列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
8:1 迎接約櫃入聖殿
(代下5：2-6：2)
Hit時，所羅門聚集以色列ê長老kah ta̍k支族ê首領，以及以色列人hiahê族長，來到耶路撒冷所羅門王hia，beh kā上主ê約櫃tùi大衛城，to̍h是錫安，運來。
8:2 Tī以他念月，to̍h是七月ê節期，以色列人lóng聚集來到所羅門王hia。
8:3 以色列ê長老lóng來；hiahê祭司扛約櫃。
8:4 Into̍h kā上主ê櫃kah會幕，以及布棚內一切聖ê器具運來；祭司kah利未人lóng kā它扛起來。
8:5 所羅門王kah聚集來到伊hia ê以色列ê全會眾，tī約櫃前獻羊kah牛做祭祀，數目chē到bē算得，mā算bē了。
8:6 祭司扛上主ê約櫃來到它ê所在，入去hit間後殿，to̍h是至聖所，kā它hē tī ki-lō͘-peng ê翼下。
8:7 因為ki-lō͘-peng thí開in ê翼，tī櫃ê所在ê頂面，所以有ki-lō͘-peng tī hit頂面遮蓋櫃kah它ê槓（kǹg）。
8:8 Hiahê槓真長，槓尾tī後殿前ê聖所看ētio̍h，tī外面to̍h看bē tio̍h；到今á日iáu tī hia。
8:9 櫃內只有兩塊石碑，to̍h是以色列人出埃及地，上主kah in立約ê時，摩西tī何烈山所hē ê，這以外無別項物。
8:10 當祭司tùi聖所出來ê時，有雲充滿上主ê殿；
8:11 致使祭司為tio̍h雲ê緣故bē tàng khiā-teh服事，因為上主ê榮光充滿上主ê殿。
8:12 Hit時，所羅門講：「上主bat講祂ētiàm tī烏烏暗暗ê所在；
8:13 我已經起chit間殿hō͘祢tòa，做祢永遠tòa ê所在。」
8:14 所羅門對人民ê教示
(代下6：3-11)
王oa̍t-tńg伊ê面祝福以色列會眾；以色列會眾lóng khiā起來。
8:15 伊講：「上主—以色列ê上帝是應該oló ê，因為祂親嘴對我ê老父大衛應允ê，mā親手kā伊應驗。伊講：
8:16 『Tùi我chhōa我ê子民—以色列人出埃及以來，我m̄ bat tī以色列眾支族中間揀一个城，起殿hō͘我ê名tī hia，獨獨揀大衛治理我ê子民—以色列人。』
8:17 「我ê老父大衛心內有意思，beh為上主—以色列ê上帝ê名起殿。
8:18 總是，上主對我ê老父大衛講：『你ê心有意思beh為我ê名起殿，你chitê意思真好。
8:19 總是，你m̄ thang起殿，你所親生ê kiáⁿē為我ê名起殿。』
8:20 「Taⁿ上主應驗祂所講ê話，我照上主ê話起來續接我ê老父大衛，坐以色列ê國位，koh為上主—以色列上帝ê名起殿。
8:21 我mā tī hia為約櫃準備一个所在，櫃內有上主ê約，to̍h是祂chhōa咱ê祖先出埃及ê時，kah in所立ê約。」
8:22 所羅門ê祈禱
(代下6：12-42)
所羅門當以色列會眾ê面前，khiā tī上主ê壇前，gia̍h起手ǹg天，講：
8:23 「上主—以色列ê上帝ah，tī天頂，tī地下，無有神明親像祢守約koh行疼心tī祢hiahê奴僕，to̍h是盡心行tī祢ê面前ê。
8:24 祢對祢ê奴僕—我ê老父大衛所應允ê，祢有守約。祢親嘴講ê，有親手kā它應驗，tú照今á日ê款。
