利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
18:1 淫亂ê禁令
上主吩咐摩西講：
18:2 「你tio̍h吩咐以色列人，kā in講：我是上主—lín ê上帝。
18:3 Lín以前所tòa ê埃及地，hit位ê人所行ê lín m̄ thang遵thàn in來行，我beh chhōa lín到迦南地，hit位ê人所行ê，lín mā m̄ thang遵thàn in來行，mā m̄ thang照in ê規例來行。
18:4 Lín tio̍h遵thàn我ê法度，守我ê律例，照chitê來行，我是上主—lín ê上帝。
18:5 所以，lín tio̍h守我ê律例kah法度，人若行chiahêto̍h ētùi chiahê來活，我是上主。
18:6 「Lín lóng m̄ thang親近骨肉ê親，來露現伊ê下身，我是上主。
18:7 「M̄-thang露現你ê老母ê下身，來凌辱你ê老父。她是你ê老母，m̄ thang露現她ê下身。
18:8 「你ê老父ê後bó͘ ê下身，你m̄ thang露現，因為he是你ê老父ê下身。
18:9 「你ê姊妹，無論是同父ê á是同母ê，出世tī厝內á是出世tī家外，lóng m̄ thang露現in ê下身。
18:10 「你ê後生ê chabó͘ kiáⁿ，á是你ê chabó͘ kiáⁿ ê chabó͘ kiáⁿ，m̄ thang露現in ê下身，因為he是你本身ê下身。
18:11 「你ê老父ê後bó͘ ê chabó͘ kiáⁿ，tùi你ê老父生ê，是你ê小妹，m̄ thang露現她ê下身。
18:12 「M̄-thang露現你ê阿姑ê下身，她是你ê老父骨肉ê親。
18:13 「M̄-thang露現你ê阿姨ê下身，她是你ê老母骨肉ê親。
18:14 「你m̄ thang凌辱你ê叔伯，露現伊ê bó͘ ê下身，她是你ê阿姆，你ê阿嬸。
18:15 「你m̄ thang露現你ê新婦ê下身，她是你ê kiáⁿ ê bó͘，m̄ thang露現她ê下身。
18:16 「M̄-thang露現你ê兄弟ê bó͘ ê下身，he是你ê兄弟ê下身。
18:17 「Cha-bó͘人kah她ê chabó͘ kiáⁿ ê下身lóng m̄ thang露現，m̄ thang kā她ê kiáⁿ ê chabó͘ kiáⁿ ，á是她ê chabó͘ kiáⁿ ê chabó͘ kiáⁿ ê下身露現，in是骨肉ê親，ánne做是真pháiⁿ。
18:18 「Bó͘ iáu tī ·leh，你m̄ thang另外koh娶她ê姊妹，露現她ê下身，來做她ê對頭。
18:19 「Cha-bó͘人經期到無清氣ê時，你m̄ thang近óa她來露現她ê下身。
18:20 「你m̄ thang kah厝邊ê bó͘行姦淫，來òe lahsap kakī 。
18:21 「M̄-thang hō͘你ê kiáⁿ兒tùi火中過去，歸hō͘摩洛，mā m̄ thang褻瀆你ê上帝ê名。我to̍h是上主。
18:22 「M̄-thang kah chapo͘人交合，親像kah chabó͘人相siâng，這是真可惡ê tāichì。
18:23 「無論啥物獸，m̄ thang kah牠交合來òe lahsap kakī 。Cha-bó͘人mā m̄ thang khiā tī獸ê頭前kah牠交合，這是逆性ê tāichì。
18:24 「Tī chiahê一切ê tāichì，lín lóng m̄ thang òe lahsap kakī ，因為我tī lín ê面前所趕出ê列邦，tī chiahê一切有òe lahsap kakī 。
18:25 地mā òe lahsap，所以，我辦伊ê罪，hitê地mā吐出tòa tī hia ê人民。
18:26 所以，lín tio̍h守我ê律例kah我ê法度，chiahê一切可惡ê tāichì，無論是本地人á是寄腳tī lín中間ê出外人，lóng m̄ thang ánne行。
18:27 (因為tī lín以前tòa hitê地ê人行chiahê一切可惡ê tāichì，地to̍h òe lahsap。)
18:28 免得lín òe lahsap hitê地ê時，地to̍h kā lín吐出來，kah吐出tī lín以前ê人民仝款。
18:29 「因為見若行chiahê一切可惡ê tāichì ê一項，ánne行ê人ēhông tùi伊ê人民中剪除。
18:30 所以，lín tio̍h守我所交帶ê，免得lín遵thàn hiahê可惡ê風俗，to̍h是tī lín以前ê人所tiāⁿ-tiāⁿ 行ê，致使lín tùi hiahê來òe lahsap kakī 。我to̍h是上主—lín ê上帝。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。