羅馬書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
4:1 用亞伯拉罕做信仰ê模範
Án-ne，對kah咱有血統關係ê祖先亞伯拉罕，咱beh án怎講？伊kám有得tio̍h啥物？
4:2 亞伯拉罕若是tùi行為來hō͘上帝看做是義人，伊to̍h有理由thang誇口。M-koh tī上帝ê面前，伊無啥物thang誇口。
4:3 因為經典有ánne講：亞伯拉罕信上帝，所以，上帝to̍h kā伊看做是義人。(註：創15：6)
4:4 工人得tio̍h工錢無算做是恩典，因為he是伊應該得ê。
4:5 M̄ koh，hitê無靠行為，kantaⁿ信hit位ē kā罪人宣判無罪ê上帝ê奴僕，因為伊有chitê信，上帝to̍h kā伊稱做義人。
4:6 大衛mā有講起，一个無做啥物，to̍h hō͘上帝看做是義人ê，hitê人有福氣。伊ánne講：
4:7 過失得tio̍h赦免，罪過得tio̍h消除ê人，實在有福氣！
4:8 主無kā伊定罪ê人，實在有福氣！（詩32：1-2)
4:9 Taⁿ，chitê福氣是只有beh hō͘有受割禮ê人，是無？Á是mā beh hō͘無受割禮ê人？因為咱有講：亞伯拉罕因為有信上帝，上帝to̍h kā伊看做是義人。
4:10 亞伯拉罕是tang時chūn hō͘上帝看做是義人？是受割禮以前á是以後？是受割禮以前，m̄是以後。
4:11 後來，伊有受割禮，chitê割禮是一種記號，證實伊iáu未受割禮以前to̍h因為有信，to̍h hō͘上帝kā伊認定做義人。所以，對hiahê無受割禮因為有信，to̍h hō͘上帝認定做義人ê人來講，亞伯拉罕成做in ê祖先。
4:12 伊mā是有受割禮ê人ê祖先，因為in m̄ nā有受割禮，mā有跟tòe咱ê祖先亞伯拉罕iáu未受割禮以前to̍h有ê信心，用伊做模範teh生活。
4:13 亞伯拉罕通過信仰來領受上帝ê應允
上帝應允亞伯拉罕，beh hō͘伊kah伊ê kiáⁿ孫承接chitê世界。Chitê應允，m̄是通過律法，是通過信，chiah hō͘伊得tio̍h上帝kā伊稱做義人。
4:14 若遵照律法ê人chiah ē tàng承接上帝ê應允，hit款ê信仰是有ná無，hitê應允mā無路用。
4:15 律法ē引起上帝ê受氣；因為若無律法，to̍h無違犯律法ê tāichì。
4:16 所以，應允是用信做根據，這是beh保證應允是出tī上帝白白ê恩典，beh hō͘亞伯拉罕所有ê kiáⁿ孫；m̄ nā是有受割禮ê，mā包含kah亞伯拉罕仝款有信靠上帝ê奴僕；亞伯拉罕是咱眾人ê祖先。
4:17 照經典所記載：我設立你做萬民ê祖先。(註：創17：5)亞伯拉罕相信ē hō͘死人koh活，ē tùi無創造有ê上帝，koh tùi祂領受應允。
4:18 亞伯拉罕tī無ǹg望ê時，iáu koh抱tio̍h ǹg望，相信伊ē成做萬民ê祖先，to̍h是照應允所講ê：你ē有真chē kiáⁿ孫。(註：創15：5)
4:19 Hit時，伊已經chiâⁿ百歲，伊知影kakī ê身軀衰弱kah teh beh死去，伊ê bó͘撒拉mā已經bē生kiáⁿ，m̄ koh，亞伯拉罕無因為ánne來失去信心。
4:20 伊對上帝ê應允無憢疑，伊ê信心反tńg ná堅定，kā榮光歸hō͘上帝。
4:21 伊確信上帝一定ē實現祂kakī ê應允。
4:22 因為伊有chit款ê信心，上帝chiah kā伊看做是義人。
4:23 「Kā伊看做是義人」（註：創15：6) chit句話，m̄是kantaⁿ為tio̍h亞伯拉罕來寫ê，
4:24 mā是為tio̍h咱chiahê人寫ê。因為咱有相信上帝hō͘咱ê主耶穌tùi死人中koh活，所以，咱mā ē hō͘上帝看做是義人。
4:25 為tio̍h咱ê罪過，上帝kā耶穌交hō͘人害死，koh為tio̍h beh hō͘咱kah上帝有和好ê關係，上帝有hō͘耶穌koh活。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。