章節 | 全民台語聖經漢羅經文 | 註釋 |
3:1 | 人類違背上主ê旨意上主—上帝所造山野一切ê活物,蛇是siōng狡譎ê。蛇對chabó͘人講:「上帝kám有影講:園內一切ê樹,lín lóng m̄ thang食?」 | |
3:2 | chabó͘人對蛇講:「園內樹裡ê果子阮thang食, | |
3:3 | 只有園中央hit欉樹ê果子,上帝bat講:『Lín m̄ thang食,mā m̄ thang摸,恐驚lín食了ē死。』」 | |
3:4 | 蛇對chabó͘人講:「Lín無一定ē死, | |
3:5 | 因為上帝知lín食ê日,lín ê目chiu to̍h ē開,línē親像上帝ē曉分別善惡。」 | |
3:6 | chabó͘人看hit欉樹,好食mā好看,hit欉樹koh是thang欣慕ê,ē hō͘人有智慧。她就挽它ê果子來食,koh hō͘她ê丈夫mā食。 | |
3:7 | In兩人ê目chiu to̍h開,chiah知in是thǹgpaktheh,就編無花果ê葉,為kakī 做裙。 | |
3:8 | 日涼冷ê時,上主—上帝行遊tī園內,in聽tio̍h祂ê聲,hitê人kah伊ê chabó͘人to̍hbih tī園內ê樹中,來閃避上主ê面。 | |
3:9 | 上主—上帝叫hitê人來,對伊講:「你tī tó位?」 | |
3:10 | Hitê人to̍h講:「我tī園內聽tio̍h祢ê聲,我to̍h驚,因為我thǹgpaktheh,所以就kakī bih起來。」 | |
3:11 | 上帝講:「啥人kā你講你thǹgpaktheh?我吩咐你m̄ thang食hit欉樹ê果子,你有食ho͘ⁿh?」 | |
3:12 | Hitê人講:「祢所hō͘我做伴ê chabó͘人,她kā hit欉樹ê果子hō͘我,我to̍h食。」 | |
3:13 | 上主—上帝對chabó͘人講:「你所做ê是啥物事?」Cha-bó͘人講:「蛇引誘我,我to̍h食。」 | |
3:14 | 上主—上帝對蛇講:「你已經做chit款tāichì,你tio̍h受咒詛!Hitê咒詛比一切ê chengseⁿ kah山野一切ê走獸ê khah重。你tio̍h用腹肚行路,一生食土沙粉。 | |
3:15 | 我beh hō͘你kah chabó͘人結冤仇,你ê kiáⁿ孫kah她ê kiáⁿ孫mā結冤仇,伊ē傷你ê頭殼,你beh傷她ê腳後teⁿ。」 | |
3:16 | 上主—上帝koh對chabó͘人講:「我一定大大加添你懷孕ê艱苦,你ē艱苦生kiáⁿ。你ē戀慕你ê丈夫,伊ē kā你管轄。」 | |
3:17 | 上主—上帝mā對亞當講:「你已經聽你ê chabó͘人ê話,來食我所吩咐你m̄ thang食ê,所以,土地因為你ê緣故受咒詛,你一世人tio̍h勞苦chiah ē tàng得tio̍h食飽。 | |
3:18 | 土地ē為tio̍h你發刺phè kah蒺藜,你mā tio̍h食園裡ê菜蔬。 | |
3:19 | 你tio̍h汗流滿面chiah ē tàng得tio̍h食飽,一直到你歸土,因為你是tùi土the̍h出來ê,你本是土沙粉,mā ē歸tī土粉。」 | |
3:20 | Hitê人kā伊ê bó͘號名叫做夏娃,因為她做眾人ê老母。 | |
3:21 | 上主—上帝為tio̍h hitê人kah伊ê bó͘,用皮做衫褲hō͘ in穿。 | |
3:22 | 亞當kah夏娃Hông趕出伊甸園上主—上帝講:「你看,chitê人已經kah咱相siâng,ē曉分別善惡,taⁿ 恐驚伊koh 伸手tùi活命樹挽果子來食,to̍h ē活到永遠。」 | |
3:23 | 所以,上主—上帝kā伊趕出伊甸園,來種作hitê土地,to̍h是伊所tùi它出ê土地。 | |
3:24 | 所以,kā hitê人趕出去,koh tī伊甸園ê東pêng安置Ki-lō͘-peng kah四面tńg-se̍h發出火焰ê劍,來防守通到活命樹ê路。 |