撒母耳記下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
3:1 掃羅ê家kah大衛ê家交戰真久。大衛ná強盛，掃羅ê家ná衰弱。
3:2 大衛ê眾Kiáⁿ兒
大衛tī希伯崙生幾nā个 kiáⁿ：大kiáⁿ暗嫩，是耶斯列人亞希暖所生ê；
3:3 第二个Ki-lī-ap，是bat做迦密人拿八ê bó͘亞比該所生ê；第三个押沙龍，是基述王Ta̍t-mái ê chabó͘ kiáⁿ瑪迦ê kiáⁿ；
3:4 第四个A-to-nî-ngá，是哈及 ê kiáⁿ；第五个示法提雅，是A-bi-thal ê kiáⁿ；
3:5 第六个It-le-àm，是大衛ê bó͘ Í-kek-la̍h所生ê。Chiahê是大衛tī希伯崙所生ê kiáⁿ。
3:6 押尼珥投靠大衛
掃羅ê家kah大衛ê家交戰ê時，押尼珥tī掃羅ê家kakī 強起來。
3:7 掃羅有一个妃，名叫做Li-chu-bah，是Ài-a ê chabó͘ kiáⁿ。伊施波設對押尼珥講：「你ná ē kah我老父ê妃同房？」
3:8 押尼珥因為伊施波設ê話，to̍h真受氣，講：「我kám是偤大ê狗頭？我好款待你ê老父掃羅ê家，kah伊ê兄弟朋友，無kā你交tī大衛ê手中，你今á日竟然因為chitê chabó͘人來kā我責備？
3:9 我若無照上主所對大衛chiùchōa ê來行tī伊，就願上主加倍責罰押尼珥，
3:10 ē tùi掃羅ê家移徙國位，來建立大衛ê國位，hō͘伊治理以色列kah偤大，tùi但到別是巴。」
3:11 伊施波設因為驚押尼珥，無應kah半句話。
3:12 押尼珥為tio̍h本身差使者去見大衛講：「Chitê所在屬啥人？」Koh講：「你kah我立約，我ê手beh幫贊你，hō͘以色列lóng歸tī你。」
3:13 大衛講：「好，我kah你立約。總是，我beh對你討一項，to̍h是你來見我ê面hit時，若無kā掃羅ê chabó͘ kiáⁿ米甲chhōa來，一定bē tàng見我ê面。」
3:14 大衛to̍h差使者去見掃羅ê kiáⁿ伊施波設，講：「你tio̍h kā我ê bó͘米甲還我，伊to̍h是我bat用腓利士人一百塊陽物ê皮所聘定ê。」
3:15 伊施波設to̍h差人tùi她ê丈夫拉億ê kiáⁿ Phàⁿ-thiat hia，kā她chhōa來。
3:16 她ê丈夫tòe她ê後面，ná行ná哮，kah伊來到Ba-hu-lîm。押尼珥kā伊講：「你倒tńg去！」伊to̍h倒tńg去。
3:17 押尼珥kah以色列ê長老參詳，講：「Lín早前欣慕大衛做王來kā lín治理，
3:18 taⁿ tio̍h照ánne做chiah好。因為關係大衛ê tāichì上主bat講：『我beh用我ê奴僕—大衛ê手救我ê子民—以色列人脫離腓利士人ê手，kah眾對敵ê手。』」
3:19 押尼珥mā講hō͘便雅憫人聽，koh來到希伯崙，kā以色列人kah便雅憫全家一切所看做好ê，lóng講hō͘大衛聽。
3:20 押尼珥kah二十人來到希伯崙見大衛，大衛為tio̍h押尼珥，以及kah伊來ê人設宴席。
3:21 押尼珥kā大衛講：「我beh起來，去招集以色列人民來見我ê主—我ê王，hō͘ in thang kah你立約，你to̍h thang做王，照心所意愛ê來管理。」大衛to̍h送押尼珥去，伊to̍h平安離開。
3:22 押尼珥Hông謀殺
大衛ê兵kah約押出軍倒tńg來，帶真chē搶ê物來。Hit時，押尼珥無tī希伯崙大衛hia，因為大衛已經送伊出去，伊mā平安離開。
3:23 約押kah tòe伊ê軍隊到位了後，有人通知約押講：「尼珥ê kiáⁿ押尼珥來見王，王送伊去，伊mā平安離開。」
3:24 約押去見王講：「你做啥物？你看，押尼珥來見你，你ná ē送伊去？Taⁿ伊離開去à！
3:25 你知尼珥ê kiáⁿ押尼珥來，是beh騙你，ài知你ê出kah你ê入，kah你一切所做ê tāichì。」
3:26 約押tùi大衛hia出來，to̍h差使者去jiok押尼珥，in to̍htui3西拉ê井kā伊chhōa tńg來，總是，大衛m̄知。
3:27 押尼珥倒tńg來到希伯崙，約押chhōa伊來到城門口，假beh偷偷á kah伊講話，to̍h tī hia鑿透伊ê腹肚，伊to̍h死。這是為tio̍h伊ê小弟亞撒黑hō͘伊thâi死。
3:28 後來，大衛聽tio̍h，to̍h講：「流尼珥ê kiáⁿ押尼珥ê血，chitê罪tī上主ê面前一定永遠無歸tī我kah我ê國。
3:29 願hitê歸tī約押ê頭殼kah伊ê老父全家，koh願約押ê家患tio̍h下身流膿ê，癩ko ê á是òa靠柺á ê，hō͘刀thâi死ê，無thang食ê，永遠無斷。
3:30 約押kah伊ê小弟亞比篩thâi死押尼珥，是因為伊tī基遍交戰ê時，thâi死in ê小弟亞撒黑。
3:31 埋葬押尼珥
大衛kā約押kah tòe伊ê人民講：「Lín tio̍h拆裂衫，縖麻布，tī押尼珥面前啼哭。」大衛王mā tòe tī伊ê棺材後面。
3:32 In kā押尼珥埋葬tī希伯崙。王óa近押尼珥ê墓來啼哭，眾人mā lóng啼哭。
3:33 王為tio̍h押尼珥唱哀歌：押尼珥ná ē親像戇人ê死？
3:34 你ê手無綑縛，你ê腳無鎖鏈。你死，親像人死tī pháiⁿ人ê面前。
3:35 就ánne，眾人koh為tio̍h伊哀哭。日未落ê時，眾人來勸大衛食餅，總是，大衛chiùchōa講：「我若tī日未落ê chìn前食淡薄餅，á是食別項物，願上主加倍責罰我！」
3:36 眾人注意teh看，lóng看做是好。親像凡若王所做ê，眾人lóng看做是好。
3:37 Hit日，眾人kah以色列人民chiah知，thâi死尼珥ê kiáⁿ押尼珥，lóng m̄是出tī王ê意思。
3:38 王kā伊ê人臣講：「Lín kám m̄知今á日tī以色列中，死一个豪傑ê大偉人？
3:39 我雖然受抹油做王，今á日iáu是軟弱；洗魯雅ê kiáⁿ，chiahê人比我khah強。行pháiⁿ ê人，願上主照伊ê pháiⁿ kā伊報應。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。