利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
21:1 祭司聖潔ê規定
上主對摩西講：「你tio̍h吩咐亞倫ê kiáⁿ孫做祭司ê，講：家族中若有人死，m̄ thang為tio̍h伊來òe lahsap kakī 。
21:2 總是，為tio̍h伊骨肉ê親，to̍h是為tio̍h伊ê老母，為tio̍h伊ê老父，為tio̍h伊ê kiáⁿ，為tio̍h伊ê chabó͘ kiáⁿ，為tio̍h伊ê兄弟，
21:3 以及kah伊至親做在室女ê姊妹，to̍h thang為tio̍h伊òe lahsap kakī 。
21:4 伊若已經tī人民中做頭，to̍h m̄ thang隨俗來òe lahsap kakī 。
21:5 「頭殼m̄ thang剃光光，嘴鬚ê四箍圍m̄ thang髡，mā m̄ thang割kakī ê肉。
21:6 Tio̍h歸in ê上帝來成聖，m̄ thang褻瀆in ê上帝ê名，因為上主ê火祭是in ê上帝ê食物，是in所獻ê，所以，in tio̍h成做聖。
21:7 In m̄ thang娶妓女做bó͘ á是hông òe lahsap ê chabó͘人做bó͘，mā m̄ thang娶hō͘丈夫離出ê chabó͘人做bó͘，因為in是歸in ê上帝做聖。
21:8 所以，你tio̍h kā伊分別做聖，因為伊獻你ê上帝ê食物，你tio̍h看伊做聖，因為hō͘ lín成聖ê上主，to̍h是聖ê。
21:9 祭司ê chabó͘ kiáⁿ若行姦淫，凌辱kakī ，to̍h是凌辱她ê老父，tio̍h用火kā她燒死。
21:10 「Tī兄弟中做大祭司，用抹ê油thîn tī伊ê頭殼，koh設立擔當聖職，穿聖衫ê，m̄ thang phah散頭毛，mā m̄ thang拆裂衫。
21:11 M̄-thang óa近屍體，mā m̄ thang為tio̍h伊ê老父á是伊ê老母來òe lahsap kakī 。
21:12 M̄-thang離開聖所，mā m̄ thang褻瀆上帝ê聖所，因為伊ê上帝有抹油ê冕旒tī伊ê頭殼。我是上主。
21:13 伊tio̍h娶在室女做bó͘。
21:14 寡婦á是hông離ê chabó͘人，á是hông òe lahsap-ê á是娼妓chiahê，lóng m̄ thang娶；獨獨thang娶本族ê在室女做bó͘。
21:15 Tī伊ê人民中m̄ thang凌辱伊ê kiáⁿ孫，因為我是hō͘伊成聖ê上主。」
21:16 上主吩咐摩西講：
21:17 「你tio̍h kā亞倫講：你ta̍k世代ê kiáⁿ孫見若有破相ê，lóng m̄ thang行óa來獻伊ê上帝ê食物。
21:18 因為見若有破相ê人，無論是chheⁿmê ·ê、跛腳ê、凹鼻ê、肢體畸形ê、
21:19 斷腳斷手ê、
21:20 ún-ku ê、矮細ê、目chiu 有毛病ê、生癬ê、生瘡ê，á是損壞外身ê，lóng m̄ thang近óa來。
21:21 祭司亞倫ê kiáⁿ孫，凡若有破相ê lóng m̄ thang行óa來獻上主ê火祭。伊有破相，m̄ thang 行óa來獻伊ê上帝ê食物。
21:22 上帝ê食物，無論是至聖ê，是聖ê，伊lóng thang食。
21:23 總是，m̄ thang來到帳簾，mā m̄ thang近óa壇前，因為伊有破相，免得褻瀆我hiahê聖所。因為我是hō͘ in成聖ê上主。」
21:24 摩西to̍h吩咐亞倫kah伊hiahê kiáⁿ，以及以色列人民ánne講。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。