民數記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
6:1 上主吩咐摩西講：
6:2 「你tio̍h吩咐以色列人，kā in講：無論男女hē特別ê願，to̍h是獻身者ê願，tio̍h kakī 分別歸hō͘上主。
6:3 伊to̍htioh8離開酒kah厚酒，mā m̄ thang lim啥物酒ê醋kah厚酒ê醋，m̄ thang lim啥物葡萄ê汁，mā m̄ thang食青ê葡萄kah乾ê葡萄。
6:4 Tī所有kakī 分別做聖ê日，見若葡萄樹所出ê，tùi核到皮lóng m̄ thang食。
6:5 「Tī伊下願kakī 分別做聖hiahê日，m̄ thang hō͘剃頭刀到伊ê頭殼；到伊kakī 分別歸hō͘上主ê日滿，伊tio̍h做聖，chhut-chāi伊ê頭毛發長。
6:6 Tī伊kakī 分別做聖歸上主hiahê日，m̄ thang óa近身屍。
6:7 伊ê老父á是老母á是兄弟á是姊妹死ê時，伊m̄ thang為tio̍h in hō͘ kakī 無清氣，因為伊kakī 分別做聖歸上帝ê憑據是tī伊ê頭殼。
6:8 Tī伊kakī 分別做聖hiahê日，伊是歸tī上主來做聖。
6:9 「若tī伊ê身邊忽然有人死，致使bak tio̍h伊kakī 分別做聖ê頭殼，伊to̍htioh8 tī kakī 清氣ê日剃頭，to̍h是tī第七日剃頭。
6:10 第八日，伊tio̍h用兩隻斑鴿 á是兩隻粉鳥kiáⁿ，帶到會幕門口，交帶祭司。
6:11 祭司tio̍h獻一隻做贖罪祭，一隻做燒祭，kā伊贖罪，因為伊tùi身屍來有罪，koh tio̍h tī hit日hō͘伊ê頭殼做聖。
6:12 伊tio̍h koh用伊分別做聖ê日，分別來歸上主，koh tio̍h牽一隻未滿年ê羊káng-á，做補過失ê祭；總是，以前ê日無算數，因為伊kakī 分別做聖ê已經無清氣。
6:13 「獻身者kakī 分別做聖ê日滿了後，hitê例to̍h是ánne；人tio̍h chhōa伊到會幕ê門口。
6:14 伊tio̍h kā伊ê禮物獻hō͘上主，to̍h是一隻無缺點未滿年ê綿羊káng-á，做燒祭，一隻無缺點未滿年ê綿羊母á，做贖罪祭，koh用一隻無缺點ê綿羊káng，做謝恩ê祭；
6:15 koh用一筐ê無酵餅，to̍h是調和油kah幼麵粉做ê餅，kah抹油無酵ê薄餅，以及伊ê素祭，kah灌奠ê祭。
6:16 「祭司tio̍h the̍h chiahê到上主ê面前，來獻hitê人ê贖罪祭kah燒祭。
6:17 伊mā tio̍h kā hit隻羊káng kah hit筐無酵餅，獻hō͘上主做謝恩ê祭，祭司mā tio̍h續獻伊ê素祭kah灌奠。
6:18 獻身者tio̍h tī會幕門口剃kakī 分別做聖ê頭，kā kakī 分別做聖ê頭毛hē tī謝恩祭下面ê火頂。
6:19 「獻身者剃伊kakī 分別做聖ê頭毛了後，祭司to̍h tio̍h取已經煮ê羊káng一支前腿，koh tùi筐á內the̍h一个無酵餅，kah一个無酵ê薄餅，lóng hē tī伊ê手。
6:20 祭司tio̍h the̍h chiahê做搖祭，搖tī上主ê面前；這kah所搖ê胸，所舉ê腿，lóng做聖物，歸hō͘祭司，然後獻身者chiah thang lim酒。
6:21 「下願ê獻身者為tio̍h伊分別kakī 所獻ê禮物做聖，kah伊以外所ē得tio̍h ê獻hō͘上主，to̍h是chitê例。伊ánne下願，to̍h tio̍h照分別kakī 做聖ê例來行。」
6:22 祭司ê祝福
上主吩咐摩西講：
6:23 「你tio̍h吩咐亞倫kah伊ê kiáⁿ講：Lín tio̍h ánne kā以色列人祝福，對in講：
6:24 『願上主kā你賜福，保護你。
6:25 願上主hō͘祂ê面ê光照你，施恩hō͘你。
6:26 願上主歡喜ê面看你，賞賜hō͘你平安。』
6:27 Án-ne，in beh kā我ê名hē tī以色列人ê頂面，我mā beh賜福hō͘ in。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。