列王紀下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
17:1 以色列王何細亞
偤大王亞哈斯十二年，以拉ê kiáⁿ何細亞tī撒馬利亞坐位，做以色列王共九年。
17:2 伊行上主所看做pháiⁿ ê tāichì，總是，無親像伊以前ê以色列chiahê王。
17:3 亞述王Sial-man-sel起來kā伊攻擊。何細亞就屈服，kā伊進貢。
17:4 亞述王知何細亞有計謀背叛，因為伊bat差使者去見埃及王梭，koh無進貢亞述王，親像以前年年ê所做。所以，亞述王kā伊關禁，kā伊縛tī監裡。
17:5 撒馬利亞陷落
亞述王起來遍行hitê地，koh起來圍攻撒馬利亞三年。
17:6 何細亞第九年，亞述王征服撒馬利亞，kā以色列人掠到亞述，kā in安置tī哈臘kah Ha-bo͘l，tī歌散河邊ê kah瑪代人hiahê城。
17:7 這是因為以色列人得罪上主—in ê上帝，to̍h是chhōa in出埃及地，脫離埃及王法老ê手ê，in去敬畏別个神明，
17:8 遵thàn上主tī以色列ê頭前所趕出ê外邦人，kah以色列列王所設ê規例。
17:9 以色列人偷偷á行不義ê tāichì，得罪上主—in ê上帝，tī in hiahê城，tùi守更樓到堅固ê城，起山頭壇。
17:10 Tī ta̍k个高山ê頂面，ta̍k欉青翠ê樹腳，khiā柱像，kah hiahê亞舍拉；
17:11 koh tī hia ê ta̍k个山頭壇燒香，親像上主tī in ê頭前所趕出ê外邦人ê所行，koh行hiahê pháiⁿ事來激上主ê受氣。
17:12 In koh服事偶像，to̍h是上主所kā in吩咐講m̄ thang ánne做ê。
17:13 總是，上主託眾先知kah先見，對以色列kah偤大做見證，講：「Tio̍h離開lín ê pháiⁿ所行，執守我ê誡命kah律例，照我吩咐lín ê祖先kah託我ê奴僕眾先知所傳hō͘ lín完全ê律法。」
17:14 總是，in m̄聽，硬in ê頷頸，親像in ê祖先硬in ê頷頸，m̄信服上主—in ê上帝ê。
17:15 In mā棄sak祂ê律例，以及祂kah in ê祖先所立ê約，kah對in所見證ê見證，去遵thàn虛假，來kakī 做虛假，學四箍圍ê外邦人，hiahê人to̍h是上主bat命令in m̄ thang學in ê所行ê。
17:16 In離開上主—in ê上帝所有ê誡命，為本身鑄像，to̍h是兩隻牛á做亞舍拉，敬拜天頂ê萬象，服事巴力。
17:17 Koh hō͘ in ê kiáⁿ兒經過火，mā用占卜kah邪術，出賣kakī 去行上主所看做pháiⁿ ê tāichì，激祂ê受氣。
17:18 所以，上主對以色列人大受氣，趕in離開祂ê面前，獨獨chhun偤大一支族niā-niā。
17:19 偤大mā無遵thàn上主—in ê上帝ê誡命，to̍h是遵thàn以色列所立ê規例。
17:20 上主棄sak以色列ê眾kiáⁿ孫，kā in苦毒，kā in交tī搶掠in ê人ê手，到尾kā in趕出，hō͘ in離開祂ê面前。
17:21 因為拆以色列hō͘伊離開大衛ê家，in to̍h設立尼八ê kiáⁿ耶羅波安做王。耶羅波安逼以色列hō͘ in無遵thàn上主，hō͘ in犯大罪。
17:22 以色列人行耶羅波安所犯一切ê罪，無離開hiahê罪。
17:23 致使上主遷徙以色列離開祂ê面前，照祂託祂ê奴僕眾先知所講ê。Án-ne以色列受掠，離開本地去到亞述，直到今á日。
17:24 亞述人遷來以色列
亞述王tùi巴比倫、Ku-t、A-boah、哈馬kah西法瓦音，遷徙人來撒馬利亞，kā in安置tī hiahê城，代替以色列人；in to̍h得tio̍h撒馬利亞，來tòa hiahê城。
17:25 In起頭tòa tī hia ê時，無敬畏上主，所以，上主hō͘獅入去in中間，咬死幾nā个人。
17:26 有人報亞述王，講：「你所遷徙安置tī撒馬利亞hiahê城ê列邦人，m̄知hit所在ê上主ê規例，所以，祂hō͘獅入來in中間，kā in咬死。」因為in m̄知hit所在ê上帝ê規例。
17:27 亞述王to̍h命令講：「Tùi hia掠來ê祭司，thang hō͘ in一个tńg去，hō͘伊tī hia tòa，用hit所在ê上帝ê規例kā in教示。」
17:28 就ánne，hiahê tùi撒馬利亞所掠去ê祭司，一个tńg來tòa tī伯特利，kā in教示tio̍h án怎來敬畏上主。
17:29 總是，ta̍k邦國ê人造in kakī ê神明，ta̍k國ê人tī in所tòa hiahê城tī撒瑪利亞人前所造ê山頭廟安置神明ê像。
17:30 巴比倫人造Su-ko͘t-be-no͘t，Ku-t人造Nel-gal，哈馬人造A-sī-má；
17:31 A-boah人造Nip-ha-chuh kah Thal-thak，西法瓦音人用火燒kiáⁿ兒，獻hō͘西法瓦音ê神明A-to-lam-me-le̍k kah A-nam-me-le̍k。
17:32 In ánne敬畏上主，tùi群眾中設立人做山頭壇ê祭司，替in tī山頭廟獻祭。
17:33 In敬畏上主，koh服事kakī ê神明，tùi啥物國徙來，就遵thàn hit國ê規例。
17:34 In到今á日iáu koh照早前ê風俗去行，無敬畏上主，無遵thàn in ê律例kah in ê規例，mā無照上主命令雅各kiáⁿ孫ê律法kah誡命。雅各to̍h是祂所稱做以色列ê。
17:35 上主bat kah in立約，kā in吩咐講：「M̄-thang敬畏別个神明，m̄ thang跪拜，m̄ thang kā伊服事，m̄ thang對伊祭獻。
17:36 獨獨hitê用大權能kah伸出ê手骨chhōa lín出埃及地 ê上主，lín tio̍h敬畏祂，kā祂跪拜，kā祂祭獻。
17:37 祂寫hō͘ lín ê律例、禮儀、律法kah誡命，lín應該永遠執守遵thàn，m̄ thang敬畏別个神明。
17:38 我kah lín所立ê約，lín m̄ thang bē記得，mā m̄ thang敬畏別个神明。
17:39 總是，tio̍h敬畏上主—lín ê上帝，祂ē救lín脫離lín一切對敵ê手。」
17:40 總是，in m̄遵thàn，猶原照早前ê風俗去行。
17:41 Án-ne，chiahê列國mā敬畏上帝，mā服事in ê偶像。in ê kiáⁿ，in ê孫，mā lóng是ánne，in ê祖先所行ê，到今á日in mā照ánne行。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。