約翰一書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
4:1 真kah假ê靈
親愛ê兄弟姊妹，m̄ thang相信所有ê靈，tio̍h kā它查驗，看它是m̄是tùi上帝來ê，因為有真chē假先知，出現tī chit世間。
4:2 Lín ē tàng用下面ê方法，來分別hitê靈是m̄是上帝ê聖神：公開承認耶穌基督道成肉體臨到chit世間ê hitê靈，to̍h是tùi上帝來ê聖神。
4:3 M̄公開承認chit項tāichì ê，to̍h m̄是tùi上帝來ê聖神，mā是kah基督對敵ê靈。Lín有聽tio̍h chitê靈teh beh來，其實chitmá已經來tī世間à。
4:4 細kiáⁿ，lín是屬上帝，koh已經贏過hiahê假先知，因為tiàm tī lín內面ê聖神，比tiàm tī世間人內面ê靈khah有力。
4:5 假先知是屬世間，講世間事，所以，世間人chiah聽in ê話。
4:6 咱是屬上帝。認bat上帝ê奴僕聽咱，無屬上帝ê奴僕m̄聽咱。Án-ne，咱to̍h ē tàng分別真理ê聖神kah錯誤ê靈。
4:7 上帝是疼
親愛ê兄弟姊妹，咱tio̍h相疼，因為疼是tùi上帝來ê。有疼心ê人是上帝ê kiáⁿ兒，mā bat上帝。
4:8 無疼心ê人m̄ bat上帝，因為上帝是疼。
4:9 上帝差祂獨生ê Kiáⁿ來到世間，hō͘咱tùi祂來得tio̍h活命。上帝用ánne對咱顯明祂ê疼tī咱中間。
4:10 M̄是咱疼上帝，是祂有疼咱，差祂ê Kiáⁿ做贖罪祭，來贖咱ê罪。這to̍h是上帝ê疼。
4:11 親愛ê兄弟姊妹，上帝hiahni̍h疼咱，咱mā tio̍h相疼。
4:12 無人bat看tio̍h上帝；咱若相疼，上帝to̍h tiàm tī咱內面，祂ê疼to̍h通過咱完全實現。
4:13 上帝已經有kā聖神賞賜hō͘咱，ánne咱ē tàng確信咱kah上帝結聯。
4:14 天父差祂ê Kiáⁿ來做世間ê救主，阮有看tio̍h，chitmá teh做見證。
4:15 承認耶穌是上帝ê Kiáⁿ ê人，to̍h kah上帝結聯。
4:16 所以，咱知koh相信上帝疼咱。上帝to̍h是疼；性命內有疼ê人，to̍h是活tī上帝內面，上帝mā kah伊結聯。
4:17 疼to̍hánne tī咱中間完全實現，hō͘咱tī審判ê日thang好膽無驚惶，因為咱tī chit世間有kah耶穌仝款ê活命。
4:18 有疼to̍h無驚惶；完全ê疼kā驚惶趕出去。因為驚惶kah刑罰有關聯，有驚惶ê人iáu未kā疼完全實現出來。
4:19 咱tio̍h相疼，因為上帝tāi先疼咱。
4:20 若有人講：「我疼上帝」，m̄ koh，怨恨伊ê兄弟á是姊妹，伊是teh講白賊，因為無疼看ētio̍h ê兄弟á是姊妹ê人，ná ē疼看bē tio̍h ê上帝？
4:21 疼上帝，mā tio̍h疼兄弟á是姊妹，這是咱tùi基督領受ê誡命。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。