| 章節 | 全民台語聖經漢羅經文 | 註釋 |
| 41:1 | 約瑟為王解夢整整過了兩年，法老眠夢，夢見伊khiā tī河邊， | 註釋 串珠 康來昌 原文 典藏 |
| 41:2 | 看tio̍h七隻牛母tùi河裡起來，súi koh肥，tī蘆竹á內teh食草。 | 註釋 串珠 康來昌 字典 原文 典藏 |
| 41:3 | Tòe後koh有七隻牛母tùi河裡起來，khiap-sì koh瘦，kah前hiahê牛做伙khiā tī河邊。 | 註釋 串珠 康來昌 字典 原文 典藏 |
| 41:4 | Chiahê khiap-sì koh瘦ê牛母kā hit七隻súi koh肥ê牛全部食了了。法老就醒起來。 | 註釋 串珠 康來昌 字典 原文 典藏 |
| 41:5 | 法老koh睏，第二pái眠夢，夢見一欉麥出七穗，phauh koh好看。 | 註釋 串珠 康來昌 原文 典藏 |
| 41:6 | 後來，koh看tio̍h koh出七穗，冇冇（phàⁿ-phàⁿ）koh hō͘東風掃pháiⁿ。 | 註釋 串珠 康來昌 原文 典藏 |
| 41:7 | Chiahê冇ê穗kā hit七穗phauh koh飽滿ê吞落去。法老醒起來，chiah知是teh眠夢。 | 註釋 串珠 康來昌 原文 典藏 |
| 41:8 | 到天光，法老心無平安，to̍h差人召埃及所有ê術士kah星象家來；法老to̍h kā伊所夢見ê kā in講，in無人ē曉kā法老解夢。 | 註釋 串珠 康來昌 原文 典藏 |
| 41:9 | Hit時，酒政長kā法老講：「我今á日想起我ê罪。 | 註釋 串珠 康來昌 原文 典藏 |
| 41:10 | 前法老受氣人臣，kā我kah廚房長關tī侍衛長府內ê監。 | 註釋 串珠 康來昌 原文 典藏 |
| 41:11 | 我kah伊，兩人siâng hit暝有夢見，阮各人ê夢有無仝ê意義。 | 註釋 串珠 康來昌 原文 典藏 |
| 41:12 | Tī hia有一个希伯來ê少年人kah阮同在，伊是侍衛長ê奴僕。阮kā伊講阮ê夢，伊to̍hka7阮解夢；伊是照阮ta̍k人ê夢來解夢。 | 註釋 串珠 康來昌 原文 典藏 |
| 41:13 | 後來，tāichì tútú照伊所kā阮解夢ê來實現：你hō͘我復職，hitê人受吊來死。」 | 註釋 串珠 康來昌 原文 典藏 |
| 41:14 | 法老to̍h差人去召約瑟來，in to̍h趕緊chhōa伊出監。伊to̍h剃頭、換衫，來見法老。 | 註釋 串珠 康來昌 字典 原文 典藏 |
| 41:15 | 法老kā約瑟講：「我夢見一个夢，無人ē曉解夢；我聽人講你若聽tio̍h夢to̍h ē曉解。」 | 註釋 串珠 康來昌 原文 典藏 |
| 41:16 | 約瑟應法老講：「這m̄是在tī我；上主ē kā平安指示法老。」 | 註釋 串珠 康來昌 原文 典藏 |
| 41:17 | 法老kā約瑟講：「我夢見我khiā tī河邊， | 註釋 串珠 康來昌 原文 典藏 |
| 41:18 | 有七隻牛母tùi河裡起來，肥koh súi，tī蘆竹á內teh食草。 | 註釋 串珠 康來昌 字典 原文 典藏 |
| 41:19 | Tòe後koh有七隻牛母起來，軟chiáⁿ，真khiap-sì，koh真瘦。埃及全地，我m̄ bat看過chiah bái ·ê。 | 註釋 串珠 康來昌 字典 原文 典藏 |
