| 章節 | 全民台語聖經全羅經文 | 註釋 |
| 5:1 | Bel-sia-chal Ông ê Iàn-se̍kBel-sia-chal ông siat tōa iàn-se̍k, chhiáⁿ i ê tāi-sîn chi̍t chheng lâng, tī hit chi̍t chheng lâng ê bīn-chêng lim chiú. | 註釋 串珠 原文 典藏 |
| 5:2 | Bel-sia-chal khí-thâu lim chiú ê sî, hoan-hù lâng kā i ê lāu-pē Nep-kat-ne-chal tùi Ê-lú-sa-lèm ê tiān lāi só͘ chhiúⁿ kim-gîn ê khì-kū the̍h-.lâi, hō͘ ông kah i ê tāi-sîn í-ki̍p i ê hō͘-hui thang ēng chiahê khì-kū lim chiú. | 註釋 串珠 原文 典藏 |
| 5:3 | In chiū kā só͘ chhiúⁿ Ê-lú-sa-lèm Siōng-tè ê tiān lāi kim ê khì-kū the̍h-.lâi, ông kah tāi-sîn, hō͘-hui ēng hiahê khì-kū lâi lim. | 註釋 串珠 原文 典藏 |
| 5:4 | In lim chiú, oló in kim, gîn, tâng, thih, chhâ kah chio̍h-thâu ê sîn-bêng. | 註釋 串珠 原文 典藏 |
| 5:5 | Hit sî, hut-jiân lâng ê chhiú-chéng-thâu-á chhut-hiān, tī ông-kiong kah teng-tâi sio-tùi ê hún-piah siá jī, ông khòaⁿ tio̍h siá jī ê chhiú, | 註釋 串珠 原文 典藏 |
| 5:6 | ông ê bīn chiū sit-sek, sim-lāi kiaⁿ-hiâⁿ, io-kut thu̍t-lûn, kha-thâu-u sio kha̍p. | 註釋 串珠 原文 典藏 |
| 5:7 | Ông tōa-siaⁿ bēng-lēng, tiàu hiahê su̍t-sū, Kal-tí-ah lâng, chiam-pok ê lóng ji̍p-.lâi. Ông tùi Ba-bú-lông tì-hūi ê lâng kóng, khòaⁿ siáⁿ lâng ē-hiáu tha̍k chit-ê bûn-jī, kái-bêng hō͘ góa chai, góa beh hō͘ i chhēng chí-sek ê phàu, ām-kún kòa kim-liān, tī kok lāi ê chit ūi pâi tē-saⁿ. | 註釋 串珠 字典 原文 典藏 |
| 5:8 | Tùi hit sî khí, ông só͘-ū ê tì-hūi lâng lóng ji̍p-.lâi; chóng-.sī, in bē hiáu tha̍k hit-ê bûn-jī, mā bē hiáu kái-bêng hō͘ ông chai. | 註釋 串珠 原文 典藏 |
| 5:9 | Bel-sia-chal ông chin kiaⁿ-hiâⁿ, bīn sit-sek, i ê tāi-sîn mā lóng tio̍h-kiaⁿ kah gāng-.khì. | 註釋 串珠 原文 典藏 |
| 5:10 | Ông-hō͘ in-ūi ông kah i ê tāi-sîn só͘ kóng ê ōe, chiū ji̍p-khì pān iàn-se̍k ê chhù, ông-hō͘ kā i kóng, " Goān ông bān-sòe! Lí ê sim m̄ thang kiaⁿ-hiâⁿ, bīn m̄ thang sit-sek. | 註釋 串珠 原文 典藏 |
| 5:11 | Tī lí ê kok lāi ū chi̍t-ê lâng, i ê sim-lāi ū sèng ê Siōng-tè ê sîn-lêng. Lí ê lāu-pē chāi-seⁿ ê ji̍t-chí, khòaⁿ-chhut i ê sim-lāi ū kng-bêng, chhong-bêng kah tì-hūi, chhin-chhiūⁿ chiahê sîn-bêng ê tì-hūi. Lí ê lāu-pē — Nep-kat-ne-chal ông, to̍h-sī ông lí ê lāu-pē, kā i siat-li̍p chò chheⁿ-siōng-ka, su̍t-sū, Kal-tí-ah lâng kah chiam-pok-chiá ê thâu-lâng. | 註釋 串珠 原文 典藏 |