8:25 上主—以色列ê上帝ah，祢有應允祢ê奴僕—我ê老父大衛講：『你ê kiáⁿ孫若謹慎in ê所做，行tī我ê面前，親像你行tī我ê面前，就屬tī你ê beh tī我ê面前坐以色列ê國位永無斷』，taⁿ求祢kā它應驗。
8:26 以色列ê上帝ah，祢對祢ê奴僕—我ê老父大衛所講ê，求祢hō͘它成做事實。
8:27 「上帝kám真正會tòa tī地chiūⁿ？你看，天kah chiahê天ê天尚且無夠額thang hō͘祢tòa，何況我所起ê chit間殿？
8:28 上主—我ê上帝ah，願祢àⁿ落數念祢ê奴僕ê祈禱kah懇求，來聽祢ê奴僕今á日tī祢面前所祈禱ê求叫。
8:29 願祢暝日看顧chitê殿，to̍h是祢所講起ê『我ê名beh tī hia』ê所在，來聽祢ê奴僕所beh ǹg chit所在祈禱ê祈禱。
8:30 祢ê奴僕kah祢ê子民—以色列人ǹg chit所在祈禱ê時，願祢聽in ê祈求，願祢tī天裡—祢tòa ê所在來聽in ê祈求，祢聽tio̍h ê時to̍h kā in赦免。
8:31 「人若得罪伊ê厝邊，koh有人用一个chiùchōa kah伊chiùchōa，伊若來chit間殿，tī祢ê壇前chiùchōa ê時，
8:32 求祢tī天裡垂聽來kā伊辦理；審判祢chiahê奴僕，定pháiⁿ人ê罪，照伊所行ê報應tī伊ê頭殼；定義人做義，照伊ê義來hō͘伊。
8:33 「設使祢ê子民—以色列人，因為得罪祢，chiah tī對敵ê面前thâi輸，in若歸向祢，認祢ê名，koh tī chit間殿祈禱，kā祢懇求，
8:34 求祢tī天裡聽in ê祈禱，來赦免祢ê子民—以色列ê罪，hō͘ in tńg來祢所賞賜hō͘ in ê祖先ê地。
8:35 「設使in得罪祢，致使天關密，無落雨；祢kā in刑罰ê時，in若ǹg chit所在祈禱，認祢ê名，離開in ê罪，
8:36 求祢tī天裡聽in ê祈禱，赦免祢ê奴僕kah祢ê子民—以色列ê罪；tī祢教示in所tio̍h行ê好路ê時，koh落雨tī祢ê地，to̍h是祢賞賜祢ê子民做產業ê。
8:37 「Chitê地若有飢荒、瘟疫、乾燥、朽爛、草蜢、剪蟲，á是in ê對敵tī in hiahê城ê地kā in圍困，無論有啥物災禍，啥物破病，
8:38 祢ê子民—以色列ê群眾，無論是個人，á是群眾，若ta̍k个知kakī 心內ê災禍，ǹg chit間殿gia̍h起手，無論án怎懇求，án怎祈禱，
8:39 願祢tī天裡，祢所tòa ê所在，來聽，來赦免，來施行。祢知in ê心，照in ta̍k人ê行為來款待in，(因為世間ta̍k人ê心，只有祢知)，
8:40 hō͘ in tī祢賞賜hō͘阮祖先ê地，一世人敬畏祢。
8:41 「若是外邦人，in m̄是屬祢ê子民—以色列，伊為tio̍h祢ê名tùi遠遠ê所在來ê，
8:42 (因為in聽tio̍h祢ê大名，大權能ê手，伸出ê手。)若來ǹg chitê殿祈禱，
8:43 願祢tī天裡祢tòa ê所在，來聽in ê祈禱，照外邦人一切所對祢求ê來行，hō͘天下萬民lóng bat祢ê名，敬畏祢，親像祢ê子民—以色列，koh hō͘ in知我所起chit間殿是用祢ê名來稱呼ê。
8:44 「祢ê子民若出去祢所差in去ê路kah對敵交戰，mā ǹg祢所揀ê城，kah我為tio̍h祢ê名所起ê殿，來對上主祈禱，