| 41:20 | Chiahê瘦koh khiap-sì ê牛母kā hit七隻肥ê牛母全部食了了。 | 註釋 串珠 康來昌 字典 原文 典藏 |
| 41:21 | In有吞落腹，m̄ koh，看bē出有吞落去，因為hitê khiap-sì ê款猶原kah以前仝款。然後，我to̍h醒。 | 註釋 串珠 康來昌 原文 典藏 |
| 41:22 | 我tī夢中koh看tio̍h一欉麥出七穗，飽滿koh好看。 | 註釋 串珠 康來昌 原文 典藏 |
| 41:23 | 後來，koh出七穗，乾乾，冇冇，koh hō͘東風掃pháiⁿ。 | 註釋 串珠 康來昌 原文 典藏 |
| 41:24 | Chiahê冇冇ê穗吞食hit七穗好ê。我講hō͘術士聽，mā無人ē曉kā我解明。」 | 註釋 串珠 康來昌 原文 典藏 |
| 41:25 | 約瑟kā法老講：「法老ê兩 个夢是一个意思；上主所beh行ê tāichì，有先指示法老。 | 註釋 串珠 康來昌 原文 典藏 |
| 41:26 | 七隻好ê牛母是七年，七穗好ê，mā是七年；兩 个夢是一个意思。 | 註釋 串珠 康來昌 字典 原文 典藏 |
| 41:27 | Hiahê tòe後起來ê七隻瘦koh khiap-sì ê牛母，是七年；hiahê七穗空冇koh hō͘東風掃pháiⁿ ê，mā是七年；lóng表示ē有七年ê飢荒。 | 註釋 串珠 康來昌 字典 原文 典藏 |
| 41:28 | 上帝所beh做ê tāichì，有顯明tī法老；這是我對法老所講ê。 | 註釋 串珠 康來昌 原文 典藏 |
| 41:29 | 你看，埃及全地會tú tio̍h大好年冬七年， | 註釋 串珠 康來昌 原文 典藏 |
| 41:30 | tòe後koh ētú tio̍h飢荒七年，甚至tī埃及地lóng ēbē記得以前ê好收成，全地lóngē hō͘飢荒滅掉。 | 註釋 串珠 康來昌 原文 典藏 |
| 41:31 | 因為以後ê飢荒siuⁿ傷重，to̍h m̄知以前地方ê好收成。 | 註釋 串珠 康來昌 原文 典藏 |
| 41:32 | 法老做兩pái ê眠夢，是因為上主定tio̍h chitê tāichì，koh ē真緊來完成。 | 註釋 串珠 康來昌 原文 典藏 |
| 41:33 | 「所以，法老tio̍h揀一个聰明koh有智慧ê人，派伊治理埃及地。 | 註釋 串珠 康來昌 原文 典藏 |
| 41:34 | 法老tio̍h ánne行，koh設立官員管理chitê地。當七年好年冬ê時，tio̍h kā埃及地所收成ê，五份徵收一份， | 註釋 串珠 康來昌 原文 典藏 |
| 41:35 | hō͘ in tī將來ê好年冬，積聚一切ê米糧。Tio̍h聚集五穀，lóng歸tī法老ê手頭；收藏起來，thang做ta̍k个城ê食物。 | 註釋 串珠 康來昌 原文 典藏 |
| 41:36 | 所積聚ê米糧，thang做埃及地將來七年飢荒ê路用，免得chitê地hō͘飢荒所滅。」 | 註釋 串珠 康來昌 原文 典藏 |
| 41:37 | 約瑟受命管理埃及法老kah伊所有ê人臣lóng贊成chitê做法。 | 註釋 串珠 康來昌 原文 典藏 |
| 41:38 | 法老對伊ê人臣講：「咱kám ēchhōe tio̍h一个親像伊chit款ê人，有上帝ê靈tī伊ê內面？」 | 註釋 串珠 康來昌 原文 典藏 |
