哥林多前書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
7:1 結婚á是獨身
關係lín tī phoe內面提起ê問題：人無結婚khah好。
7:2 總是，因為lín有一kóa淫亂ê tāichì，所以，ta̍k个 chapo͘人tio̍h有kakī ê bó͘，ta̍k个 chabó͘人mā tio̍h有kakī ê翁。
7:3 Cha-po͘人對bó͘ tio̍h盡做翁ê義務；chabó͘人對翁mā tio̍h盡做bó͘ ê義務。
7:4 Bó͘對kakī ê身軀無主權，她ê主權在tī in翁；siāng款，翁對kakī ê身軀mā無主權，伊ê主權在tī in bó͘。
7:5 M̄-thang忽略對方ê需要，若是為tio̍h beh專心祈禱，互相同意to̍h thang暫時分開；後來，猶原tio̍h做伙tòa，chiah免得因為bē tàng控制kakī ê情慾，致使受撒旦ê誘惑。
7:6 我講翁bó͘ thang暫時分開，是允准，m̄是命令。
7:7 我ài ta̍k人lóng親像我無結婚；總是，ta̍k人tùi上帝領受ê恩賜無仝款，有ê chit款，有ê hit款。
7:8 對hiahê 未婚者kah寡婦，我勸in若ē tàng親像我守獨身是好。
7:9 若bē tàng控制kakī ，to̍h tio̍h結婚；寧可結婚，比hō͘慾火燒khah好。
7:10 已經結婚ê人，我命令lín；其實m̄是我，是主ê命令：Cha-bó͘人m̄ thang離開in翁。
7:11 若離開，to̍h tio̍h守獨身，若無，tio̍h koh kah in翁和好；chapo͘人mā m̄ thang放sak in bó͘。
7:12 對其他ê人我講（m̄是主講ê）：若男信徒娶無信主ê人做bó͘，in bó͘歡喜做伙tòa，to̍h m̄ thang kā她放sak。
7:13 若女信徒kah無信主ê人結婚，翁歡喜kah她做伙tòa，mā m̄ thang kā in翁放sak。
7:14 無信主ê chapo͘人因為娶信主ê人做bó͘，ē得tio̍h上帝ê接納。仝款ánne，無信主ê chabó͘人因為嫁信主ê翁，ē得tio̍h上帝ê接納。若m̄是ánne，lín ê kiáⁿ兒to̍h無屬上帝，其實in是歸屬上帝ê。
7:15 無信主ê人若beh離開，to̍h chhut-chāi伊離開。Tī chit款ê情形，信主ê翁á是bó͘ to̍h無受婚姻ê約束；上帝呼召咱，是ài咱平安過日子。
7:16 Lín tio̍h知，信主ê chabó͘人kiámchháiē救kakī ê翁；lín mā tio̍h知，信主ê chapo͘人kiámchhái mā ē救kakī ê bó͘。
7:17 Tio̍h保持受召Hit時ê身分
Ta̍k人tio̍h照主賞賜ê恩賜，照上帝揀召ta̍k人ê目的來生活。這是我教導各教會ê準則。
7:18 受割禮了後chiah接受呼召ê人，m̄免掩蓋割禮ê記號；受呼召ê時iáu未受割禮ê人，mā m̄免去受割禮。
7:19 因為有受á是無受割禮lóng無要緊，siōng要緊ê是遵守上帝ê誡命。
7:20 Ta̍k人tio̍h保持受召hit時ê身分。
7:21 你是做奴隸ê時來受召，是無？M̄免掛意；總是，若有機ē得tio̍h自由，tio̍h把握機會。
7:22 因為受主揀召ê奴隸是hō͘主tháu放ê自由人；siāng款，受主揀召ê自由人是基督ê奴僕。
7:23 Lín是上帝用代價買來ê，m̄ thang成做人ê奴隸。
7:24 兄弟姊妹，ta̍k人tio̍h tī上帝ê面前，保持lín原來ê身分。
7:25 獨身kah寡婦ê問題
關係獨身ê問題，我無受主ê命令，總是，我已經得tio̍h主ê憐憫，來成做盡忠ê奴僕，我to̍h提出kakī ê意見。
7:26 考慮目前艱難ê處境，我想人iáu是保持現狀khah好。
7:27 若已經娶bó͘ ê，to̍h m̄ thang想beh自由；若iáu未娶bó͘ ê，to̍h m̄ thang想beh娶。
7:28 總是，你若娶，m̄是犯罪；在室女若嫁，mā m̄是犯罪。總是，結婚ê人ētú tio̍h生活上ê拖累；我是teh為lín設想。
7:29 兄弟姊妹，我kā lín講，時日teh beh到à，所以，tùi taⁿ以後，有bó͘ ê tio̍h親像無bó͘；
7:30 teh啼哭ê親像無teh啼哭；歡喜ê親像無teh歡喜；買物件ê親像無得tio̍h啥物；
7:31 teh用世間ê物ê親像無用kah盡磅，因為chit世間ê現狀teh beh過去à。
7:32 我ài lín lóng無煩無惱。無娶bó͘ ê人關心主ê tāichì，目的是beh hō͘主歡喜。
7:33 M̄ koh，有bó͘ ê人操煩世間ê tāichì，目的是beh hō͘ bó͘歡喜，soah致到分心。
7:34 無嫁ê chabó͘人kah少女關心主ê tāichì，是beh hō͘她ê身軀kah心神lóng聖潔。M̄ koh，嫁翁ê chabó͘人操煩世間ê tāichì，目的是beh hō͘ in翁歡喜。
7:35 我ánne對lín講是為tio̍h lín ê利益，m̄是beh kā lín束縛。我是ài lín做合宜ê tāichì，thang專心服事主，無受世間事ê攪擾。
7:36 M̄ koh，若有人想講kakī 對待未出嫁ê chabó͘ kiáⁿ無應該，chabó͘ kiáⁿ若已經超過結婚ê年齡，應該tio̍h照她ê意思hō͘她結婚。伊ánne做m̄是犯罪。
7:37 伊若無不得已ê tāichì，是出tī kakī ê決心，koh ē tàng控制kakī ê意志，決定無beh hō͘ chabó͘ kiáⁿ結婚，ánne做是好。
7:38 總講一句，hō͘ kakī ê chabó͘ kiáⁿ結婚是好，無hō͘她出嫁koh khah好。
7:39 丈夫iáu活leh ê時，hitê chabó͘人tio̍h受束縛；丈夫若死去，她thang自由嫁她所意愛ê人，獨獨tio̍h嫁hō͘信主ê人chiah thang。
7:40 她若無koh嫁是koh khah有福氣。這是我ê想法；總是，我想我mā有受上帝ê聖神啟示。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。