利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
11:1 關係食物ê規定
(申14：3-21)
上主吩咐摩西kah亞倫，對in講：
11:2 「Lín tio̍h吩咐以色列人講：『Tī地chiūⁿ一切走獸中thang食ê活物，to̍h是chiahê：
11:3 見若分蹄拆叉kah翻草ê chengseⁿ，lín lóng thang食。
11:4 獨獨翻草á是分蹄ê中間m̄ thang食ê，to̍h是chiahê：駱駝 — 因為牠有翻草，無分蹄，對lín來講是無清氣ê。
11:5 沙獾—因為有翻草無分蹄，對lín來講是無清氣ê。
11:6 兔á — 因為有翻草無分蹄，對lín來講是無清氣ê。
11:7 豬因為有分蹄拆叉，總是，無翻草，對lín來講是無清氣ê。
11:8 Lín lóng m̄ thang食hiahê肉，死ê lín lóng m̄ thang摸，對lín來講是無清氣ê。
11:9 「水中lín所thang食ê to̍h是chiahê：見若tī水裡、海裡、河裡，有翼有鱗ê lóng thang食。
11:10 見若tī海裡、河裡kah水內所有ê動物，to̍h是水內所有ê活物，見若無翼無鱗ê，lín lóng tio̍h掠做是可惡ê。
11:11 Hiahê對lín來講是可惡ê，lín m̄ thang食牠ê肉；死ê mā tio̍h掠做是可惡ê。
11:12 見若水內無翼無鱗ê，lín lóng tio̍h掠做是可惡ê。
11:13 「鳥隻ê中間lín tio̍h掠做可惡ê，to̍h是chiahê：Lín m̄ thang食，因為是可惡ê，to̍h是鷹、梟、雕、鵪、
11:14 小鷹kah牠ê類，
11:15 烏鴉kah牠ê類，
11:16 鴕鳥、公ê鴕鳥、魚鷹、雀鷹kah牠ê類，
11:17 暗光鳥、鸕鶿、鴣黃、
11:18 貓頭鷹、鵜鶘、臭頭鷹、
11:19 鶴、白鴒鷥kah牠ê類，戴鵀鳥kah蝙蝠。
11:20 「見若有翼ê蟲，用四腳行ê，lín lóng tio̍h掠做是可惡ê。
11:21 總是，有翼ê蟲，用四腳行ê，其中有腳有腿用來tī地裡跳ê，lín mā thang食。
11:22 其中有草蜢、草蜢公、杜猴kah牠ê類，草蜢kah牠ê類，chiahê lín lóng thang食。
11:23 總是，見若有翼有四腳teh爬ê物，lín lóng tio̍h掠做是可惡ê。
11:24 「Tùi下面chiahê lóngē hō͘ lín無清氣，見若摸tio̍h hitê死ê，一定無清氣到ê-hng時。
11:25 見若the̍h tio̍h屍體ê一塊á，tio̍h洗伊ê衫褲，一定無清氣到ê-hng時。
11:26 見若chengseⁿ有分蹄無拆叉，mā無翻草ê，對lín來講是無清氣ê，見若摸tio̍h ê人mā算做是無清氣。
11:27 見若四腳ê獸，其中用腳掌行ê，對lín來講是無清氣ê；摸牠ê屍體ê人一定無清氣到tī ê-hng時。
11:28 The̍h牠ê屍體ê人tio̍h洗伊ê衫褲，伊一定無清氣到ê-hng時，chiahê對lín來講是無清氣ê。
11:29 「地chiūⁿteh爬ê物，對lín來講無清氣ê，to̍h是chiahê：赤鼠，鼫鼠、杜定kah牠ê類，
11:30 壁虎、龍子、仙尪á、蛇醫、蝘蜓。
11:31 Teh爬ê物ê中間，chiahê對lín來講是無清氣ê。In若已經死去，見若摸tio̍h屍體ê，一定無清氣到ê-hng時。
11:32 其中有死去ka-la̍uh tī啥物物ê頂面，hitê物to̍h無清氣，無論是柴ê器具，á是衫褲，á是皮，á是布袋，無論是做啥物路用ê器具，tio̍h hē tī水裡，一定無清氣到ê-hng，hit時chiah ē清氣。
11:33 若in有一隻跋tī磁器內，hit內面無論有啥物物件，就bak無清氣，lín tio̍h kā chitê磁器phah破。
11:34 Hit內面所有會食得ê食物，bak tio̍h水e5to̍h無清氣，koh再 hitê器具內會lim得ê，mā是無清氣。
11:35 Hiahê屍體，若有一塊ka-la̍uh tī啥物物件頂面，hitê物件to̍h無清氣，無論是風爐á是灶，to̍h tio̍h phah破，lóng無清氣，mā對lín來講是無清氣ê。
11:36 總是，水泉á是聚集水ê池猶原是清氣，若kha̍p tio̍h hitê屍體ê，to̍h無清氣。
11:37 若tī屍體有一塊ka-la̍uh tī beh種ê種籽，種籽猶原是清氣。
11:38 若水已經kā它phah-tâm，hitê屍體有一塊ka-la̍uh tī它ê頂面，hitê種籽對lín來講是無清氣ê。
11:39 「Lín所thang食ê chengseⁿ，牠若kakī 死去，有人摸tio̍h牠ê屍體，伊一定無清氣到ê-hng時。
11:40 有人食hitê死ê chengseⁿ，tio̍h洗伊ê衫褲，一定無清氣到ê-hng時；the̍h死ê chengseⁿ ê人mā tio̍h洗伊ê衫褲，一定無清氣到ê-hng時。
11:41 「見若tī地chiūⁿteh爬ê物是可惡ê，lóng m̄ thang食。
11:42 見若用腹肚行ê kah用四腳行ê，á是有真chē腳ê，to̍h是所有tī地chiūⁿ爬ê，lín lóng m̄ thang食，因為he是可惡ê物。
11:43 Lín m̄ thang因為啥物teh爬ê物hō͘ kakī 成做可惡，mā m̄ thang因為chiahê物hō͘ kakī 無清氣，致使lín無清氣。
11:44 因為我是上主—lín ê上帝，lín tio̍h kakī 潔淨來成聖，因為我是聖。Lín mā m̄ thang用tī地chiūⁿteh爬ê物來òe lahsap kakī 。
11:45 因為我是chhōa lín出埃及地ê上主，beh做lín ê上帝，所以，lín tio̍h聖潔，因為我是聖潔ê。」
11:46 「這是走獸、飛鳥kah水中會振動ê活物，以及tī地chiūⁿ會爬ê物ê規例。
11:47 Tio̍h分別清氣ê kah無清氣ê，會食得ê活物kah bē食得ê活物。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。