章節 | 全民台語聖經漢羅經文 | 註釋 |
2:1 | 天地kah它一切所有ê已經造完成。 | |
2:2 | Tī第七日,上帝完成祂所創造ê工,to̍h tī第七日,歇祂一切所做ê工。 | |
2:3 | 上帝tī第七日賜福,定做聖日,因為tī chit日,上帝停祂一切創造ê工,就安息。 | |
2:4 | 天地創造ê來歷,tī上主—上帝造地kah天ê日,親像下底: | |
2:5 | 伊甸園山野一切ê草木iáu未有tī地裡,山野一切ê菜蔬iáu未生長,因為上主—上帝無落雨tī地裡,mā無人thang種作hitê土地。 | |
2:6 | 總是,有霧tùi地起,滋潤全地面。 | |
2:7 | 上主—上帝用地chiūⁿê土沙粉chhiau做人(註:Tī希伯來文,「人」kah「地」有共同ê字根;「人」kah人名「亞當」mā是仝一个字根。),pûn活ê氣入去伊ê鼻孔,人to̍h成做有靈魂ê活命。 | |
2:8 | 上主—上帝tī東方,tī伊甸,安置一个園,kā所造ê人hē tī hia。 | |
2:9 | 上主—上帝hō͘ ta̍k種ê樹tùi地裡發起來,好看mā好食。Τī園ê中間,koh有活命ê樹kah分別善惡ê樹。 | |
2:10 | 伊甸有河流出來,灌ak hitê園,tùi hia分開做四條。 | |
2:11 | 頭一條名叫做Pi-sióng,to̍h是se̍h流tī 哈腓拉全地ê,tī hia有出金。 | |
2:12 | hit位ê金是真好,mā出珍珠碧玉。 | |
2:13 | 第二條名叫做基訓,to̍h是se̍h流tī古實全地ê。 | |
2:14 | 第三條名叫做底格里斯,to̍h是流tī亞述ê東pêng ·ê。第四條to̍h是幼發拉底。 | |
2:15 | 上主—上帝kā hitê人hē tī伊甸園,來種作kah顧守。 | |
2:16 | 上主—上帝吩咐hitê人講:「園內ta̍k種樹ê果子,lóng thang隨意來食。 | |
2:17 | 總是,分別善惡ê樹,它ê果子m̄ thang食,因為食ê日,你一定ē死。」 | |
2:18 | 上主—上帝講:「人單身kakī tòa m̄好,我beh kā伊造一个幫贊ê,來kah伊匹配。」 | |
2:19 | 上主—上帝用土做山野ta̍k種ê走獸,以及空中ta̍k種ê飛鳥,koh chhōa hiahê活物來到hitê人ê面前,看伊beh稱in啥物名。見若伊所稱ta̍k種活物ê,to̍h做hitê活物ê名。 | |
2:20 | Hitê人to̍h kā一切ê chengseⁿ、空中ê飛鳥kah山野一切ê走獸lóng號名;總是,chhōe無一个thang做hitê人ê幫贊,來kah伊匹配。 | |
2:21 | 上主—上帝hō͘ hitê人睏重眠,伊to̍h睏;就the̍h伊ê 一支脇骨,koh用肉kā它包起來。 | |
2:22 | 上主—上帝to̍h kā tùi hitê人所the̍h出來ê脇骨,造成一个chabó͘人,koh kā她chhōa來見hitê人。 | |
2:23 | Hitê人講:「Taⁿ chitê是我骨內ê骨,肉內ê肉;我beh kā她叫做chabó͘人,因為她是tùi chapo͘人the̍h出來ê。 | |
2:24 | 所以,人beh離開伊ê父母,kah伊ê bó͘結聯,in to̍h成做一體。 | |
2:25 | 翁bó͘兩人lóng仝款thǹgpaktheh,mā無感覺見笑。 |