitê柱to̍h是拉結ê墓牌，到今á日iáu tī ·leh。
35:21 以色列koh出發去，tī E-tel瞭望台搭布棚。
35:22 雅各ê Kiáⁿ兒
以色列tòa tī hit所在ê時，流便去kah伊ê老父ê細姨辟拉做伙睏，以色列mā有聽tio̍h風聲。
35:23 雅各總共有十二個kiáⁿ。利亞ê kiáⁿ，to̍h是雅各ê大kiáⁿ流便，以及西緬、利未、偤大、以薩迦、西布倫。
35:24 拉結ê kiáⁿ，to̍h是約瑟、便雅憫。
35:25 拉結ê女婢辟拉所生ê kiáⁿ，to̍h是但kah拿弗他利。
35:26 利亞ê女婢悉帕所生ê kiáⁿ有迦得、亞設。Chiahê是雅各tī巴旦亞南所生ê kiáⁿ。
35:27 以撒ê死亡
雅各來見伊tī幔利ê老父以撒，來到基列亞巴，to̍h是希伯崙，亞伯拉罕kah以撒bat寄腳ê所在。
35:28 以撒食到一百八十歲。
35:29 以撒年歲老，日子滿足，氣斷來死，tńg去伊ê祖先hia。伊兩 个kiáⁿ以掃kah雅各kā伊埋葬。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。