民數記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
18:1 祭司kah利未人ê職責
上主對亞倫講：「你kah你chiahê kiáⁿ，kah你ê本族，tio̍h做伙擔當聖所ê罪；你kah你chiahê kiáⁿ mā tio̍h擔當lín祭司職ê罪。
18:2 你tio̍h chhōa你ê兄弟利未ê支族，你ê祖先ê支族，進前來，hō͘ in kah你聯合來侍候你；m̄ koh，你kah你ê kiáⁿ，lóng tio̍h tī法櫃ê會幕前。
18:3 In tio̍h做你ê差用，mā tio̍h做布棚ê差用，獨獨m̄ thang óa近聖所ê器具kah壇，免得in kah lín lóng死。
18:4 In tio̍h kah你聯合，mā tio̍h做會幕ê差用，料理布棚所有ê工；總是，外面人m̄ thang óa近lín。
18:5 Lín tio̍h做聖所ê差用，kah壇ê差用，免得受氣koh到tī以色列人。
18:6 你看，我bat tùi以色列人ê中間揀選lín ê兄弟利未人，來賞賜hō͘ lín，kah歸上主，來料理會幕ê工。
18:7 所以，你kah你ê kiáⁿ tio̍h做伙守祭司ê職，料理壇kah帳簾內所有ê工。Lín tio̍h ánne服務，我已經親像送物件hō͘ lín來賞賜hō͘你祭司職責ê工。見若外面人近óa-ê，一定hō͘伊死。
18:8 祭司應得ê物
上主koh kā亞倫講：「你看，我已經用獻hō͘我ê舉祭，to̍h是以色列人分別做聖ê物，交你來保守；因為你受抹油，chiahê物歸你kah你ê kiáⁿ孫，做永遠ê份額。
18:9 無經過火，至聖ê物ê中間，屬tī你ê是chiahê：見若in ê禮物，in ê素祭，in ê贖罪祭，in ê補過失祭，in所獻hō͘我ê，lóng做至聖，歸hō͘你kah你ê kiáⁿ孫。
18:10 你tio̍h看chiahê物做至聖來食，見若chapo͘丁lóng thang食，你tio̍h掠chitê物做聖。
18:11 「Chiahê mā是你ê，禮物ê舉祭以及以色列人所獻ê搖祭，我lóng賞賜hō͘你kah你ê kiáⁿ兒，做永遠ê份額；見若tī你厝內清氣ê人lóng thang食。
18:12 「Siōng好ê油，siōng好ê酒，siōng好ê五穀，to̍h是in起頭熟獻hō͘上主ê，我lóng賞賜hō͘你。
18:13 In ê地起頭熟ê物，所獻hō͘上主ê，lóng歸hō͘你；你厝內清氣ê人lóng thang食。
18:14 「以色列中所有分別做聖獻hō͘我ê，lóng tio̍h歸hō͘你。
18:15 「見若有肉體頭chiūⁿ生ê，無論人á是chengseⁿ，in所獻hō͘上主ê，lóng歸tī你；總是，人頭chiūⁿ生ê你tio̍h kā伊贖回；無清氣ê chengseⁿ頭chiūⁿ生ê，你mā tio̍h kā牠贖回。
18:16 Tī滿月以外所tio̍h贖回ê，tio̍h照你所估ê價，照聖所ê舍客勒，用銀五舍客勒kā伊贖回；一舍客勒是二十季拉。
18:17 總是，頭chiūⁿ生ê牛，頭chiūⁿ生ê綿羊，頭chiūⁿ生ê山羊，你m̄ thang贖回；這是聖，tio̍h hiù牠ê血tī壇裡，tio̍h燒牠ê油做火祭，做芳芳ê祭獻hō͘上主。
18:18 Hiahê肉歸tī你，親像所搖ê胸kah正腿歸tī你相siâng。
18:19 「見若聖物ê舉祭，是以色列人獻hō͘上主ê，我lóng賞賜hō͘你kah你ê kiáⁿ兒，做永遠得tio̍h ê份額；這是hō͘你kah你ê kiáⁿ孫，tī上主ê面前，做永遠bē廢無ê約。
18:20 上主對亞倫講：「你tī in ê所在m̄ thang有產業，tī in ê中間mā m̄ thang有份額；tī以色列人中，我to̍h是你ê份額，是你ê產業。」
18:21 利未人應得ê物
上主講：「你看，tī以色列中所抽ê十分之一，我已經賞賜利未ê kiáⁿ孫做產業；因為in所做ê工是會幕ê工，所以，賞賜hō͘ in，來報答in ê勞苦。
18:22 Tùi taⁿ以後，以色列人m̄ thang óa近會幕，免得in擔當罪來死。
18:23 獨獨利未人tio̍h做會幕ê工，擔當in ê罪，這beh做lín ta̍k世代永遠ê例。In tī以色列人ê中間m̄ thang有產業；
18:24 因為以色列人所抽ê十分之一，所獻hō͘上主做舉祭ê，我已經賞賜利未人做產業，所以，我對in講：『In tī以色列人ê中間m̄ thang有產業。』」
18:25 利未人ê十分之一
上主吩咐摩西講：
18:26 「你tio̍h吩咐利未人，kā in講：Lín tùi以色列人ê中間抽十分之一，to̍h是我hō͘ lín做產業ê；hit時lín tio̍h tùi hitê十分之一ê中間koh抽十分之一做舉祭，獻hō͘上主。
18:27 你ê舉祭beh kā lín算做稻埕ê麥，kah滿tī葡萄窟ê酒。
18:28 Án-ne，lín tùi以色列中所得tio̍h ê十分之一，tio̍h tùi hitê獻舉祭獻hō͘上主；lín tio̍h tùi hitê，用上主ê舉祭hō͘祭司亞倫。
18:29 Lín所得tio̍h一切ê禮物，tio̍h tùi hit中間，kā siōng好ê，to̍h是分別做聖ê份額，獻hiahê舉祭hō͘上主。
18:30 所以，你tio̍h對in講：Lín已經tùi hit中間舉起hitê至好ê，這to̍h是kā利未人算做稻埕ê五穀，mā親像酒窟ê酒。
18:31 Lín kah lín ê家眷，ta̍k所在lóng thang食；這是lín ê工錢，是報答lín tī會幕內所做ê工。
18:32 Lín已經tùi hit中間舉起hitê至好ê，to̍h無因為ánne來犯罪；lín m̄ thang òe lahsap以色列人ê聖物，免得lín死亡。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。