章節 | 全民台語聖經漢羅經文 | 註釋 |
1:1 | 這是耶穌基督ê啟示,上帝hō͘基督chitê啟示,ài祂kā liâmpiⁿ一定ē發生ê tāichì指示上帝ê奴僕;基督有差遣祂ê天使去指示上帝ê奴僕約翰。 | |
1:2 | 約翰kā所看tio̍h關係上帝ê信息kah耶穌基督ê見證,對所有ê人做證。 | |
1:3 | 讀chit本冊kah聽hiahê預言,koh遵守其中所記載ê人真有福氣,因為應驗chiahê tāichì ê日期teh beh到à。 | |
1:4 | 對七間教會請安我—約翰寫phoe寄hō͘亞西亞省ê七間教會。願現在存在,早前存在,將來mā存在ê上帝,kah祂座位前ê七个靈以及耶穌基督賜lín恩典kah平安。 | |
1:5 | 基督是忠實ê見證人,是頭一个tùi死人中koh活,koh是地chiūⁿ萬王ê主宰。 | |
1:6 | 基督疼咱,為tio̍h咱流血犧牲,來tháu放咱脫離咱ê罪,mā hō͘咱成做國度,成做祭司,來服事祂ê天父上帝。願榮光kah權能歸tī耶穌基督,代代無盡。阿們! | |
1:7 | 你看,基督坐雲teh來,眾人ē看tio̍h祂。連用鎗鑿祂ê人mā ē看tio̍h祂。地chiūⁿ萬民lóngē因為祂ê再臨來悔改啼哭。Chitê tāichì一定ē ánne發生。阿們! | |
1:8 | 現在存在,早前存在,將來mā存在ê全能ê主—上帝講:「我是起頭ê Al-hoah(Α) koh是結尾ê O͘-mè-gah(Ω)。」 | |
1:9 | 基督對約翰顯現我—約翰是lín ê兄弟,有kah lín做伙分擔耶穌ê苦難kah吞忍,koh有份tī祂ê國度。為tio̍h beh傳上帝ê信息kah見證耶穌ê福音,我bat tòa tī一个名叫做Pa̍t-mo͘h ê海島。 | |
1:10 | Tī一个主ê日,我hō͘聖神感動,聽tio̍h tī我ê後面有親像鼓吹ê大聲音, | |
1:11 | 講:「你tio̍h kā所看tio̍h ê寫做冊,寄hō͘ hit七間教會,to̍h是以弗所、士每拿、別迦摩、推雅推喇、撒狄、非拉鐵非、老底嘉。」 | |
1:12 | 我oa̍t-tńg身想beh看kah我講話ê是啥人,結果看tio̍h七支金燈台。 | |
1:13 | 燈台ê中央有一位親像人子,穿一領長袍,胸坎縖金帶。 | |
1:14 | 祂ê頭毛白kah ná親像羊毛á是雪,祂ê目chiu 親像火焰。 | |
1:15 | 祂ê腳親像過火爐鍛鍊koh磨過ê銅hiahni̍h金;祂ê聲親像大水teh chhiâng ê聲hiah響。 | |
1:16 | Tī祂ê正手有七粒星,祂ê嘴吐出雙面利ê劍。祂ê面貌發光,親像中晝時ê日頭hiah光。 | |
1:17 | 我一下看tio̍h祂,to̍h kahná死人仆tī祂ê腳前。祂用正手hōaⁿ我,講:「M̄免驚,我是起頭ê,mā是結尾ê。 | |
1:18 | 我是hit位永遠活leh ê。我bat死,taⁿ我活leh,koh ē活到萬世代。我掌管死亡kah陰府ê鎖匙。 | |
1:19 | 所以,你tio̍h kā所看tio̍h ê,現今所teh發生ê,kah將來ē發生ê tāichì lóng寫落來。 | |
1:20 | 你所看tio̍h tī我正手hit七粒星kah七支金燈台ê奧祕是ánne:七粒星是七間教會ê使者,七支燈台是七間教會。」 |