利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
24:1 燈台ê規定
(出27：20-21)上主吩咐摩西講：
24:2 「Tio̍h命令以色列人，用橄欖kheh成清ê油，the̍h來hō͘你，thang點燈hō͘它tiāⁿ-tiāⁿ 光。
24:3 Tī會幕內法櫃ê帳簾外，亞倫tio̍h ánne辦理，tùi ê-hng到早起，tiāⁿ-tiāⁿ tī上主ê面前。這是做lín代代永遠ê例。
24:4 伊tio̍h tī上主ê面前，tī清氣ê燈台頂tiāⁿ-tiāⁿ 辦理chiahê燈。」
24:5 獻hō͘上主ê餅
「你tio̍h the̍h幼ê麵粉來煏十二塊餅，每塊用五分之一伊法。
24:6 Tio̍h tī上主ê面前聖潔ê桌頂kā餅排做兩chōa，每chōa六塊。
24:7 Koh tio̍h用清氣ê乳香hē tī ta̍k chōa，kā餅做記號，to̍h是做火祭獻hō͘上主。
24:8 Ta̍k個安息日，伊tio̍h tiāⁿ-tiāⁿ 排tī上主ê面前。這是為tio̍h以色列人做永遠ê約。
24:9 Chiahê餅tio̍h歸hō͘亞倫kah伊ê kiáⁿ孫，in tio̍h tī聖ê所在食，因為tī上主ê火祭中，chitê是至聖歸tī伊，做永遠ê例。
24:10 公道ê審判
有一个人，伊ê老母是以色列人，伊ê老父是埃及人，出來行tī以色列人ê中間。Chitê以色列chabó͘人ê kiáⁿ，kah一个以色列人tī營房內冤家。
24:11 Chitê以色列chabó͘人ê kiáⁿ褻瀆聖名，koh咒詛，to̍h有人kā伊chhōa到摩西hia。伊ê老母ê名叫做示羅密，是但ê支族，Tí-pek-lī ê chabó͘ kiáⁿ。
24:12 In kā伊關tī拘留所，beh thèng候上主ê指示。
24:13 上主吩咐摩西講：
24:14 「Tio̍h kā hitê咒詛ê人chhōa到營外，hō͘聽tio̍h ê人tī伊ê頭殼頂hōaⁿ手；全會眾tio̍h用石頭kā伊tìm死。
24:15 你tio̍h吩咐以色列人講：見若咒詛伊ê上帝ê，tio̍h擔當伊kakī ê罪。
24:16 人褻瀆上主ê名，tio̍h hō͘伊死；全會眾tio̍h用石頭kā伊tìm死。不管是出外人á是本地人，伊褻瀆上主ê名ê時，tio̍h hō͘伊死。
24:17 見若phah死人ê，一定tio̍h hō͘伊死。
24:18 Phah死chengseⁿ ê，tio̍h賠償，用命賠命。
24:19 人若損傷伊ê厝邊，伊ánne行，mā tio̍h ánne kā伊款待。
24:20 用傷賠傷，用目chiu 賠目chiu ，用嘴齒賠嘴齒，伊損傷人án怎，mā tio̍h ánne kā伊對待。
24:21 Phah死chengseⁿ ê，tio̍h賠償；phah死人ê，一定tio̍h hō͘伊死。
24:22 不管是出外人á是本地人，tio̍h遵守相siâng ê律法，因為我是上主—lín ê上帝。」
24:23 摩西to̍h kā以色列人講，in to̍hka7 hitê咒詛ê人chhōa到營外，用石頭tìm死。以色列人to̍h照上主所命令摩西ê來行。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。