羅馬書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
11:1 以色列人kah上帝ê信實
Án-ne，我beh問lín：上帝kám有棄sak祂ê子民？絕對無！因為我mā是以色列人，是亞伯拉罕ê kiáⁿ孫，屬便雅憫支族。
11:2 上帝m̄ bat放sak祂早to̍h揀選ê子民。Lín kám m̄知經典有記載關係以利亞對上帝控告以色列人ê tāichì？
11:3 伊講：主ah，inthâi死祢ê先知，拆毀祢ê祭壇，只有chhun我tī ·leh，in mā teh siàu想我ê性命。（註：王上19：10，14)
11:4 總是，上帝án怎應答？祂ánne講：我有為tio̍h kakī 留七千個m̄ bat跪拜巴力ê人。(註：王上19：18)
11:5 Chit-má mā是ánne；上帝有留一kóa用恩典揀選ê人。
11:6 既然是上帝ê恩典，to̍h m̄是照人ê行為；恩典若是照人ê行為，hitê恩典to̍h m̄是叫做恩典。
11:7 Án-ne，結局án怎？以色列人無得tio̍h in teh追求ê，只有上帝揀選ê一kóa人有得tio̍h，其他ê人心硬m̄聽。
11:8 照經典所記載：上帝hō͘ in ê心神麻痺，目chiu 無看見，耳孔無聽見，一直到今á日。（註：申29：4；賽29：10)
11:9 大衛mā講：Tio̍h hō͘ in ê宴ē變成in ê陷坑、羅網，hō͘ in跋倒，來做in ê報應。
11:10 Tio̍h hō͘ in ê目chiu 花，bē tàng看見。Tio̍h hō͘ in ê尻脊骿永遠曲痀。（註：詩69：22-23)
11:11 Án-ne，我beh問：以色列人跋倒，kám lóng peh bē起來？絕對會！因為in ê犯罪，拯救soah臨到外邦人，顛倒會激起in ê嫉妒。
11:12 以色列人ê犯罪ē hō͘世間人得tio̍h豐盛ê祝福，in ê衰退mā ē hō͘外邦人得tio̍h富足。Án-ne，若是所有ê以色列人lóng歸向上帝，hitê祝福kám m̄是ē koh khah大！
11:13 上帝拯救外邦人
我是對lín外邦人teh講話，因為我是外邦人ê使徒，我對我ê宣教職份感覺真光榮。
11:14 Kiám-chhái我ē激起我ê同胞ê嫉妒，thang救in中間ê一kóa人。
11:15 以色列人ê受棄sak若ē hō͘世間人kah上帝和好，ánne，in koh受接納ê時，kám m̄是親像tùi死koh活？
11:16 頭一塊麵粉粞若聖別獻hō͘上帝，kui-sn̂g麵粉mā lóng ē聖潔；樹根若聖別獻hō͘上帝，連樹枝mā lóng ē聖潔。
11:17 Lín雖然是野生ê橄欖樹ê樹枝，若接枝tī受栽培ê橄欖樹，來代替一kóa at斷ê，to̍h ē tàng tùi仝hit欉樹根分享豐富ê營養分。
11:18 所以，lín m̄ thang對hiahê at斷ê樹枝誇口，想講lín比in khah好。Lín若beh誇口，tio̍h ē記得，是lín óa靠樹根teh活，m̄是樹根óa靠lín teh活。
11:19 你kiámchháiē講：「樹枝剪起來，是為tio̍h beh hō͘我ē tàng接落去。」
11:20 無m̄ tio̍h，因為in m̄信chiah hō͘人剪起來，lín是因為有信chiah khiāē tiâu。 M̄ koh, lín m̄ thang驕傲，顛倒tio̍h驚惶。
11:21 因為上帝若無kā自然生出來ê樹枝留落來，可能mā無一定ē kā lín留落來。
11:22 Án-ne，咱tio̍h知上帝是慈愛koh嚴格，對墮落ê人真嚴格，m̄ koh，lín若繼續óa靠祂ê慈愛，祂to̍h ē對lín慈愛；若無，祂mā ē kā lín剪起來。
11:23 Hiahê受剪ê以色列人若無koh固執m̄信，mā ēkoh hông接倒tńg去原來hit欉樹，因為上帝有權能kā in接倒tńg去。
11:24 Lín chiahê tùi野生橄欖樹剪起來ê樹枝都ē tàng接tī無仝本性受栽培ê橄欖樹，何況是hiahê原來ê樹枝，kám bē koh khah好接倒tńg去？
11:25 上帝憐憫全人類
兄弟姊妹，我ài lín知chitê奧祕，免得lín kakī 掠做有智慧。Chitê奧秘to̍h是：一部分ê以色列人暫時硬心，thèng候到外邦人全部歸主為止；
11:26 ánne，所有ê以色列人lóngē得救。照記載：救主ē tùi錫安出來，kā雅各ê不義除去。
11:27 Hit時，我ē赦免in ê罪，這是我kah in所立ê約。（註：賽59：20-21；27：9；耶31：33-34)
11:28 Tùi福音ê觀點來看，因為lín有接受，in卻拒絕，所以，in成做上帝ê對敵；tùi受揀選ê觀點來看，因為上帝帶念對in祖先ê應允，所以，in成做上帝所疼ê人。
11:29 因為上帝ê恩賜kah揀選bē改變。
11:30 Lín外邦人過去無順服上帝，m̄ koh，chitmá卻因為以色列人無順服，lín chiah得tio̍h上帝ê憐憫。
11:31 親像ánne，因為lín有得tio̍h憐憫，以色列人chitmá無順服上帝，是為tio̍h beh hō͘ in mā得tio̍h憐憫。
11:32 上帝放所有ê人lóng tī無順服ê狀態，是為tio̍h beh憐憫所有ê人。
11:33 歸榮光hō͘上帝
上帝ê智慧非常深沉，智識非常豐富！祂ê判斷oh得推測，祂ê道路oh得chhōe ·tio̍h！
11:34 啥人知主ê心意？啥人ē tàng替祂出主意？(註：賽43：13)
11:35 啥人bat送禮物hō͘上帝來得tio̍h報答？(註：伯41：11)
11:36 因為萬物lóng是tùi祂hia來，koh óa靠祂，為tio̍h祂來活。願祂得tio̍h榮光，直到永遠。阿們！
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。