哥林多前書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
11:1 Lín tio̍h學我，親像我學耶穌基督。
11:2 罩頭巾ê規定
我tio̍h kā lín oló，因為lín不時ē記得我，koh遵守我傳hō͘ lín ê教示。
11:3 總是，我ài lín明白，基督是所有chapo͘人ê頭，chapo͘人是chabó͘人ê頭，上帝是基督ê頭。
11:4 Cha-po͘人tī公共場所祈禱á是傳福音ê時，若罩頭巾to̍h是teh侮辱伊ê頭基督。
11:5 M̄ koh，chabó͘人tī祈禱á是傳福音ê時，若無罩頭巾to̍h是teh侮辱她kakī ê頭，to̍h是她ê丈夫，chit款ê chabó͘人kah頭毛hō͘人剃起來ê chabó͘人仝款。
11:6 因為chabó͘人若無罩頭巾，頭毛tio̍h剪起來；既然kā剪頭毛á是剃頭毛看做見笑，ánneto̍h tio̍h罩頭巾khah好。
11:7 Cha-po͘人無應該罩頭巾，因為伊是上帝ê形像kah榮光；m̄ koh，chabó͘人是chapo͘人ê榮光。
11:8 因為chapo͘人m̄是tùi chabó͘人造出來，獨獨chabó͘人是tùi chapo͘人造出來ê。
11:9 Cha-po͘人m̄是為tio̍h chabó͘人chiah創造ê，是chabó͘人為tio̍h chapo͘人來創造ê。
11:10 所以，chabó͘人ê頭tio̍h罩頭巾，來表示對權威屈服ê記號，mā是為tio̍h敬畏天使ê緣故。
11:11 總是，tī主ê內面，chapo͘人需要chabó͘人，chabó͘人mā需要chapo͘人。
11:12 因為chabó͘人是tùi chapo͘人造出來ê，chapo͘人mā是tùi chabó͘人生ê；獨獨萬物lóng是tùi上帝造出來ê。
11:13 Lín tio̍h kakī 判斷，chabó͘人無罩頭巾來對上帝祈禱，kám有適合？
11:14 照人ê本性，留長頭毛是chapo͘人ê見笑。
11:15 M̄ koh，chabó͘人留長頭毛是她ê榮光，因為長頭毛thang做她ê遮帕。
11:16 若有人想beh辯駁，我只有ē tàng講，kantaⁿ tī阮kah上帝ê教ē有chit款規矩。
11:17 主ê晚餐
Taⁿ我beh kā lín指示下面chiahê話，m̄是beh kā lín oló，因為lín ê聚會實在是有損無益。
11:18 第一，我聽講lín聚會ê時有結黨分派，我相信這有一部分是事實。
11:19 Lín中間難免有無仝ê意見，ánne chiah看ē出啥人ê意見khah正確。
11:20 Lín聚會ê時，並m̄是teh食主ê晚餐。
11:21 因為lín ta̍k人lóng趕緊teh食kakī 帶來ê物，結果有人腹肚iau，有人酒醉。
11:22 Lín tòa厝裡kám bē tàng lim食？Lín是teh看輕上帝ê教會，mā beh hō͘無thang lim食ê人見笑，是無？我tio̍h對lín án怎講？對chit項tāichì，我無beh kā lín oló。
11:23 我tùi主所領受ê，我mā傳hō͘ lín，to̍h是主耶穌hō͘人出賣hit暝有the̍h餅，
11:24 感謝上帝了後，kā餅peh開，講：「Chitê是我ê身軀，為tio̍h lín犧牲ê，lín tio̍h照ánne來記念我。」
11:25 食了後koh phâng杯，講：「Chitê杯是新ê約，是用我ê血設立ê，lín ta̍k pái lim ê時，tio̍h照ánne來記念我。」
11:26 Án-ne，lín ta̍k pái食chitê餅，lim chitê杯ê時，是teh表明主ê死，一直到祂koh再臨。
11:27 所以，若無用敬虔ê心來食主ê餅，lim主ê杯，是無合宜ê，是teh褻瀆主ê身軀kah血。
11:28 Ta̍k人tio̍h省察kakī ，chiah thang食chitê餅，lim chitê杯。
11:29 人若無清楚食餅lim杯kah主身軀ê關係，ánne，食chitê餅，lim chitê杯，to̍h是kakī teh惹來審判。
11:30 因為ánne，lín chiahē有真chē人衰lám kah破病，mā bē少人死去。
11:31 咱若先省察kakī ，to̍h bē致使受審判。
11:32 總是，咱受主審判是teh hō͘主kā咱警戒，chiah m̄免kah世間人做伙受定罪。
11:33 所以，我ê兄弟姊妹，lín聚集beh食主ê晚餐ê時，tio̍h互相thèng候。
11:34 若有人iau，tio̍h tī厝裡先食，chiah免得聚會ê時soah變做受上帝審判。其他ê tāichì，等我去lín hia ê時chiah來解決。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。