申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
16:1 Pôaⁿ過節ê規定
(出12：1-20)
「你tio̍h注意亞筆月，來守上主—你ê上帝ê Pôaⁿ過節，因為上主—你ê上帝tī亞筆月暗時chhōa你出埃及。
16:2 你tio̍h tī上主所beh揀選來安置祂ê名ê所在，tùi你ê羊群、牛群，用Pôaⁿ過節ê chengseⁿ，獻祭hō͘上主—你ê上帝。
16:3 你m̄ thang用有酵ê餅chham teh食，七日你tio̍h用無酵ê餅chham teh食，to̍h是困苦ê餅；beh hō͘你一生ê日子ē記得你出埃及地ê日，因為你出埃及地ê時真趕緊。
16:4 Tī你ê四箍圍á內，七日lóng m̄ thang看tio̍h酵，頭一日ê-hng所獻ê祭肉，m̄ thang留一點á到天光。
16:5 「Tī上主—你ê上帝所賞賜hiahê城門內，你m̄ thang獻Pôaⁿ過節ê祭。
16:6 獨獨tio̍h tī上主—你ê上帝所beh揀選做安置祂ê名ê所在，到ê-hng日落ê時，to̍h是你出埃及ê時，tio̍h獻Pôaⁿ過節ê祭。
16:7 Τio̍h tī上主—你ê上帝所beh揀選ê所在，煏（piak）來食，隔工早起你oa̍t tńg去你ê布棚。
16:8 你tio̍h食無酵餅六日，第七日你tio̍h守上主—你ê上帝ê嚴肅會，lóng m̄ thang做工。」
16:9 收割節ê規定
(出34：22；利23：15-21)
「你tio̍h為kakī 算七个七日，tùi你起頭用鐮á割五穀ê時算起，to̍h算七个七日。
16:10 你tio̍h tī上主—你ê上帝ê面前守七七日節，kā你ê手ê禮物奉獻，是照你ê心所願ê，mā照上主—你ê上帝kā你賜福ê。
16:11 你kah你ê kiáⁿ兒、奴僕、女婢，kah tòa tī你城門內ê利未人，以及tī lín中間寄腳ê，kah孤兒、寡婦，lóng tio̍h tī上主—你ê上帝所beh揀選安置祂ê名ê所在，tī上主—你ê上帝ê面前歡喜。
16:12 你tio̍h ē記得你tī埃及bat做奴隸，你tio̍h執守來行chiahê律例。
16:13 Tòa棚節ê規定
(利23：33-43)
「稻埕kah酒窟所出ê，你收藏了後，tio̍h守Tòa棚節七工。
16:14 守節ê時，你kah你ê kiáⁿ兒、奴僕、女婢kah tòa tī你城門內ê利未人，以及寄腳ê，kah孤兒、寡婦，lóng tio̍h歡喜。
16:15 Tī上主所beh揀選ê所在，你tio̍h守上主—你ê上帝ê節七工，因為上主—你ê上帝tī你一切ê物產kah你ê手一切所做ê，ē kā你賜福，你to̍h ē大歡喜。
16:16 「你所有ê chapo͘丁tio̍h tī除酵節、七七節、Tòa棚節，一年三pái，lóng到上主—你ê上帝ê面前，tī祂所beh揀選ê所在，mā m̄ thang空手到上主ê面前。
16:17 Τa̍k人lóng tio̍h照伊ê氣力來獻，to̍h是照上主—你ê上帝所賞賜hō͘你ê福份。」
16:18 委派審判官kah其他官員ê規定
「你tio̍h tī上主—你ê上帝所賞賜ta̍k个城門內，照你hiahê支族，為kakī 設立審判官kah官長。In tio̍h照公義ê判斷，來審判人民。
16:19 你ê審判m̄ thang冤枉，m̄ thang看人ê外貌，mā m̄ thang接受人ê烏紗，因為烏紗ē hō͘智慧ê人目chiu chheⁿmê，koh ēhō͘義人ê話péng倒tńg。
16:20 你tio̍h追求至公至義，hō͘你ē活，承接上主—你ê上帝所賞賜hō͘你ê地。
16:21 你為kakī 所起上主—你ê上帝ê壇，m̄ thang tī hit邊á栽啥物樹木來做亞舍拉。
16:22 Mā m̄ thang為kakī chhāi雕刻ê柱，這是上主—你ê上帝所怨恨ê。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。