利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
16:1 贖罪日ê規定
亞倫兩 个kiáⁿ近óa上主ê面前來死，in死了後上主吩咐摩西，對摩西講：
16:2 「Tio̍h kā你ê阿兄亞倫講，m̄ thang隨便時入去聖所ê帳簾內，á是到約櫃頂施恩所ê面前，chiah免得死，因為我beh tī雲中顯現tī施恩所ê頂面。
16:3 亞倫beh入聖所tio̍h ánne：tio̍h 帶一隻牛káng-á-kiáⁿ做贖罪祭，一隻綿羊káng做燒祭。
16:4 伊tio̍h穿幼苧布聖ê內衫，mā tio̍h穿幼苧布ê褲tī身軀裡，腰縖幼苧布ê帶，頭戴幼苧布ê帽。這lóng是聖ê衫褲，伊tio̍h用水洗身軀，然後chiah穿。
16:5 伊tio̍h tùi以色列人ê會中取兩隻山羊káng，做贖罪祭，一隻綿羊káng做燒祭。
16:6 「亞倫tio̍h獻為本身做贖罪祭ê牛káng，為tio̍h本身kah伊ê家贖罪。
16:7 Mā tio̍h kā hit兩隻山羊káng安置tī會幕門口，上主ê面前。
16:8 亞倫tio̍h為tio̍h hit兩隻山羊拈鬮，liam一隻 歸上主，liam一隻歸A-cha-chel（註：希伯來文ê音譯，意思是「經過赦罪ê羊tī贖罪日放生去曠野，象徵完全ê赦免。」）
16:9 亞倫tio̍h用hit隻拈鬮歸上主ê山羊，獻做贖罪祭。
16:10 M̄ koh，hit隻拈鬮 kuiA-cha-chel ê山羊，tio̍h活活安置tī上主ê面前，替伊贖罪，放牠去曠野，歸tī A-cha-chel。
16:11 「亞倫tio̍h牽為kakī 做贖罪祭ê牛káng-á，為tio̍h kakī kah伊ê家贖罪，mā tioh8thâi為kakī 做贖罪祭ê牛káng-á。
16:12 Mā tio̍h the̍h香爐，tùi上主ê面前壇頂貯teh to̍h ê火炭滿滿，mā tio̍h用芳ê香末一phóng，帶入去帳簾內，
16:13 koh tī上主ê面前，kā香hē tī火裡，hō͘香煙遮khàm約櫃頂ê施恩所，伊chiah免得死。
16:14 Mā tio̍h the̍h淡薄牛káng-á ê血，用指頭á hiù tī施恩所ê東pêng，koh用指頭á tī施恩所ê面前hiù血七pái。
16:15 「Koh tioh8thâi hit隻為tio̍h人民做贖罪祭ê山羊káng，帶牠ê血入去帳簾內，用牠ê血hiù tī施恩所kah施恩所ê面前，kah hiù牛káng-á ê血相siâng。
16:16 Koh tio̍h因為以色列人ê污穢、過失kah in所有ê罪惡，替聖所贖罪，mā tio̍h為tio̍h in tī污穢ê中間tòa做伙ê會幕，照ánne行。
16:17 亞倫入去聖所贖罪ê時，會幕內m̄ thang有人tī ·leh，thèng候伊為tio̍h本身kah伊ê家，以及以色列ê會眾已經贖罪，chiah thang出來。
16:18 伊tio̍h出來到上主ê面前ê壇hia，潔淨祭壇，mā tio̍h the̍h淡薄牛káng-á ê血kah山羊káng ê血，抹tī壇頂hiahê角ê四箍圍。
16:19 Mā tio̍h用伊ê指頭á hiù血tī壇裡七pái，hō͘它清氣，離開以色列人ê無清氣，kā它分別做聖。」
16:20 代罪ê羊羔
「伊為tio̍h聖所、會幕kah祭壇贖罪了後，tio̍h牽hit隻活ê山羊káng來。
16:21 亞倫tio̍h用雙手hōaⁿ tī活ê山羊ê頭殼，tī它ê頂面承認以色列人所有ê pháiⁿ、過失kah in所有ê罪過；lóng歸tī山羊ê頭殼，交帶所派ê人，送去曠野。
16:22 Hit隻山羊beh擔當in所有ê pháiⁿ到無人tòa ê所在，伊to̍h放山羊tī曠野。
16:23 「亞倫tio̍h入去會幕，thǹg伊入聖所ê時所穿幼苧ê衫褲，留tī hia，
16:24 koh tio̍h tī聖ê所在用水洗身軀，穿伊ê祭司服出來，獻伊ê燒祭kah人民ê燒祭，為tio̍h本身kah人民贖罪。
16:25 贖罪祭ê油tio̍h kā它燒tī壇頂。
16:26 Hitê放山羊歸tī A-cha-chel ê人，tio̍h洗伊ê衫，用水洗身軀，然後chiah thang入去營內。
16:27 做贖罪祭ê牛káng kah贖罪祭ê山羊，in ê血已經帶入去聖所贖罪，in ê身軀tio̍h帶出去營外，用火燒in ê皮，in ê肉，in ê屎。
16:28 燒in ê人tio̍h洗伊ê衫，用水洗身軀，然後chiah thang入去營內。
16:29 Tio̍h守贖罪日
「Ta̍k pái tú tio̍h七月初十，lín tio̍h刻苦lín ê心，無論是本地人á是寄腳tī lín中間ê出外人，lóng m̄ thang做啥物工，這beh做lín永遠ê例。
16:30 因為上主tī chit日beh kā lín贖罪，hō͘ lín清氣，línē tī上主ê面前得tio̍h清氣，脫離一切ê罪過。
16:31 Chit日，lín tio̍h守做大ê安息日，lín tio̍h刻苦lín ê心，這是做永遠ê例。
16:32 Hitê受抹油來設立伊當聖職ê祭司，to̍h是承接伊ê老父做祭司ê，tio̍h行贖罪ê禮，tio̍h穿幼苧布ê衫，to̍h是聖衫。
16:33 伊tio̍h為tio̍h聖ê聖所贖罪，mā為tio̍h會幕kah祭壇贖罪，koh為tio̍h所有ê祭司kah全會眾ê人民贖罪。
16:34 這tio̍h做lín永遠ê例，to̍h是因為以色列人一切ê罪，tio̍h一年一pái為tio̍h in贖罪。」亞倫就照上主所命令摩西ê來行。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。