章節 | 全民台語聖經漢羅經文 | 註釋 |
16:1 | 上帝大受氣ê碗後來,我koh聽tio̍h有大聲tùi聖殿出來,kā七个天使講:「Lín去,kā hit七碗上帝ê大受氣piàⁿ落去地chiūⁿ。」 | |
16:2 | 頭一个天使to̍h去,kā伊hit碗piàⁿ落去地chiūⁿ,hiahê有猛獸ê記號kah拜牠ê造像ê人to̍h生臭koh毒ê瘡。 | |
16:3 | 第二个天使kā伊ê碗piàⁿ落去海裡,海to̍h變做親像死人ê血,海中ê活物lóng死去。 | |
16:4 | 第三个天使kā伊ê碗piàⁿ落去江河kah水泉,水to̍h變做血。 | |
16:5 | 我聽tio̍h掌管chiahê水ê天使講:「現在存在,早前存在,至聖ê上帝,祢是公義,祢ê審判公正。 | |
16:6 | 因為in有流信徒kah先知ê血,taⁿ祢用血hō͘ in lim,這是in應該受ê報應。」 | |
16:7 | 然後我koh聽tio̍h祭壇有聲講:「是lah,主—全能上帝,祢ê審判真實koh公義。」 | |
16:8 | 第四个天使kā伊hitê碗piàⁿ落去日頭,日頭to̍h得tio̍h權柄,用火燒人。 | |
16:9 | 人hō͘大炎熱ê火燒tio̍h,to̍h褻瀆hitê有權掌管chiahê災禍ê上帝ê名,猶原m̄肯悔改來歸榮光hō͘上帝。 | |
16:10 | 第五个天使kā伊hitê碗piàⁿ落去猛獸ê座位,猛獸ê國度隨時變烏暗,人to̍h艱苦kah咬舌。 | |
16:11 | In koh因為in ê艱苦kah瘡毒,to̍h褻瀆天頂ê上帝,猶原無悔改來改變in ê行踏。 | |
16:12 | 第六个天使kā伊hitê碗piàⁿ落去幼發拉底大河,河水隨時乾去,為tio̍h tùi東方來ê列王準備一條路。 | |
16:13 | 我koh看tio̍h有三个無清氣ê靈,親像田蛤á,tùi龍ê嘴、猛獸ê嘴kah假先知ê嘴出來。 | |
16:14 | In to̍h是ē行奇蹟ê惡魔ê邪神,in出去招集全世界ê君王,tī全能上帝所定tio̍h hitê大日子出來交戰。 | |
16:15 | (你tio̍h注意!我ē親像賊來。Hitê隨時警醒,kā衫穿便便ê人實在有福氣,因為伊m̄免hō͘眾人看tio̍h伊thǹgpaktheh ê見笑。) | |
16:16 | Hiahê邪魔to̍h招集列王,tī一个希伯來話叫做A-má-ge̍k-tùn ê所在聚集。 | |
16:17 | 第七个天使kā伊hitê碗piàⁿ落去空中,to̍h有大聲tùi聖殿ê寶座出來,講:「完成à!」 | |
16:18 | Hit時,有sihnà、有響聲、有雷tân kah大地動。地chiūⁿ有人類以來,m̄ bat有chiahni̍h大ê地動。 | |
16:19 | Hitê巴比倫大城to̍h裂做三塊,列國ê城市mā lóng倒壞。上帝mā ē記得巴比倫大城ê tāichì,to̍h hō͘她lim貯滿上帝極大受氣ê酒。 | |
16:20 | 所有ê海島kah山lóng消失去。 | |
16:21 | 然後tùi天頂降落大粒雹,ta̍k粒ê重量lóng有幾nā十公斤。人為tio̍h雹ê災禍,to̍h褻瀆上帝,因為hitê災禍非常嚴重。 |