利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
19:1 聖潔kah正義ê誡命
上主吩咐摩西講：
19:2 「你tio̍h吩咐以色列全會眾對in講：Lín tio̍h做聖，因為我—上主—lín ê上帝是聖。
19:3 Lín ta̍k人lóng tio̍h孝敬老母kah老父，mā tio̍h守我hiahê安息。我是上主—lín ê上帝。
19:4 Lín m̄ thang偏ǹg偶像，mā m̄ thang為kakī 鑄造神明；我是上主—lín ê上帝。
19:5 Lín獻謝恩祭hō͘上主ê時，tio̍h獻thang得tio̍h接納ê。
19:6 Tī獻ê日á是隔日食祭物，若有chhun到第三日ê tio̍h用火燒掉。
19:7 第三日若koh食tio̍h，這是thang討厭ê，bē tàng接納。
19:8 凡若食hiahê祭物ê人，一定tio̍h擔當伊ê罪過，因為伊褻瀆上主ê聖物，hitê人一定tio̍h tùi伊ê人民中hông剪除。
19:9 「Lín收割田ê五穀，田ê角頭m̄ thang割到盡，ka-la̍uh ê mā m̄ thang拾。
19:10 葡萄園果子m̄ thang挽了了，mā m̄ thang拾葡萄所lak ê果子，tio̍h留hō͘ sànchhiah人kah出外人。我是上主—lín ê上帝。
19:11 「Lín m̄ thang偷the̍h，m̄ thang欺騙，大家m̄ thang講白賊。
19:12 Lín m̄ thang kí我ê名lâm-sám chiùchōa，來褻瀆你ê上主ê名。我to̍h是上主。
19:13 「M̄-thang欺負你ê厝邊，mā m̄ thang搶奪伊ê物，做工人ê工錢m̄ thang留tī你hia kui暝到天光。
19:14 M̄-thang罵臭耳聾ê，mā m̄ thang hē阻礙ê物tī chheⁿmê ·ê ê面前，tio̍h敬畏你ê上帝。我to̍h是上主。
19:15 「Lín審判m̄ thang無公道，m̄ thang偏袒sànchhiah人，mā m̄ thang看重有勢力ê人，tio̍h照公道審判你ê厝邊。
19:16 M̄-thang tī你ê人民ê中間四界行譭謗人，mā m̄ thang做見證ài害死你ê厝邊。我to̍h是上主。
19:17 「你m̄ thang心內怨恨你ê兄弟，一定tio̍h責備你ê厝邊，免得為tio̍h伊擔當罪過。
19:18 M̄-thang報仇，mā m̄ thang埋怨你本國ê人民，tio̍h疼厝邊親像kakī 。我to̍h是上主。
19:19 「Lín tio̍h守我ê律例。M̄-thang hō͘ lín ê chengseⁿ kah無同類ê交合；m̄ thang用兩樣ê種籽參插掖tī你ê園地，m̄ thang用兩樣ê料參插做衫，穿tī你ê身軀。
19:20 「女婢做人定tio̍h，iáu未受贖，未得tio̍h tháu放，人若kah她行姦淫，兩人tio̍h受刑罰，總是，m̄ thang hō͘伊死，因為女婢iáu未得tio̍h自由。
19:21 Hitê chapo͘人tio̍h用補過失ê祭，to̍h是一隻綿羊káng，牽到會幕門口，上主ê面前，做補過失ê祭。
19:22 祭司tio̍h用補過失祭ê羊káng，tī上主ê面前贖伊所犯ê罪，伊所犯ê罪to̍h得tio̍h赦免。
19:23 「Lín到迦南地ê時，栽種ta̍k種會食得ê果子樹，lín tio̍h kā hiahê果子看做kah未受割禮ê相siâng。M̄-thang食頭三年ê果子，lín tio̍h kā hiahê果子看做是未受割禮ê。
19:24 到第四年所結ê果子lóng tio̍h做聖，用伊來oló上主。
19:25 到第五年，lín tio̍h食hiahê果子，ē tàng hō͘它kā lín結khah chē果子。我是上主—lín ê上帝。
19:26 「Lín m̄ thang食kâⁿ血ê物，m̄ thang用法術，mā m̄ thang占卜。
19:27 頭殼ê四箍圍m̄ thang剃，嘴鬚ê四箍圍mā m̄ thang髡。
19:28 Lín m̄ thang為死人割kakī ê肉，mā m̄ thang tī身軀刺記號。我是上主。
19:29 「M̄-thang凌辱你ê chabó͘ kiáⁿ hō͘她去做娼妓，恐驚地chiūⁿlóng歸ǹg淫亂，地chiūⁿ滿滿大pháiⁿ。
19:30 「Lín tio̍h守我hiahê安息，敬我ê聖所。我是上主。
19:31 「M̄-thang偏ǹg hiahê hō͘鬼附身ê，kah行邪術ê，mā m̄ thang去問in，致到hō͘ in òe lahsap。我是上主—lín ê上帝。
19:32 「Tī白頭毛ê人面前，你tio̍h khiā起來，mā tio̍h尊敬老人ê面，koh tio̍h敬畏你ê上主。我是上主。
19:33 「若有出外人寄腳tī lín ê所在，kah lín tòa，to̍h m̄ thang欺負in。
19:34 「Kah lín tòa ê出外人，lín tio̍h看in親像本地人相siâng，mā tio̍h疼in親像本身，因為lín mā bat tī埃及地做出外人。我是上主—lín ê上帝。
19:35 「Lín審判ê時m̄ thang無公道，tī尺，tī秤，tī 斗，lóng tio̍h公道。
19:36 Tio̍h用公道ê秤á來秤，公道ê秤錘，公道ê伊法，公道ê欣。「我是上主—lín ê上帝，bat chhōa lín出埃及地ê。」
19:37 Lín tio̍h守我一切ê律例，kah我一切ê法度，來遵行。我是上主。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。