約翰一書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
2:1 活tī光明中
我ê細kiáⁿ，我寫chiahê hō͘ lín，是beh hō͘ lín無犯罪；若有人犯罪，tī天父ê面前，咱有義人耶穌基督為咱辯護。
2:2 基督為tio̍h咱ê罪，mā為tio̍h全世界ê人ê罪，做贖罪祭。
2:3 咱若遵守上帝ê誡命，就ánne ē tàng確信咱bat上帝。
2:4 人若講：「我bat上帝」，m̄ koh，無teh遵守祂ê命令，chitê人是teh講白賊，伊ê心中無真理。
2:5 M̄ koh，人若遵守上帝ê道理，伊對上帝ê疼to̍h完全實在；ánne，咱to̍h ē tàng確信咱有照上帝ê旨意teh生活。
2:6 人若講kakī 有遵照上帝ê旨意，應該tio̍h照耶穌基督ê言行舉止來生活。
2:7 新ê誡命
親愛ê兄弟姊妹，我無寫新ê命令hō͘ lín，是lín tùi起頭to̍h有ê hitê舊ê誡命，是lín bat聽過ê信息。
2:8 M̄ koh，tùi另外一个角度來看，我寫hō͘ lín ê誡命是新ê；對基督kah lín來講lóng是真實ê，因為烏暗teh beh過去，真光已經teh照。
2:9 人若講kakī 生活tī光明中，m̄ koh，iáu teh怨恨伊ê兄弟á是姊妹，伊事實上是iáu koh生活tī烏暗中。
2:10 疼兄弟á是姊妹ê人，是tī光明中teh生活，bē致使hō͘人跋倒犯罪。
2:11 M̄ koh，怨恨兄弟á是姊妹ê人，是活tī烏暗中；伊tī烏暗中teh生活，m̄知kakī ê方向，因為chitê烏暗hō͘伊ê目chiu chheⁿmê。
2:12 我ê細kiáⁿ，我寫phoe hō͘ lín，因為óa靠基督ê名，lín ê罪已經得tio̍h赦免。
2:13 父老序大，我寫phoe hō͘ lín，因為lín認bat tùi源起頭to̍h存在ê hit位。少年人，我寫phoe hō͘ lín，因為lín已經贏過hitê邪惡。細kiáⁿ，我寫phoe hō͘ lín，因為lín認bat天父。
2:14 父老序大，我寫phoe hō͘ lín，因為lín認bat hitê tùi源起頭to̍h存在ê hit位。青年人，我寫phoe hō͘ lín，因為lín勇健，mā有上帝ê道理tī lín心內，lín koh已經贏過hitê邪惡。
2:15 警告世間
M̄-thang貪戀世間á是世間ê物；人若疼chit世間，伊to̍h無疼天父。
2:16 因為一切屬世間ê，親像肉體ê情慾，目chiu ê慾望kah世俗ê驕傲，lóng m̄是tùi天父來，是tùi世間來ê。
2:17 Chit世間kah世間ê情慾teh beh過去，總是，實行上帝旨意ê人永遠存在。
2:18 基督ê對敵
細kiáⁿ，末日teh beh到à！Lín有聽tio̍h基督ê對敵teh beh來；chitmá已經有真chē基督ê對敵出現，因為ánne，咱知末日teh beh到à。
2:19 Chiahê人實在m̄是咱ê人，所以，tùi咱中間出去；in若是屬tī咱，to̍h ē繼續kah咱做伙；in離開咱，是beh顯明in lóng m̄是屬tī咱。
2:20 Lín已經lóng有tùi基督領受聖神，所以，lín lóng bat真理。
2:21 我寫phoe hō͘ lín，m̄是因為lín m̄ bat真理，是因為lín bat真理，koh知一切ê白賊lóng m̄是tùi真理來。
2:22 Án-ne，是啥物人teh講白賊？一定是hiahê拒絕耶穌做基督ê人。拒絕天父kah Kiáⁿ ê to̍h是基督ê對敵。
2:23 拒絕Kiáⁿ ê人，bē接納天父；承認Kiáⁿ ê人，mā ē承認天父。
2:24 Lín tio̍h堅守tùi起頭所聽tio̍h ê信息。Lín若堅守tùi起頭所聽ê信息，lín to̍h ē繼續活tī Kiáⁿ kah天父ê內面。
2:25 這to̍h是基督hō͘咱ê應允，是永遠ê活命。
2:26 我寫chiahê tāichì hō͘ lín，是teh指hiahê想beh迷惑lín ê人。
2:27 對lín來講，lín tùi基督領受ê聖神一直lóng kah lín同在，所以，m̄免人來kā lín教示，因為chitê聖神ē教示lín萬項事。祂ê教示是真實，m̄是白賊。Lín tio̍h遵照聖神ê教示，tio̍h kah基督結聯來生活。
2:28 Taⁿ，細kiáⁿ，lín tio̍h kah基督結聯來生活，ánne，tī基督再臨ê時ē tàng好膽，bē因為祂ê再臨，感覺見笑走去bih。
2:29 Lín若知基督是公義，mā tio̍h知實行公義ê人chiah是上帝ê kiáⁿ兒。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。