以弗所書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
2:1 Tùi罪出死入活
過去因為lín悖逆上帝，靈性已經死去。
2:2 Hit時，lín跟tòe chit世間ê pháiⁿ風俗teh生活，koh順服天界ê掌權者，to̍h是chitmá teh管轄hiahê悖逆上帝ê奴僕ê hitê邪神。
2:3 其實阮以前mā lóng kah chiahê人仝款，順服私慾teh生活，照kakī 肉體ê私慾kah意念teh行踏；阮kah其他ê人lóng仝款，註定tio̍h受上帝ê刑罰。
2:4 總是，上帝有夠額ê憐憫，祂用極大ê慈愛teh疼咱。
2:5 當咱iáu teh悖逆上帝，靈性已經死ê時，祂to̍h hō͘咱kah基督同齊koh活；咱tùi上帝ê恩典來得救。
2:6 通過咱kah基督耶穌結聯，上帝hō͘咱kah祂同齊koh活，做伙tī天頂掌權。
2:7 Án-ne是beh對世世代代表明祂夠額ê恩典，to̍h是通過基督耶穌對咱顯示ê慈愛。
2:8 因為lín是靠上帝ê恩典，tùi信來得救；m̄是靠lín kakī ，是靠上帝ê恩賜。
2:9 既然m̄是靠kakī ê行踏，lín to̍h無啥物thang誇口。
2:10 因為咱是上帝創造ê，祂通過基督耶穌來改造咱，ài咱行好事；這是上帝早to̍h計畫ài咱ánne去做ê。
2:11 Tī基督內成做一體
所以，lín chiahê出世to̍h是外邦人ê，lín hō͘ hiahê自稱受割禮ê偤太人kā lín稱做無受割禮ê；in ê割禮是人用手tī身軀行割禮。
2:12 Hit時，lín無kah基督結聯，無屬上帝ê選民，tī上帝應允ê約無份，tī chit世間無ǹg望，mā m̄ bat上帝。
2:13 Lín chiahê以前離開上帝遠遠ê人，chitmá靠基督耶穌，通過祂ê死，已經kah上帝親近。
2:14 因為基督做咱和平ê源頭；祂用kakī ê身軀拆毀互相對敵ê牆，hō͘偤太人kah外邦人合做伙。
2:15 祂廢除造成彼此冤仇ê偤太人誡命ê律法kah記載ê規例，是beh hō͘雙pêng通過祂來創造一个新ê人，thang和平做伙生活。
2:16 祂koh通過十字架，除去彼此ê對敵，hō͘雙pêng成做一體，thang kah上帝和好。
2:17 Án-ne，基督來傳和平ê福音hō͘所有ê人，包括lín chiahê以前離開上帝遠遠ê外邦人kah親近上帝ê偤太人。
2:18 通過基督，咱兩pêng ê人lóng ē tàng tùi仝一个聖神來親近天父。
2:19 所以，lín外邦人無koh做外國人，m̄是生份人；lín已經是上帝子民ê同胞，是上帝厝內ê人。
2:20 Lín kah偤太人仝款，是起造tī使徒kah先知ê地基頂面，基督耶穌kakī mā做厝角頭siōng重要ê基石。
2:21 Kui個建築物靠基督來結合，互相接連，漸漸擴展，成做聖殿來獻hō͘主。
2:22 Óa靠聖神ê幫贊，lín mā做伙受起造，來成做上帝所tòa ê所在。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。