章節 | 全民台語聖經漢羅經文 | 註釋 |
33:1 | 摩西祝福以色列各支族上帝ê奴僕摩西,tī伊iáu未死ê chìn前,kā以色列人祝福;所祝福ê話記tī下底: | |
33:2 | 伊講:「上主tùi西奈來,為tio̍h in tùi西珥起來;tùi巴蘭ê山照出光,tùi萬萬聖ê hia來,tùi祂ê正手為tio̍h in發出烈火ê律法。 | |
33:3 | 祂不止疼痛hiahê人民;祂hiahê聖ê lóng tī祂ê手。In坐tī祂ê腳前,聽受祂hiahê話。 | |
33:4 | 摩西用律法傳hō͘咱;做雅各會眾ê產業。 | |
33:5 | 人民ê首領,以色列ê眾支族做伙聚會ê時,伊tī耶書崙做王。 | |
33:6 | 願流便活leh無死,願伊ê人額無少。 | |
33:7 | 伊kā偤大祝福,ánne講:求上主聽偤大ê聲,chhōa伊到伊ê人民hia;伊bat用伊ê手為kakī 交戰,祢ē kā伊幫贊來抵擋伊ê對敵。 | |
33:8 | 關係利未講:祢ê土明kah祢ê烏陵,kah祢聖潔ê人同在。祢tī瑪撒bat kā伊試探,tī米利巴ê水邊bat kah伊相爭。 | |
33:9 | 伊講tioh伊ê老父,伊ê老母,to̍h講:我m̄ bat看tio̍h伊,mā無承認伊ê兄弟,mā無承認伊ê kiáⁿ兒。因為in行祢ê話,守祢ê約。 | |
33:10 | Inē用祢ê法度教示雅各,用祢ê律法教示以色列。Inē用香hē tī祢ê面前,kah全部chiahê燒祭tī祢ê壇頂。 | |
33:11 | 願上主賜福伊ê產業,接納伊ê手所做ê工。Hiahê起來攻擊伊kah怨恨伊ê人,願祢phah斷in ê腰,hō͘ in bē tàng koh起來。 | |
33:12 | 關係便雅憫to̍h講:上主所疼êē kah祂安然tòa;上主kui日保護伊,祂mā beh tiàm tī伊ê肩胛頭中。 | |
33:13 | 關係約瑟to̍h講:願伊ê地得tio̍h上主賜福,得tio̍h天頂ê寶物kah露水,以及地下所khǹg ê水源; | |
33:14 | 得tio̍h日頭所生ê寶物,月所出ê寶物; | |
33:15 | 得tio̍h古早ê山ê至寶,kah永世代ê山嶺ê寶物; | |
33:16 | 得tio̍h地ê寶物kah其中所充滿ê,以及tiàm tī刺phè內ê ê恩惠。願hiahê lóng歸tī約瑟ê頭殼,歸tī hitê kah伊ê兄弟分開ê ê頭殼頂。 | |
33:17 | 親像牛ê頭chiūⁿ生ê,榮光屬tī祂,祂ê角是野牛ê角,用in來觸萬民到tī地極。這是以法連ê萬萬,瑪拿西ê千千。 | |
33:18 | 關係西布倫to̍h講:西布倫,你出外thang歡喜。以薩迦,tī你ê布棚內thang快樂。 | |
33:19 | In會召chiahê人民到山裡,tī hia beh獻公義ê祭;因為in beh吸收海裡ê豐盛,kah沙裡所khǹg ê寶貝。 | |
33:20 | 關係迦得to̍h講:Hō͘迦得發展ê 應當得tio̍h oló!伊bih ·leh親像母ê獅;伊拆裂手骨kah頭殼。 | |
33:21 | 伊為kakī 準備tāi先得tio̍h ê產業,因為tī hia有設律法ê ê份額留teh。伊kah人民ê首領做伙來,行上主ê公義,kah以色列做伙行祂ê判斷。 | |
33:22 | 關係但to̍h講:但是細隻獅,tùi巴珊跳出來。 | |
33:23 | 關係拿弗他利to̍h講:拿弗他利,得tio̍h恩惠充足,mā得tio̍h上主ê賜福滿滿ê,ē得tio̍h西pêng kah南pêng做產業。 | |
33:24 | 關係亞設to̍h講:願亞設因為kiáⁿ chē來得tio̍h福氣,得tio̍h in ê兄弟ê歡喜,thang用伊ê腳浸tī油裡。 | |
33:25 | 你ê門閂是鐵ê、銅ê。你ê日子án怎,你ê氣力mā ē ánne。 | |
33:26 | 耶書崙,無有親像上主ê,祂坐天來幫贊你,mā坐穹蒼,顯明祂ê榮光。 | |
33:27 | 永活ê上主做你tòa ê所在;永遠ê手tī你ê下面。祂tī你ê面前kā對敵趕走,Koh講:kā伊毀滅掉。 | |
33:28 | 以色列安然tòa,雅各ê kiáⁿ孫kakī tòa tī五穀kah酒ê地。伊ê天mā滴落露水。 | |
33:29 | 以色列人,你有福氣!啥人親像你chitê hō͘上主所拯救ê人民?祂是你ê藤牌teh保護你,是你榮耀ê刀劍。你ê對敵ē kā你投降;你ē踏tī in koân ê所在。 |