章節 | 全民台語聖經漢羅經文 | 註釋 |
54:1 | 上主對以色列ê疼你無懷孕無生kiáⁿ ·ê,tio̍h唱歌;你m̄ bat經過生kiáⁿ ê艱苦,tio̍h出聲唱歌,出歡喜ê聲;因為kakī tòa ê chabó͘人比有丈夫ê生khah chē kiáⁿ。這是上主講ê。 | |
54:2 | Tio̍h開拓你布棚ê地,放大你tòa ê帳幅,m̄ thang限定;tio̍h牽長你ê索,堅固你ê杙á。 | |
54:3 | 因為你beh ǹg左ǹg右來開拓;你ê kiáⁿ孫一定ē得tio̍h列國做產業,koh hō͘拋荒ê城有人tòa。 | |
54:4 | M̄-thang驚惶,因為你一定無致使見笑,mā m̄ thang驚畏小人,因為你無致使受凌辱。你一定ē記得少年ê時ê見笑,無koh記念你守寡時ê凌辱。 | |
54:5 | 因為創造你ê是你ê丈夫;萬軍ê上主是祂ê名;救贖你ê是以色列ê聖ê;祂一定ē稱做全地ê上帝。 | |
54:6 | 上主召你,親像teh召受棄sak,心內憂傷ê bó͘,to̍h是少年ê時所娶,受棄sak ê bó͘。這是你ê上帝所講ê。 | |
54:7 | 我放離你不過一時á,m̄ koh,我beh用大慈悲收你倒tńg來。 | |
54:8 | 我發出受氣,暫時對你掩面;m̄ koh,beh用永遠ê慈愛憐憫你。這是上主—救贖你ê主所講ê。 | |
54:9 | 因為這在我看起來,親像挪亞ê大水。我án怎chiùchōa無koh hō͘挪亞ê大水氾濫全地,我mā beh照ánne chiùchōa無koh對你受氣,kā你責備。 | |
54:10 | 大山會徙開,小山會移徙;獨獨我ê慈愛一定無離開你,我平安ê約mā無移徙。這是憐憫你ê上主講ê。 | |
54:11 | 耶路撒冷ê將來你chitê受困苦,hō͘大風搖動bē tàng安慰ê人,我beh用彩色安置你ê石頭,用藍色ê寶石hē你ê地基。 | |
54:12 | 我koh用紅寶石造你ê城角頭,用紅玉造你ê城門,用寶石造你四箍圍ê邊界。 | |
54:13 | 你ê kiáⁿ兒lóng beh hō͘上主教示;你ê kiáⁿ兒ē得tio̍h大平安。 | |
54:14 | 你ē因為公義得tio̍h khiā在,會離開制壓遠遠,無致使驚惶;你ē離開災禍遠遠,因為它一定無近óa你。 | |
54:15 | Kiám-chhái有人聚集,m̄ koh,m̄是tùi我;見若聚集攻擊你ê,beh因為你來跋倒。 | |
54:16 | Hitê pûn火炭,製造合用ê器械ê鐵匠,是我所創造ê;我mā創造hitê陷害人ê,hō͘伊去行剿滅。 | |
54:17 | 見若為tio̍h攻擊你來造ê器械一定ē成做無路用;見若tī審判ê時起來攻擊你ê舌,你ē定伊ê罪。這是上帝ê奴僕ê產業,mā是in tùi我所得tio̍h ê義。這是上主講ê。 |