| 41:39 | 法老對約瑟講：「上帝已經kā chitê tāichì lóng指示你，可見無人親像你有chit款ê聰明智慧。 | 註釋 串珠 康來昌 原文 典藏 |
| 41:40 | 你thang來管理我ê家，我ê人民lóng tio̍h聽你ê話，hō͘你管理。獨獨tī寶座，我比你khah大。」 | 註釋 串珠 康來昌 字典 原文 典藏 |
| 41:41 | 法老kā約瑟講：「我舉起你來管轄埃及全地。」 | 註釋 串珠 康來昌 原文 典藏 |
| 41:42 | 法老就剝伊手裡做印ê手指，掛tī約瑟ê指頭á，kā伊穿幼苧衫，koh kā金鍊á掛tī伊ê頷頸。 | 註釋 串珠 康來昌 字典 原文 典藏 |
| 41:43 | 伊koh hō͘約瑟坐伊ê第二號車；開路ê大聲hoah：「跪！」Án-ne，法老設立伊來治理埃及全地。 | 註釋 串珠 康來昌 字典 原文 典藏 |
| 41:44 | 法老對約瑟講：「我是法老，若無你出聲指示，tī埃及全地，m̄准人隨便動腳動手。」 | 註釋 串珠 康來昌 原文 典藏 |
| 41:45 | 法老欽賜約瑟ê名叫做Chap-nat-pa-né-ah，koh kā Ong城ê祭司Pho-ti-hoe-la̍h ê chabó͘ kiáⁿ A-se-nat hō͘伊做bó͘。約瑟to̍h出巡埃及地。 | 註釋 串珠 康來昌 原文 典藏 |
| 41:46 | 約瑟見埃及王法老ê時，hit年三十歲。約瑟tùi法老ê面前出去，遍行埃及全地。 | 註釋 串珠 康來昌 原文 典藏 |
| 41:47 | 七个好年冬ê內面，地ê出產非常豐盛。 | 註釋 串珠 康來昌 原文 典藏 |
| 41:48 | 約瑟聚集埃及地七个好年冬所有ê米糧，kā米糧積聚tī ta̍k个城；四箍圍田地ê米糧，lóng積聚tī它ê本城。 | 註釋 串珠 康來昌 原文 典藏 |
| 41:49 | 約瑟積聚五穀極chē，親像海邊ê沙；伊算kah停止無算，因為算bē了。 | 註釋 串珠 康來昌 原文 典藏 |
| 41:50 | 飢荒ê年未到以前，Ong城ê祭司Pho-ti-hoe-la̍h ê chabó͘ kiáⁿ A-se-nat kā約瑟生兩 个kiáⁿ。 | 註釋 串珠 康來昌 原文 典藏 |
| 41:51 | 約瑟kā大kiáⁿ號名叫做瑪拿西，因為伊講：「上主hō͘我bē記得我一切ê困苦kah我ê老父ê全家。」 | 註釋 串珠 康來昌 原文 典藏 |
| 41:52 | 伊kā第二kiáⁿ號名叫做以法連，因為伊講：「上帝hō͘我tī我受苦ê所在興旺。」 | 註釋 串珠 康來昌 原文 典藏 |
| 41:53 | 埃及第七年好年冬一下結束， | 註釋 串珠 康來昌 原文 典藏 |
| 41:54 | 七年ê飢荒to̍h來。Τú-tú照約瑟所講ê，ta̍k國lóng有飢荒；獨獨埃及全地有米糧。 | 註釋 串珠 康來昌 字典 原文 典藏 |
| 41:55 | 到埃及全地有飢荒，眾人對法老哀求米糧。法老對埃及ê人民講：「Lín去chhōe約瑟，所有伊所講ê，lín lóng tio̍h照做。」 | 註釋 串珠 康來昌 字典 原文 典藏 |
| 41:56 | 當時飢荒遍滿天下，約瑟開ta̍k所在ê粟倉，糶米糧hō͘埃及人；tī埃及地飢荒真傷重。 | 註釋 串珠 康來昌 原文 典藏 |
| 41:57 | Ta̍k國ê人lóng去埃及，到約瑟hia糴米糧，因為天下飢荒真傷重。 | 註釋 串珠 康來昌 原文 典藏 |