列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
6:1 所羅門起造聖殿
以色列人出埃及地了後四百八十年，所羅門做以色列王，第四年西弗月，to̍h是二月，動工起上主ê殿。
6:2 所羅門王為上主所起ê殿，長六十肘，闊二十肘，高三十肘。
6:3 殿前ê門廊長二十肘，kah殿ê闊平，門廊ê闊十肘。
6:4 Koh為殿做窗，有關死ê窗á格。
6:5 Óa tī殿ê牆，四箍圍起樓；to̍h是óa tī殿ê牆ê四箍圍，前殿kah後殿lóng是ánne，tī四箍圍起邊房。
6:6 邊房ê下層闊五肘，中層闊六肘，第三層闊七肘。Tī殿ê外面做壁階tī它ê四箍圍，hō͘邊房ê楹á無插入去殿ê牆。
6:7 殿teh起ê時，是用山中phah好ê石。起殿ê時，鎚、斧頭kah其他鐵器ê聲音lóng無聽tio̍h。
6:8 邊房ê中房ê門，是tī殿ê正pêng，tùi捲螺梯上中層，tùi中層koh上到第三層。
6:9 就ánne，殿起到好勢，to̍h用柏香柴ê楹，柏香柴ê板，遮蓋殿。
6:10 伊koh óa tī kui間ê殿起三樓ê邊房，ta̍k層高五肘；chiahê邊房lóng用柏香柴掛（khòa）tī殿外牆ê壁階。
6:11 上主ê話臨到所羅門講：
6:12 「講tio̍h你所起chit間殿，你若行我ê律例，遵thàn我ê法度，守我一切ê誡命，照ánne行，我to̍h ē照我所應允你ê老父大衛ê話，應驗tī你。
6:13 我ētiàm tī以色列人ê中間，mā無放sak我ê子民—以色列人。」
6:14 所羅門起殿已經完成。
6:15 聖殿內部ê裝設
(代下3：8-14)
伊用柏香柴板起做殿ê內牆；tùi殿ê土腳到楹á，lóng用柴kā它蓋，koh用松樹板舖殿ê土腳。
6:16 伊koh tī殿ê後面，用柏香柴板tùi土腳到楹á起隔一間深二十肘ê殿，tùi土腳到楹á，kā它做tī內面，成做後殿，to̍h是至聖所。
6:17 後殿前ê殿深四十肘。
6:18 殿內ê柏香柴lóng有刻瓠á kah花蕊，殿內lóng是貼柏香柴，無看tio̍h一塊石。
6:19 殿ê內面有準備後殿，beh tī hia安置上主ê約櫃。
6:20 後殿ê內面長二十肘，闊二十肘，高二十肘，lóng用純金來安，mā用柏香柴蓋壇。
6:21 殿內，所羅門lóng用純金來安；後殿ê頭前牽金鍊á，mā用純金來安。
6:22 全殿lóng安金，一直到hit間殿lóng起好；tī後殿ê壇，mā lóng安金。
6:23 Tī後殿ê內面，伊用橄欖柴做兩 个ki-lō͘-peng，ta̍k个高十肘。
6:24 Ki-lō͘-peng chit pêng ê翼五肘，hit-pêng ê翼五肘；tùi chit pêng ê翼尾到hit-pêng ê翼尾，共十肘。
6:25 Hitê ki-lō͘-peng mā是十肘，兩 个ki-lō͘-peng ê寸尺kah款式lóng相仝。
6:26 Chitê ki-lō͘-peng高十肘，hitê ki-lō͘-peng mā是ánne。
6:27 伊kā ki-lō͘-peng hē tī後殿ê內面，ki-lō͘-peng ê翼thí開；chitê ki-lō͘-peng一个翼到chit pêng ê牆，hitê ki-lō͘-peng一个翼到hit-pêng ê牆，in兩支翼tī殿內相接。
6:28 伊koh用金安hiahê ki-lō͘-peng。
6:29 內外殿內面四箍圍ê牆lóng有雕刻，to̍h是雕刻ki-lō͘-peng、棗樹kah花蕊ê款式。
6:30 殿ê地板，內外lóng安金。
6:31 Koh用橄欖柴做入後殿ê門，它ê門楣kah門框佔牆ê五分之一。
6:32 用橄欖柴所造ê兩 个門扇，頂面有刻ki-lō͘-peng、棗樹kah花蕊ê款式，lóng安金；koh用金鑲tī ki-lō͘-peng kah棗樹ê頂面。
6:33 伊koh用橄欖柴做入外殿ê門框，佔牆ê四分之一。
6:34 伊koh用松樹柴做雙pêng ê門扇，chit pêng門ê兩扇會拗得，hit-pêng門ê兩扇mā ē拗得。
6:35 門頂面刻ki-lō͘-peng、棗樹kah花蕊ê款式，lóng安金，koh用金鑲tī雕刻ê栱ê頂面。
6:36 伊koh用每三勻phah好ê石，疊（tha̍h）一勻柏香柴，來起內院ê牆。
6:37 Tī第四年，西弗月，伊hē上主ê殿ê地基。
6:38 到十一年，pò͘-le̍k月，to̍h是八月，聖殿所有ê一切lóng照它ê細節造成。伊起造聖殿共七年。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。