| 5:12 | I ū hó sèng-chêng, ū tì-sek koh chhong-bêng, ē oân-bāng, ē khui-thiah ò-biāu, kái-sek giâu-gî ê tāichì. Chit-ê lâng ê miâ kiò-chò Ta-ni-el, ông koh kā i chheng-chò Bel-ti-sia-chal. Taⁿ lí thang kiò Ta-ni-el lâi, i ē kā lí kái-bêng. " | 註釋 串珠 原文 典藏 |
| 5:13 | Ta-ni-el Kái-soeh Piah-téng ê JīIn chiū chhōa Ta-ni-el lâi-kàu ông ê bīn-chêng. Ông mn̄g Ta-ni-el kóng, " Lí sī siū lia̍h ê Iô-tah lâng tiong-kan ê Ta-ni-el, to̍h-sī góa ê lāu-pē chò ông ê sî, tùi Iô-tah kā lí lia̍h-.lâi ê, sī-.bô? | 註釋 串珠 原文 典藏 |
| 5:14 | Góa thiaⁿ-kóng lí ê sim-lāi ū hit-ê Siōng-tè ê sîn-lêng, jî-chhiáⁿ lí ū kng-bêng, chhong-bêng kah hó ê tì-hūi. | 註釋 串珠 原文 典藏 |
| 5:15 | Taⁿ hiahê tì-hūi ê lâng kah su̍t-sū í-keng hông chhōe lâi góa ê bīn-chêng, beh hō͘ in tha̍k hiahê bûn-jī lâi kái-bêng hō͘ góa chai, chóng-.sī, in bē hiáu kái-bêng chit-ê tāichì. | 註釋 串珠 原文 典藏 |
| 5:16 | Góa bat thiaⁿ tio̍h lí ê tāichì, lí gâu kái-bêng, ē kái-sek giâu-gî ê tāichì; taⁿ lí nā ē-hiáu tha̍k chit-ê bûn-jī, kái-bêng hō͘ góa chai, góa chiū beh hō͘ lí chhēng chí-sek ê phàu, ām-kún kòa kim-liān, tī kok lāi ê chit ūi pâi tē-saⁿ. " | 註釋 串珠 字典 原文 典藏 |
| 5:17 | Ta-ni-el tī ông ê bīn-chêng ìn kóng, " Lí ê chióng-phín thang kui tī lí pún-sin, lí ê pò-siúⁿ thang kui hō͘ pa̍t lâng; chóng-.sī, góa beh kā ông tha̍k chit-ê bûn-jī, kái-bêng hō͘ ông chai. | 註釋 串珠 原文 典藏 |
| 5:18 | " Ông, chì-koân Siōng-tè bat kā kok-ūi, tōa-koân, êng-iāu kah ui-hong, siúⁿ-sù hō͘ lí ê lāu-pē — Nep-kat-ne-chal; | 註釋 串珠 原文 典藏 |
| 5:19 | In-ūi Siōng-tè só͘ siúⁿ-sù I ê tōa-koân, chiahê jîn-bîn, chiahê kok, chiahê khiuⁿ-kháu ê lâng lóng tī i ê bīn-chêng kiaⁿ kah phi̍h-phi̍h chhoah. I sûi-ì hō͘ lâng sí, sûi-ì hō͘ lâng oa̍h, sûi-ì kā lâng ko-seng, sûi-ì kā lâng kàng kē. | 註釋 串珠 原文 典藏 |
| 5:20 | Chóng-.sī, i ê sim kiau-ngō͘, i ê sèng giám-ngē, tì-sú kiâⁿ-ta̍h kiau-ngō͘, chiū hông lut i ê ông-ūi, chhiúⁿ-toa̍t i ê êng-kng. | 註釋 串珠 字典 原文 典藏 |