8:45 願祢tī天裡來聽in ê祈禱kah懇求，來kā in判斷。
8:46 「祢ê子民若得罪祢，(因為無有無犯罪ê人)，祢對in受氣，kā in交hō͘對敵，致使對敵掠in到對敵ê地，á是遠，á是近ê所在，
8:47 in若tī所掠去ê地，心內倒tńg來想，來悔改，koh tī掠in ê人ê地，懇求祢講：『阮有罪，阮有悖逆，阮有做pháiⁿ』；
8:48 in若tī受掠去ê所在，to̍h是對敵掠in去ê所在，盡心、盡性歸服祢，koh ǹg本地，to̍h是祢賞賜hō͘ in祖先ê地kah祢所揀ê城，以及我為tio̍h祢ê名所起ê殿，來對祢祈禱，
8:49 願祢tī天裡祢所tòa ê所在，聽in ê祈禱kah懇求，kā in判斷；
8:50 koh赦免祢ê子民得罪祢ê，以及in一切得罪祢ê罪過，hō͘ in tī掠in ê人ê面前得tio̍h憐憫，致使掠in ê人kā in憐憫。
8:51 因為in是祢ê子民，祢ê產業，是祢chhōa in出埃及，tùi鑄鐵ê爐中出來ê。
8:52 「願你開目chiu 開來看顧祢ê奴僕，kah祢ê子民—以色列ê祈禱，來聽in一切對祢懇求ê。
8:53 至koân上主ah，因為祢bat tùi地chiūⁿ眾人ê中間kā in分別出來做祢ê產業，是照祢chhōa阮ê祖先出埃及ê時，託祢ê奴僕摩西所講ê。」
8:54 祝福人民
所羅門tī上主ê壇前，腳頭u跪teh，伸手ǹg天，已經對上主祈禱懇求了後，to̍h起來。
8:55 伊khiā ·leh，大聲祝福以色列全會眾，講：
8:56 「上主是應該tio̍h oló ê，因為祂一切所應允ê，賞賜平安hō͘祂ê子民—以色列；見若託祂ê奴僕摩西所應允ê好話，無一句落空。
8:57 願上主—咱ê上帝kah咱同在，親像祂kah咱ê祖先同在。願祂無離開咱，無放sak咱，
8:58 hō͘咱ê心歸向祂，來行祂一切ê道路，守祂所命令咱ê祖先ê誡命、律例、法度。
8:59 我taⁿ tī上主ê面前所祈求chiahê話，願chiahê話暝日近tī咱ê上帝—上主，koh日日照所合宜ê為祂ê奴僕判斷，mā為祂ê子民—以色列判斷，
8:60 hō͘地chiūⁿ萬民知影上主是上帝，祂以外無別个。
8:61 所以，lín ê心tio̍h完全ǹg上主—咱ê上帝，遵thàn祂ê律例，守祂ê誡命，親像今á日ánne。」
8:62 聖殿獻堂典禮
(代下7：4-10)
王kah以色列眾人做伙tī上主ê面前獻祭。
8:63 所羅門獻謝恩ê祭，to̍h是獻hō͘上主牛二萬二千隻，羊十二萬隻。Án-ne，王kah以色列眾人，為上主ê殿行獻殿ê禮。
8:64 當hit日，王分別上主殿前院中ê所在為聖，tī hia獻燒祭、素祭kah謝恩祭ê油，因為上主頭前ê銅壇siuⁿ細，bē容允得hiahê燒祭、素祭kah謝恩祭ê油。
8:65 Hit時，所羅門kah以色列人民，to̍h是tùi哈馬ê路口到埃及ê溪，lóng kah伊聚集成做大會，tī上主—咱ê上帝ê面前守節筵七日koh七日，共十四日。
8:66 第八日，王差人民散去；in to̍hka7王祝福；因為上主對祂ê奴僕—大衛kah祂ê子民—以色列所施出一切ê恩惠，in to̍h歡喜，心內快樂，ta̍k个tńg去in ê布棚。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。