| 5:21 | I siū kóaⁿ-chhut lī-khui lâng, i ê sim piàn-chò chhin-chhiūⁿ cháu-siù ê sim; i kah iá-lî chò-hóe tòa, koh chia̍h chháu chhin-chhiūⁿ gû; i ê seng-khu hō͘ thiⁿ ê lō͘-chúi sip-tâm, ti̍t-kàu i chai chì-koân Siōng-tè chiáng-koán lâng ê kok, chiàu I ê ì-sù siat-li̍p lâng lâi tī-lí. | 註釋 串珠 字典 原文 典藏 |
| 5:22 | " Bel-sia-chal, lí sī i ê kiáⁿ, lí sûi-jiân chai che it-chhè, lí ê sim bô kakī khiam-pi, | 註釋 串珠 原文 典藏 |
| 5:23 | kèng-jiân kiau-ngō͘ lâi kong-kek thiⁿ-téng ê Chú. Lí ū chhe lâng tòa I tiān lāi ê khì-kū kàu tī lí ê bīn-chêng, lí kah lí chiahê tāi-sîn í-ki̍p lí ê hō͘-hui lóng ēng i lâi lim chiú. Lí koh oló hiahê gîn, kim, tâng, thih, chhâ kah chio̍h-thâu só͘ chò ê sîn-bêng, to̍h-sī bē khòaⁿ, bē thiaⁿ, bē chai ê; chóng-.sī, koán lí ê chhoán-khùi, tiāⁿ tio̍h lí ê cho-gū ê Siōng-tè, lí khiok bô êng-kng I. | 註釋 串珠 原文 典藏 |
| 5:24 | Chiū ánne, I tùi I ê bīn-chêng chhun-chhut hit ki chhiú lâi siá chit-ê bûn-jī. | 註釋 串珠 原文 典藏 |
| 5:25 | " Só͘-siá ê bûn-jī to̍h-sī: " MENE, MENE, TEKEL, UPARSIN"（ Chù, A-lân bûn,Ì-sù sī"soàn-su̍t, soàn-su̍t, chhìn-thûi, hun-lia̍t". Lēng-gōa ì-sù khó-lêng sī"saⁿ chióng tāng-liōng ê tan-ūi" ） | 註釋 串珠 原文 典藏 |
| 5:26 | ì-sù to̍h-sī ánne: " MENE " to̍h-sī Siōng-tè í-keng sǹg lí ê kok ê nî-ji̍t, koh hō͘ i kiat-sok. | 註釋 串珠 原文 典藏 |
| 5:27 | " TEKEL " to̍h-sī lí tī thian-phêng siū chhìn, hián-bêng lí ê bô kàu-gia̍h. | 註釋 串珠 原文 典藏 |
| 5:28 | " PERES"（ Chù, A-lân bûn " PARSIN " ê tan-sò͘ hêng, chêng-tì ê "U" sī " Kah "ê ì-sù ）Chiū-sī lí ê kok hun-lia̍t, kui hō͘ Ma-tái lâng kah Phel-siah lâng. | 註釋 串珠 原文 典藏 |
| 5:29 | In-ūi ánne, Bel-sia-chal chhut lēng, lâng chiū kā chí-sek phâu hō͘ Ta-ni-el chhēng, ēng kim-liān khòa tī i ê ām-kún, koh thoân-lēng hō͘ i tī kok lāi ê chit ūi pâi tē-saⁿ. | 註釋 串珠 字典 原文 典藏 |
| 5:30 | Tī hit mê, Kal-tí-ah ông — Bel-sia-chal hō͘ lâng thâi-sí. | 註釋 串珠 原文 典藏 |
| 5:31 | Ma-tái lâng Ta-lió-suh tit tio̍h kok-ūi, hit sî i la̍k-cha̍p-jī hòe. | 註釋 串珠 原文 典藏 |